Sofonias 2 - Ja yab'al ja Dyosi

K'u'anik ja yab'al ja Dyosi

¹ Ja ke'n Sofonias jb'i'il, ti kala'a: swinkil chonab' Juda, —Ja we'nlexi mini t'un wala k'ixwiyexa. La'ik la je'a b'ajik b'a sti sat ja Dyosi

² Yaj ni ja mitox k'ot ja k'ak'u oj skich ex jastal ts'i'lel; lek ja mito slajawex b'a we'n oj ch'ak ko'uk a b'ajex spetsanil ja stajkelal ja Dyos kujtiki.

³ Jaxa we'nlex ja ma'tik jel ko'el wala iljiyexi, waxa k'u'anex ja Dyos kujtiki, le'awik sok ilawik st'ilanil toj oj ajyanik; b'ob'ta ja jachuki oj b'ob' a kolta b'ajex ja k'ak'u oj ya jtuptik ja multik ja Dyosi.

Ja jas mi lek alji sb'aj ja filisteo jumasa

⁴ Ja chonab' jumasa b'a Gaza sok b'a Ascaloni oj kan jipan mini jun swinkil oj kanuka; ja ma'tik ti aye b'a chonab' Asdod sok b'a Ecroni sat k'ak'u oj ch'ak jipjuke el ja b'a schonab'ile'i.

⁵ —Jel wokol oj ek'uk a wujilex ja we'nlex, filisteo jumasa, swinkil ja chonab' Creta ja ma' naka ti ayex b'a sti ja' b'a niwan paman ja'i. —Ja Dyosi, yalata oj sch'ak a na'jelex ja sniwanil wa chonab'ilexi, mini jun swinkil oj ya' kana, jach' lajan jastal sk'u'lan jan yi ja swinkil ja Canaani.

⁶ —Spetsanil ja b'a sti ja niwan paman ja' jumasa oj pax job' b'a oj wa' chej jumasa.

⁷ Yaj nix yala ja Dyos kujtik oj kumxuk ja ma'tik kan sak'an ja swinkil ja chonab' Juda, ja it ma'tik ch'ak i'juke lutan b'a niwan chonab'i, ye'n junxta ti oj yi'och ja b'a sti' niwan paman ja'i, b'a oj ya wa'uk ja scheje'i. Jaxa ye'nle'i, ti oj kan wayuke b'a na'its jumasa b'a kanta jipan b'a chonab' Ascaloni.

Ja lo'il mi lek alji yab' ja Moab sok ja Amoni

^8-11 Jach' wax yala ja Dyos yuj ja israelenio: —Ja swinkil ja chonab' jumasa b'a Moab sok ja b'a Amoni jel yutaje ja kuntikili sok yi'aje kan yi ja slu'ume jumasa, ke'n oj k'ulyi ja chab' chonab' jawi oj kan jipan; ja chonab' jumasa jawi, oj paxkan yaljil k'i'ix, oj cho paxkan sk'ejnal ya'al ats'am, jach' waj jastal waj ja Sodoma sok ja Gomorra. Ja t'usan janek' kan sak'an ja swinkil ja Juda oj ch'ak sjap'e yi spetsanil ja jastik sb'aje'i sok oj yi'e kan yi ja slu'ume jumasa. —Ja jawi, ke'n oj ka stup'e' ja jastalni ja sb'eji yuj ja lom jel ch'in yilawe ja kuntikili sok yuj ja lom sjapawe yi ja slu'ume'i. Yaj nix ch'ak sna'jel ja dyose jumasa b'a lu'um iti, spetsanile man oj k'itk'unuke yuj xiwel ja b'a sti jsati, man ja niwak chonab' jumasa b'a jel najat ayi oj sna'e yuj ke'n Dyos yujone'. Ke'nani Dyos yuj ja israelenio'a, ja jas wax kala yujni jach' oj k'u'l merana.

Ja lo'il mi lek alji sb'aj ja swinkil jumasa ja chonab' Etiope

¹² —Jaxa we'nlex swinkil ja chonab' Etiopia, ke'n oj mil'ex sok ja jmachiti.

Ja lo'il mi lek alji sb'aj ja swinkil jumasa ja chonab' Asiria

¹³ Ja Dyosi, ti cho yala'a: —Oj tiro'anukon, sok oj ch'ak sna'jel ja swinkil jumasa ja chonab' Asiria; —oj ka sutxuk sb'a Ninive, ja sniwanil ja schonab'ile'i, jach' oj ka'kan jastal jun takin lu'um k'inal.

¹⁴ Ja ste'il ja wa najex jumasa jach' oj kan chajan, ja tiwi, kechan ti oj waj jijluk ja chej jumasa sok spetsanil tik'e chante jumasa. Ja b'a bigasil sok ja b'a sbentana'il jumasa ti oj stojb'es tiw ja soj ja xoch' sok ja ijkin jumasa, ja sjamulab'il ja sna'itsil, b'ut'el ts'i'lel.

¹⁵ —Jach' ja oj kan jastal jaw ja schonab'ile yuj ja lom jel wa stoyo sb'aji, wax ya'a sb'aj jel seguro ay ajyi. —Jach' oj kan jastal jaw ja schonab'ile yuj ja lom wax yala mi ma' pilan oj slaj ja jastal ja ye'n. —Ja chonab' jawi, jun takin lu'um k'inal oj kanuk, ja na'its jumasa snaj chante b'a k'ul oj kanuk. Ja ma oj yil ch'akta sna'jeli jel lek oj yil'e', jel oj stse'uke, man oj spak'tsuk ja sk'ab'e'i.