Numeros 4 - Ja yab'al ja Dyosi

Ja ya'tele ja yintil jumasa ja Levi Ja nole smoj alijel ja Quehati

¹ Ja Dyosi, yal yab' ja Moises sok ja Aaroni:

² —A'wik och ju'un ja yintil jumasa ja Levi ma'tik ti' oj ajyuk sok ja nole smoj alijel ja Quehati, kechan na'awik lek ma'tik yuntikil.

³ A'wik sta' sb'a sok ja ma'tik ay yi'oj jun tajb'e lajune jab'il (30), sok ja ma' ay yi'oj chab' tajb'e sok lajune jab'ili (50), ja ye'nle'i, oj b'ob' a'tijuke b'a snajtsil tsomjeli.

⁴ Ja ya'tel oj sk'u'luke ja yintil jumasa ja Quehat b'a snajtsil tsomjeli, jach' jastal iti:

⁵ —Yajni oj stul ja snaj ja kristyano yajni oj wajuke b'a pilan lu'umi, jaxa Aaron sok ja yuntikili, oj jak ya'we eluk ja k'u'uts tey b'a snajtsil tsomjel b'a it tsa'ub'ali, sok ja jawi ja oj smus'e sok ja skajonil trato sk'u'lunej ja Dyosi.

⁶ B'a sat ja k'u'utsi, oj ya'we och jun tsamal ts'u'um, b'a sat ja ts'u'umi oj slib' e' jun yaxal k'u'uts, ti oj cho ya'we ochuk ja ste'il wax likxi ek' sok ja skajonil ja trato sk'u'lunej ja Dyosi.

⁷ —Ja b'a sat ja smesa'il ja pan it tsa'ub'al b'a jb'aj ke'n, oj slib' e' jun yaxal k'u'uts ja b'a sati, ti oj yawe kajan ja sek'i, ja lechub' wa'eli, ja b'is sok ja xalu jumasa sok ja ya'lel ts'usub' b'a smajtan ja Dyosi. Ti oj cho ya'we tiw ja pan it wax makuni b'a spetsanil k'ak'u.

⁸ B'a spetsanil ja it jumasa, oj slib' e' sb'aj jun chakal k'u'uts b'a sati, oj cho smus e' sok jun tsamal ts'u'um. Oj ya'we ochuk ja te' it wax likxi ek' sok ja skajonil ja trato sk'u'lunej ja Dyosi.

⁹ —Ja kandelerio oj smus e' sok jun yaxal k'u'uts, jach'ni ja k'ak' wax ajli, ja slats'ulab'il chakal k'ak'i, ja yal splato'il jumasa, sok spetsanil ja yal svaso'il jumasa wax makuni b'a aceite.

¹⁰ Spetsanil ja iti, oj smus e' sok jun tsamal ts'u'um, oj cho yawe ochuk ja ste'il wax likxi ek' soki.

¹¹ —Oj slib' e' jun yaxal k'u'uts b'a sat ja altar toj sakal tak'ini, oj smus e' sok jun tsamal ts'u'um, oj ya'we ochuk ja ste'il wax likxi ek' soki.

¹² Oj ch'ak stsom e' spetsanil ja jas wax makuni b'a snajtsil tsomjeli, ti oj yawe b'a jun yaxal k'u'uts, oj smus e' sok jun tsamal ts'u'um, ja oj yi'e' och sok ja ste'ili.

¹³ —Oj smus'e lek ja sta'anil ja altari, ti oj smus e' sok jun chakal k'u'utsa,

¹⁴ b'a sat ti oj ya'we spetsanil ja jas wax makuni b'a kulto: Ja ye'tal chakal k'ak'i, sok ja slats'ulab'ili, ja slechulab'il sok ja niwak tasa jumasa. Spetsanil ja it jumasa oj smus'e sok jun tsamal ts'u'um, oj ya'we ochuk ja ste'il b'a wax likxi soki.

¹⁵ —Ja Aaron sok ja yuntikili, yajnix ch'ak spots e spetsanil ja jastik jumasa wax makuni b'a snajtsil tsomjeli, yajni ojxa och b'ejyuke'i, ti wax yal yab' ja yuntikil ja Quehat a skuch e' spetsanil ja jastik jumasa jawi. Kechan a'ni stalna lek sb'aje b'a mi oj syam'e mini june ja jas tsa'ub'ali, kechan ta yuj k'a syamawe'i, ojni chamuke'a. Ja' it ja ya'tel oj sk'u'luke ja yuntikil ja Quehat b'a snajtsil tsomjeli.

¹⁶ —Ja Eleazar yunin ja pagre Aaroni, ye'n oj yi'och ja aceite sb'a oj ajluk ja k'ak'i, ja pom b'a jex ajb'ani yik'ili, ja jmajtan it jel t'ilan oj ja wa'wex ki'i, oj pek'xuk yi aceite ja jastik oj makunuki. Cho ye'n oj stalna ja snajtsil tsomjel sok spetsanil ja jastik tsa'ub'ali—.

¹⁷ Ja Dyosi, ti yala yab' ja Moises sok ja Aaroni:

¹⁸ —Mok a wa'wex ch'ay sna'jel junuk ja yuntikil ja Quehat b'a yojol ja yintil jumasa ja Levi.

¹⁹ B'a jach' mi oj a'ji stup ja yuntikil ja Quehat ta yuj k'a syamawe ja jastik jumasa tsa'ub'ali, jach' oj sk'u'luke jastal iti: Ja Aaron sok ja yuntikili, oj yal'e yab' b'a jujune jasunk'a oj sk'u'luke'i, sok jasunk'a wax ko' sb'aje oj yi'e ochi.

²⁰ B'a jach' mi oj och sk'el'e' ja jastik jumasa tsa'ub'ali, cho mini oj chamuke'a.

Ja k'ole smoj alijel ja Guersoni:

²¹ Ja Dyosi, yal yab' ja Moisesi:

²² —A' och ju'un spetsanil ja ma tey sok ja smoj alijel ja Guersoni.

²³ A smo'uk sb'aj sok ja ma'tik ay yi'oj jun tajb'e sok lajune jab'ili (30) ja ma' ay yi'oj chab' tajb'e sok lajune jab'ili (50), ja ye'nle'i oj b'ob' a'tijuke b'a snajtsil tsomjeli.

²⁴ Ja a'tel oj sk'u'luke'i, jach' jastal iti:

²⁵ —Oj yi'e' och ja niwan lechan k'u'uts b'a snajtsil tsomjel b'a it tsa'ub'ali sok ja tsamal ts'u'um wax musxi sok ja k'u'uts b'a wax ajyi ocheli,

²⁶ ja k'u'uts sb'a stejnali, ja k'u'uts b'a wax ajyi ochel b'a smakb'al ja stejnali, ja altari, ja laso jumasa, sok spetsanil ja jas wax makunuk b'a kulto.

^27-28 —Ja Aaron sok ja yuntikili, oj yal'e yab' spetsanil ja jas oj sk'u'luke ja yintil jumasa ja Guerson b'a snajtsil tsomjeli, sok spetsanil ja jas t'ilan oj yi'e ochi, jaxa Itamar yunin ja pagre Aaroni, ye'n oj yal jastal oj a'tijuke.

Ja k'ole smoj alijel sb'aj sok ja Merari

²⁹ —A' och ju'un spetsanil ja ma tey sok ja yuntikil ja Merari.

³⁰ A smo'uk sb'aj sok ja ma'tik ay yi'oj jun tajb'e sok lajune jab'ili (30) ja ma' ay yi'oj chab' tajb'e sok lajune jab'ili (50), ja ye'nle'i, oj b'ob' a'tijuke b'a snajtsil tsomjeli.

³¹ Ja ya'tele'i, ja' oj ya'we ek'uk ja ak'inte' jumasa, sk'atk'an te'il, syojyal, sok ja yip jumasa.

³² Oj cho yi'e och ja sposte'il stejnal it sjoyb'unej ja snajtsil tsomjeli, ja yip jumasa, ja yestaka'il jumasa, ja yak'il jumasa sok spetsanil ja jas oj makunuk b'a kulto. We'n oj ch'ak a wal spetsanil ja jas t'ilan oj yi'e' ochi.

³³ Ja a'tel it ja oj sk'u'luke spetsanil ja yintil jumasa ja Merari, ja'ni jastal oj sje' ja Itamari—.

Ja Moises sok ja Aaroni sk'u'aneni'a

^34-49 Ja Moises sok ja Aaroni, jach' sk'u'lane ja jastal alji yabye yuj ja Dyosi, lajan ya'we och ju'un ja yintil jumasa ja Levi sok ja ma'tik niwak ya'tel yuj ja kristyano jumasa. Ch'ak ya'we och ju'un ja yintil jumasa ja Levi. Jach'ni sb'a Quehati, sb'a Guerson sok ja Merari. Ch'ak yajtab'ane spetsanil ja ma'tik ay yi'oj jun tajb'e sok lajune jab'ili (30) ma' ay yi'oj chab' tajb'e sok lajune jab'il (50). Yuj ja ye'nle'i oj b'ob' a'tijuke b'a snajtsil tsomjeli. Jach' ilxi jastal iti. Sk'ole ja janek' ja sb'a Quehati 2,750 ja sb'a Guersoni 2,630 ja sb'a Merari 3,200 ja spetsanil 8,580 Ja spetsanile'i, ay waxake mil jo'e syen sok chan tajb'e (8,580), jach' yala ja Moises ja jas t'ilan oj sk'u'luke'i, jach' sk'u'lan spetsanil jastal alji yab' yuj ja Dyosi.