Numeros 3 - Ja yab'al ja Dyosi

Ja a'tel sb'a yintil jumasa ja Levi

¹ Ja k'ak'u k'umaji ja Moises yuj ja Dyos b'a wits Sinai, ayxa chane yuntikil winik ja Aaroni:

² Ja sb'i'ile'i, Nadab, Abihu, Eleazar, Itamar. Ja b'ankilali Nadab.

³ Schanwanile t'ojiye cho tsajiye b'a oj ochuke pagre'il.

⁴ Jasa, kechan ye'n ochye pagre'il ja Eleazar sok ja Itamari, ja' wax talnajiye yuj ja state'i. Ja Nadab sok ja Abihu, mini ajyi yuntikile'a. Jaxa Dyosi, sch'awanile sch'ay ji sna'jele yuj ja Dyos yuj ja lom mi jach' stsikawe ja pom b'a snajtsil tsomjel ja jastalni ja sb'ej yalunej ja Dyosi.

⁵ Ja Dyosi, yal yab' ja Moisesi:

^6-8 —Paya ja k'ole sb'a Levi, b'a oj a'tijuke yuj ja pagre Aaron sok ja kristyano jumasa. Ja oj stalnaye ja snajtsil tsomjel sok spetsanil ja jas wax makuni ja tiwi.

^9-10 —B'a spetsanil ja janek' ay ja israelenio, kechan ye'n ja Aaron sok ja yintil jumasa oj b'ob' ochuke pagre'il. Pila ja janek' wax kan chab' oxe ja yintil ja Levi b'a oj a'tijuke sok ja pagre jumasa iti. Chikan ma wa sk'u'lan jun a'tel yuj kechan jun pagre oj b'ob' sk'u'luk, cho mik'a yuntikiluk ye'n ja Aaroni, ojni chamuka—.

Ja yintil ja Levi, sb'aj ye'n ja Dyosi

¹¹ Ja Dyosi, yala yab' ja Moisesi:

^12-13 —Ja k'ak'u jch'aya sna'jel ja sb'ajtanil yuntikil kerem ja egipsiano jumasa, cho kala yuj ja israelenio, a ya'weki ja sb'ajtanil yuntikile keremi, cho jach'ni ja yal chante jumasa. Jaxa ya'n ja jtsa'ata ja yintil jumasa ja Levi b'a oj a'tijuke jmok, cho jb'aje ke'n yuj ja tsa'ub'ale kuji. Ke'n Dyoson yuj ja israelenio—.

Ja Moisesi, ya och ju'un ja yintil ja Levi

¹⁴ Ja Dyosi, yal yab' ja Moises b'a takin lu'um k'inal Sinai:

¹⁵ —A och ju'un spetsanil ja yintil jumasa ja Levi, spetsanil ja ma' ek'elxa yuj ja jun ixawi, ja chikan ja jastal ja ma' smoj alijel sb'aj soki.

^16-21 Ja' b'i'ilal jumasa it sk'u'lan ja Moisesi, ja chol yi'aj ja jastal smoj alijel sb'aje ja levita jumasa: Ja iti, ja yuntikil jumasa ja Levi: Guerson, Quehat Merari. Ja yuntikil ja Guersoni: Libni Simi. Ja yuntikil jumasa ja Quehati: Amram, Ishar, Hebron Uziel. Ja yuntikil ja Merari: Mahli Musi.

^22-24 Ja winik jumasa b'a smoj alijel ja Guersoni, ja b'a och ju'un b'a ek'elxa yuj ja jun ixawi, ay juke mil sok jo'e syen (7,500). Ja ma ma' niwan ya'tel yujile spetsanil ja kristyano jumasa yintil ja Guersoni, ja Eliasaf yunin ja Laeli. Spetsanile ja ye'nle'i, ti sk'u'lan ja snaje b'a stojol wax och ja k'ak'u b'a sts'e'el ja snajtsil tsomjeli,

²⁵ ye'n wa stalnaye ja snajtsil tsomjel sok ja niwan sk'u'utsili. Wax cho stalnaye ja ts'u'um potsan sok ja snajtsil tsomjeli, ja sk'u'utsil b'a wax ajyi ocheli,

²⁶ ja sk'u'utsil jumasa b'a stejnali b'a wax ajyi ocheli, sok ja b'a wax ajyi ochel b'a stejnal joyb'anub'al yuj ja snajtsil tsomjeli, sok b'a altari. Mi kechanuka: Cho ye'nani wa stalnaye ja yak'il ja k'u'uts jumasa b'a wax makuni.

^27-30 Ja smoj alijel jumasa ja Quehat, ja sb'aj ajyi ja Amram, Ishar, ja Hebron sok Uziel, ti sk'u'lan ja snaje b'a sts'e'el ko'el k'inal ja snajtsil tsomjeli. Ja yal keremtik b'a ek'elxa yuj ja jun ixawi, ay waxake mil sok wake syen (8,600). Ja ma' niwan ja ya'tel yujile'i, ja Elisafan yunin ja Uzieli.

³¹ Ja yintil jumasa ja Quehat, ye'n schol wa stalnaye ja skajonil strato sk'u'lunej ja Dyosi, ja smesa'il ja pan tsa'ub'al wax yila ja Dyosi, ja kandelerio, ja altar jumasa, ja snajtsil tsomjel b'a tsa'ub'ali, sok spetsanil ja jas wax makuni b'a kulto yuj ja Dyosi.

³² Ja ma' niwan ja ya'tel yuj spetsanil ja yintil jumasa ja Levi, sok spetsanil ja ma' wa stalnan ja snajtsil tsomjeli, ja Eleazar yunin ja pagre Aaroni.

^33-35 Ja yintil jumasa ja Merari, sb'aj ye'n ajyi ja Mahli, sok ja Musi, jaxa ye'nle'i, ti sk'u'lan ja snaje b'a sts'e'el k'e'el k'inal ja snajtsil tsomjeli. Ja yal keremtik b'a ek'elxa yuj ja jun ixawi, ay wake mil sok chab' syen (6,200). Ja ma' niwan ya'tel yujile'i, ja Suriel yunin ja Abihail.

^36-37 Ja yintil jumasa ja Merari, ye'n schol wa stalnaye ja ak'inte' jumasa b'a snajtsil tsomjeli, sok ja tuk te' jumasa jastal, poste, yip jumasa, poste jumasa b'a sjoyanal ja stejnali, sok ja yip jumasa, ja estaka jumasa, ja yak'il jumasa, sok spetsanili ja jas wax makuni b'a snajtsil tsomjeli.

³⁸ Ja Moisesi, ja Aaron sok ja yuntikil jumasa, ti sk'u'lan ja snaje b'a sts'e'el b'a stojol wax ja k'ak'u b'a sti' sat ja snajtsil tsomjeli, ye'n wa stalnaye ja snajtsil tsomjeli sok ye'n wax ya'teltaye ja israelenio. Ay k'a ma wa sk'u'lan jun a'tel b'a kechan jun pagre wax b'ob' sk'u'luk, ja winik jawi ojni chamuka.

³⁹ Ja Moises sok ja Aaroni, jach'ni sk'u'lane ja jastal alji yabye yuj ja Dyosa. Ch'ak yajtab'ane, sok ya'we och ju'un ja kristyano jumasa tey sok ja k'ole jumasa sb'a Levi, ja ma' ek'elxa yuj ja jun ixawi, ay jun tajb'e sok chab' mil (22,000).

Ja k'ole sb'a Levi, yuj tsa'ub'ale sb'a Dyos

⁴⁰ Ja Dyosi, yal yab' ja Moisesi: —Ajtab'en spetsanil ja sb'ajtanil yal yuntikil ja israelenio jumasa b'a ek'elxa yuj ja jun ixawi. A och ju'un ja sb'i'ile'i,

⁴¹ kechan pilaki ja yintil jumasa ja Levi, ja'xa wa'ki b'a slok'ol ja sb'ajtanil yuntikil jumasa ja israelenio, cho pilaki ja swakax jumasa ja k'ole sb'a Levi, ja'xa wa'ki b'a slok'ol ja sb'ajtanil yal swakax ja israelenio. Ke'n Dyoson yuj ja israelenio—.

⁴² Ja jastal yala ja Dyos oj sk'u'luk ja Moisesi, jach'ni sk'u'lana, b'a jujune na'its ch'ak ya och ju'un ja sb'ajtanil yal kerem manxi yuj ja israelenio jumasa.

⁴³ Ja spetsanili, ay jun tajb'e chab' mil sok chab' syen ox tajb'e sok ox lajune (22,273).

⁴⁴ Tsa'an ja Dyosi, yal yab' ja Moisesi:

^45-48 —Ja yintil jumasa ja Levi, jb'aj ke'na, ye'n ochye kan slok'olil ja sb'ajtanil yuntikil jumasa ja israelenio. Cho jach'ni ja swakax ye'nle'i, cho jb'aj ke'na, ja' slok'ol ja swakax ja swinkil ja chonab'il. Yuj ja jel jitsan ja yuntikile yal kerem ja israelenio jaxa yintil jumasa ja Levi jel ko'el, ja'yuj oj b'ob' eluk ja janek' ek'eli. B'a oj b'ob' a'xi eluki, oj k'anxuk yi'e jo'e sat sakal tak'in, b'a ay yi'oj juluche gramos ja yalali. Yujni jach' sb'ej jastal jaw ja limosna wax yamxi b'a snajtsil tsomjeli. Ja tak'in jawi ja oj yi' ja Aaron sok ja yuntikil jumasa. Ke'n Dyoson yuj ja israelenio—.

⁴⁹ Ja Moisesi, yi'aj ja tak'in janek' ya'awe ja israelenio, yuj ja lom jel jitsan ja ye'nle'i,

⁵⁰ yi'aj jun mil oxe syen sok ox tajb'e jo'e (1,365) sat sakal tak'in, ja'ni jastal wax a'xi ja limosna b'a snajtsil tsomjeli.

⁵¹ Ja tak'in jawi, ye'n yi'aj b'a sk'ab' ja Aaron sok ja yintil jumasa, jach'ni jastal yalunej ja Dyosi.