Levitico 2 - Ja yab'al ja Dyosi

Ja smajtan jumasa ja Dyosi

¹ Ta ayk'a ma' sat te' oj ya'ki ja jmajtani, t'ilan ja' oj yi'jan ki ja lekil arina. B'a sat ja arina oj pek'xukyi aceite, oj cho a'xi ochyi t'un pom;

² ti oj a'xuk yi ja pagre jumasa. Jaxa ye'nle'i oj yi'e jun b'eche arina sok aceite, sok spetsanil ja pomi, ti oj stsik e' b'a sat ja b'a wax a'xi kajan ja jmajtani, b'a jach' oj jak a k'ujolex yuj ja ke'n wax ka'wi'ex spetsanil ja jastik jumasa. Ja iti jun majtanal b'a jex ajb'ani yik'il wax kab'i, jach' wax ya'weki yuj ja jel wa stoyowone'i.

³ Jaxa janek' kan ja majtanal it tsa'ub'ali, kechan ye'n oj b'ob' yabye ja pagre jumasa.

⁴ —Ay k'a ma' pan ma gayeta oj ya'ki b'a jmajtani, ja arina b'a oj och sb'aji t'ilan ja b'a leki. Ja pan sok ja gayeta oj ta'juk mi sok levadura'uk; ja pani, t'ilan oj wots'xuk lek sok aceite, jaxa gayeta kechan oj b'atsxuk yi aceite.

⁵ —Ay k'a ma oj ya'ki tsuyub'al sat te', ja arina oj och sb'aji t'ilan wots'ob'al lek sok aceite mi oj och levadura.

⁶ Cho t'ilan oj ch'ak skup xe'ntiyaman, oj spek' yi aceite. Ja iti jun majtanal b'a toj sat te'.

⁷ —Ay k'a ma oj ya'ki ts'anub'al sat te', ja arina oj och sb'aji t'ilan ja b'a leki, sok wots'ob'al lek sok aceite.

⁸ —Chikan ma wa sk'ana oj ya'ki ja majtanal jumasa iti, t'ilan ja oj yi'och yi ja pagre, ye'nxa ja pagre oj yi'och b'a wax a'xi kajan ja jmajtani.

⁹ Jaxa pagre, snalan ti oj stsik tiwi, b'a ti oj jak a k'ujolex yuj ja ke'n wax ka'wi'ex spetsanil ja jastik jumasa. Ja iti, jun majtanal b'a jex ajb'ani yik'il wax kab'i, jach' wax ya'weki yuj ja jel wa stoyowone'i.

¹⁰ Jaxa janek' oj kanuk ja majtanal jawi, yujni tsa'ub'ala, kechan ye'n oj b'ob' yab' ja pagre jumasa.

¹¹ —Ja majtanal jumasa waxa wa'wex ki'i mok a wa'wex ochyi chab' mini levadura, sok ja jaw jumasa oj b'ob' pajb'uk ja majtanal jumasa.

¹² Oj b'ob' a wa'wex ki ja chab'i ma ja levadura ja' sok ja sb'ajtanil sat wa jastik a b'ajexi, kechan mi sb'a oj tsikxuk jastal ja jmajtan b'a jtoyjeli.

¹³ —Spetsanil ja jmajtan oj ja wa'wex ki'i, oj b'ob' a wa'wex och yats'mil, yuj ja ats'ami wax makuni jastal jun senya ja k'ak'u a chapa wex moki.

¹⁴ —Ay k'a ma oj ya'ki b'a jmajtan ja sb'ajtanil sat tek'ul jumasa wax ya el b'a lu'umi, t'ilan oj ja k'il'ex ja sat trigo b'a oj ja wa'wex ki'i, ma ja arina, ma ja sat te' b'a ajk'achto lek eleli.

¹⁵ B'a sat ja majtanal jumasa jawi, pek'awik yi aceite, cho a'wik ochyi t'un pom.

¹⁶ —Ja pagre, snalan ti oj stsik b'a wax axi kajan ja majtanal jawi, b'a ti oj jak a k'ujolex yuj ja ke'n wax ka' wi'ex spetsanil ja jastik jumasa.