Ester 9 - Ja yab'al ja Dyosi

Elye slekil ja judio jumasa

¹ B'a yajtab' ox lajune ja yixawil Adar, jas ma k'ak'u oj k'ot smeranil ja jas yalunej b'a oj sch'ay sna'jel ja judio jumasa ja mandaranumi. Jasa tuk ja jastal ek'i, ja k'ak'u jaw ja judio jumasa ye'n yilawe sk'ujol ja ma'tik mi lek xyila sb'aje soki.

² B'a spetsanil ja chonab' jumasa b'a wa'n a'tel ja Asuero, ti stsomo sb'aje b'a jujune ja schonab'ile'i, chapan aye b'a oj tiro'anuke sok ja ma' oj le'juke yuji, jasa, mini jun ma' b'ob' sk'u'luka, ja ya'n spetsanile jel wax xiwye'a.

³ Mi kechanuka, yuj ja wax xiwye yuj ja Mardoqueo ja'yuj skoltane' ja judio jumasa.

⁴ Ja ye'n ja ya'n jel niwan ja ya'tel b'a wa'n a'teli. Ja Mardoqueo jel niwan wax ilji b'a spetsanil ja chonab' jumasa, b'a jujune k'ak'u wa'n lek sta'jel yip.

⁵ Ja judio jumasa sok machit sch'ak smil'e spetsanil ja ma'tik mi lek xyila sb'aje soki.

⁶ Jach'ni b'a chonab' Susa smilawe jo'e syen (500) winike.

^7-10 Tey tiw ja lajune (10) yuntikil ja Amani, ja sb'i'ile' ja iti, Parsandata, Dalfon, Aspata, Porata, Adalias, Aridata, Parmasta, Arisai, Aridai, sok Vaizata. Kechan mi syamawe' yi' ja jastik sb'aje'i.

¹¹ Ja junxta k'ak'u jawi yalwe yab' ja mandaranum jaye cham winik ajyi b'a Susa.

¹² Ja'yuj ja mandaranumi, yal yab' ja ixawalal Esteri: —Ja b'a chonab' Susa ja judio jumasa smilawe'ta jo'e syen (500) winik, ti cham tiw slajunil ja yuntikil ja Amani. —Lom jas oj ek' jk'ujoltik ja tuk chonab' jumasa, jach'ni cho sk'u'luneje'a— ¿Jaxa ya'n ay ma jas tuk waxa k'ana? K'anaki ja jas waxa k'ana ja ke'n ojni kawi'a.

¹³ Ti yala ja Esteri: —Ta yuj k'a lekxa wila niwan mandaranum jach'ni ja jecheli, mok a tim ja oj sch'ak e' sna'jel ja ma'tik mi lek xyila sb'aje sok ja judio jumasa b'a Susa, cho jach'ni ja sb'ak'tele ja lajune yuntikil ja Amani tix iljiye b'a oj k'e'uke lokani.

¹⁴ Ja mandaranumi, yala a sk'u'luke jachuk. Jaxa ju'un b'a wax yala jas oj ek'uki, cho a'jiyi ja chonab' Susa.

¹⁵ Jaxa judio jumasa ma' ti ajyiye' b'a Susa, stsomo sb'aje' b'a chan lajune yajtab' ja ixaw Adari, smilawe b'a Susa oxe syen (300) winik, mi yi'aje yi ja jastik sb'aje'i.

^16-17 Jaxa tuk judio jumasa ma' teye b'a tuk schonab'il ja mandaranumi, stsomo sb'aje' b'a ox lajune yajtab' ja yixawil Adar b'a oj skolta sb'aje' yuj ja ma' mi lek xyila sb'aje soki. Ja k'ak'u jawi, smilawe ox tajb'e jo' lajune mil (75,000). Mi yi'aje yi' ja jastik sb'aje'i. B'a yajtab' chan lajune (14) jijliye sk'u'lane' k'in yuj ja smilawe ja ma' mi lek yila sb'aje soki.

¹⁸ Jaxa judio jumasa ma' ti ajyiye' b'a Susa stsomo sb'aje' ja k'ak'u ox lajune (13) sok b'a chan lajune (14) yajtab' ja junxta ixawi, jaxa b'a jo' lajune'i jijliye', sk'ak'u'il wa'el yujile', sok jel tsamal aye'.

¹⁹ Ja'yuj ja judio jumasa ma' ti kulane b'a ch'in chonab' jumasa, stsa'awe ja chan lajune yajtab' ja yixawil Adari, sk'ak'u'il k'in yujile', ja k'ak'u jawi ay jas wa sk'eb'a sb'aje'.

K'in Purim

²⁰ Ja Mardoqueo yala, ab'i ts'ijb'axuk ja jastik ch'akta ek'uki, cho sjeka yi' ju'un spetsanil ja judio jumasa ma'tik ti ajyiye' b'a chonab' jumasa sb'a Asuero, mojan ma najat aye'.

²¹ Yala a stalnaye ja k'ak'u chan lajune yajtab' ja yixawil Adari sok b'a jo' lajune'i, jach' oj sk'u'luke b'a jujune jab'il.

²² B'a ti oj na'xuk ja ixaw sok ja k'ak'u sta'a skoltajele sok ja jastal ch'ay sna'jel ja ma'tik mi lek xyila sb'aje sok ja judio jumasa, ja swokole'i, ja scham k'ujole'i, paxel stsamalil. Ja k'ak'u jumasa jawi, sk'ak'u'il k'in yujile ay jas wa sk'eb'tala'an sb'aje' wax cho skoltaye ja ma' jel ajula sb'aji.

²³ Ja judio jumasa yala oj sk'u'luke ja jas yala ja Mardoqueo ja'ni jastal stuluwe' ta yi'i.

²⁴ Ja Aman ma' mi lek xyila sb'aj sok ja judio jumasa, och schap sb'aj jastal oj sch'ay sna'jel ja ye'nle'i. Sk'elawe ja sk'ak'u oj ko' sb'aj b'a jach' oj sna'e ja sk'ak'u'il oj ch'ak smile'.

²⁵ Jaxa ixawalal Esteri, ti jak b'a sti' sat ja mandaranumi, jaxa ye'n yala jach' ts'ijb'anub'al, yuj ja tan Amani, ab'i stup yuj jas mi schapa oj sk'u'luki, yala yuj ja Aman sok ja yuntikili ab'i ch'ak a'ji eluke jorka.

^26-27 Ja'yuj ja k'ak'u jumasa jawi, wax na'xi sk'ak'u'il k'in Purim, jach' wax alxi yuj ja —pur— jaxa pur wa sk'ana yal —swerte—. Ja' judio jumasa yala oj sk'u'luke ja k'in jaw yuj spetsanil ja jas ts'ijb'anub'al b'a ju'un sb'a Mardoqueo, cho ja'ni yuj spetsanil ja jastik ch'ak ek'uki. Cho yalawe b'a spetsanil jab'il mi oj ya'we ek' b'a mi oj sk'u'luke, jachuk ja ye'nle'i, ja yuntikile'i, ja yije jumasa, t'ilani lek oj sk'u'luke k'in ja chab' k'ak'u jaw yuj ja jastal kanel ts'ijb'anub'ali. Cho jach'ni, jel t'ilan oj sk'u'luke ja k'in it ja ma' ojto manxuk a wujilex tsa'ani, sok spetsanil ja ma' oj waj sta'ex ja b'a'yexi.

²⁸ Mini jun judio oj ch'ay sk'ujol b'a mi oj sk'u'luk ja k'in Purim. B'a spetsanil ja ch'in chonab' jumasa jel t'ilan mi oj ch'ay sk'ujole b'a oj sna'e ja k'ak'u jumasa iti.

^29-30 Ja'yuj ja ixawalal Ester sok ja Mardoqueo sts'ijb'aye ja schab'il ju'uni lek sok tsamal, ja' b'a oj na'xuk lek ja yajtab' oj k'u'laxuk ja k'in iti, Ch'ak sjek e' b'a spetsanil ja judio jumasa ma'tik ti aye b'a jun syen jun tajb'e juke (127) estados sb'aj ja mandaranum Asuero.

³¹ Ja b'a ju'un jaw ja Ester sok ja Mardoqueo yalawe b'a spetsanil ja judio jumasa sok ja yintile jumasa jel t'ilan oj sk'u'luke ja k'in b'a yajtab' jumasa na'xeli, jach'ni jastal k'ajyel wa sk'u'lan ja ye'nle'i. Cho yalawe b'a ju'un jaw jastal skomo ja swa'ele b'a ti oj sna'e jastal meb'a ok' ye'i.

³² Ye'n yala ja ixawalal Ester jastal oj k'u'laxuk ja k'in Purim, ja jastik yala ti ts'ijb'axi b'a jun ju'un.