Ester 8 - Ja yab'al ja Dyosi

Ja Esteri, sk'ana yi ja smandaranum yuj ja judio jumasa

¹ Ja k'ak'u jaw ja mandaranum Asuero sk'eb'a yi' ja ixawalal Ester ja snaj ajyi ja Aman ma' mi lek xyila sb'aj sok Ja judio jumasa. Jaxa Mardoqueo ti jak b'a sti sat ja mandaranum yuj ja yalata ja Ester yuj smoj alijel sb'aje'i.

² Ya' el ja yaniyo ja mandaranum it sjapa yi ja Amani, ja ya' yi' ja Mardoqueo. Jaxa Esteri ya' yi' b'a sk'ab' ja Mardoqueo ja jastik sb'aj ajyi ja Amani.

³ Ja Esteri ko' mek'an b'a sti' sat ja mandaranumi, waj sk'umuk b'a sti sat ja mandaranumi, ti sk'an yi' ts'akatal jun majke smoj ab'i sle' jastal mi oj ya sk'u'luk yuj ja jas wa'n schapjel ja Aman b'a oj sch'ay sna'jel ja judio jumasa.

⁴ Jaxa mandaranumi ti sje'a yi' ja Ester ja snajb'ante' it toj k'anal tak'ini.

⁵ Jaxa Esteri ti stulu sb'aja, k'e tek'an b'a sti sat ja mandaranumi. Ti yala ja Esteri: —Ta lek k'a waxa wab' niwan mandaranum, cho wan k'ax ta'a jkoltajel b'a sti wa sati, yuj k'a wala makuniyon awuj, ala a ts'ijb'axuk b'a oj ch'ayuk ja ju'un it schapunej ajyi ja Aman, ja jastal sts'ijb'an b'a sch'ayelal ja judio jumasa.

⁶ ¿Jastal oj b'ob' kil ja ke'n jas swokol oj ajuk yi' ja jmoj jumasa b'a? ¿Jastal oj b'ob' kil ja sch'ayelal ja jmoj alijel jumasa b'a?

⁷ Ja mandaranum Asuero ti yal yab' ja ixawalal Ester sok ja judio Mardoqueo: —It b'ayona, ke'n ka' yi' ja Ester ja jastik sb'aj ja Aman ajyi, jaxa ye'n a'jita k'e lokan te', a'nima ya' k'e'uk ja sk'ab' yuj ja mini t'un lek wax yila sb'aj sok ja judio jumasa.

⁸ Ts'ijb'ayik we'nlex ja jastal lek waxa wabyex b'a slekil ja judio jumasa, awik och yi ja' seyo ke'n. B'a jach' mi ma' oj b'ob' sk'ok ja ab'al ts'ijb'anub'al sok ochel ja seyo b'a jb'i'il ke'n.

⁹ Ja Ester sok ja Mardoqueo ti spayawe ja ts'ijb'anum jumasa jaxa ye'nle'i, ja sts'ijb'aye spetsanil ja jas alji yabye yuj ja Mardoqueo b'a slekil ja judio jumasa. Ja k'ak'u jawi waj b'a yajtab' jun tajb'e oxe (23) b'a yixawil Sivan. Ja ab'al iti, ch'ak jek juk yi'e spetsanil ja mandaranum jumasa, sok ja ma'tik niwak ya'tele b'a India sok man Etiopia. Ay jun syen jun tajb'e sok juke chonab' (127), b'a jujune chonab' jach'ni ts'ijb'axi ja jastal wax k'umaniye'a, cho jach'ni ja b'a judio jumasa.

¹⁰ Ja ju'un jumasa ja ts'ijb'axi b'a sb'i'il ja mandaranumi, sk'u'laji seyar sok ja yaniyo. Ch'ak jek juk sok ja jekab'anum jumasa. Kajan kawu wajye' jel juts'in b'ejyiye.

Ja ab'al b'a oj koltajuk yuj ja judio jumasa

¹¹ Ja ju'uni wax alji yab' ja judio jumasa ab'i stsom sb'aje spetsanil ja swinkil ja chonab' jumasa b'a jach' oj b'ob' skolta sb'aje b'a oj smil'e sok b'a oj sch'ay'e sna'jel spetsanil ja ma'tik oj nol k'ab'ijuk yujile'i, mi ma' yochel b'a jakele'a, mini t'un oj skisjuk ja ixuke sok ja yal untik jumasa.

¹² Ja ab'al iti, oj k'ot smeranil b'a spetsanil ja chonab' jumasa, ja junxta k'ak'u b'a ox lajune yajtab' ja yixawil Adar.

¹³ Ja skopia'il ja ab'ali, oj ch'ak pukxuk b'a spetsanil ja chonab' jumasa, ja k'ak'u jaw ja judio jumasa chapan oj ajyuke b'a oj ya'we stup ja ma'tik mi lek xyila sb'aje soki.

¹⁴ Ja ma' waj ya' kan ek' ja ju'uni, kajan kawu wajye', ajnel, jel juts'in jel juts'in pukxi ja jas yala ja mandaranumi. Jaxa ab'al iti jekji yi' ja niwan chonab' Susa ja'ni schonab'il ja mandaranumi.

¹⁵ Ti el ja Mardoqueo b'a sti sat ja mandaranumi sok ja sk'u jastal wa slapa ja mandaranumi, k'ik' mukuk sok sak ja yelawi, sok jun korona lijpixta, sok jun k'u'uts b'a jel lek ch'aktik ja yelawi. Ja swinkil ja Susa jel tsamal yilawe.

¹⁶ Jaxa judio jumasa lajan sok jamxi yilawe' ja satk'inal yuj ja jel tsamal aye'i, jel wa stoyowe.

¹⁷ B'a spetsanil ja chonab' jumasa b'a k'ot ja yab'al ja mandaranumi, jel tsamal yilawe. Ja judio jumasa sk'u'lane' k'in ya'we yi' swa'elalil. Jex likiki yabye sok jel jitsan ja swinkil ja chonab' jumasa, ek' ye' judio'il, ja jastal jel wa xiwye' ajyi ja judio jumasa. Ja ye'nle'i ch'akni ko' sb'aje'a.