Ester 7 - Ja yab'al ja Dyosi

Ja Esteri, sk'apa pilan wa'el

¹ Ja mandaranum Asuero sok ja Amani wajye b'a wa'el it k'apji yi'e yuj ja ixawalal Esteri.

² Yajni ti wa'ne yu'jel ja yalel ts'usub' ja mandaranumi, ti cho sjob'o yi' ja Esteri: —¿Ala kab' jasunk'a waxa k'ana ixawalal Ester? A'nima ja'uk snalan b'a wa'non a'teli, oj ka'wi, ta yuj k'a ja' waxa k'ana.

³ Ti yala ja Esteri: —Niwan mandaranum yuj k'a meran ja waxa k'anawoni, cho yuj k'a lek waxa wab'i, yuj wax k'ana wi' sak'aniltikon sok spetsanil ja jmoj jumasa.

⁴ Ja ya'n chonob'alaxa ja jsak'aniltikoni, wa sk'anawe oj ch'ay'e jna'jeltikon. Ja' lek yuj chonob'alukotikon b'a oj ochkotikon yib' k'ab'ali mi jas oj kale, jas lom oj waj josjonukon sok ja mandaranum b'a ja jas mey sb'eji.

⁵ Ti sjob'o ja mandaranum Asuero: —¿Machunk'a wa sk'ana oj sk'u'luk ja jastal it b'a? ¿B'a'a ya?

⁶ Jaxa Esteri ti sch'utu ja Amani, ti yala'a: —Ja ma' mi lek wax yilawotikoni ja tan Amani. Yajni yab' ja jastal it ja Amani, ti tsatsb'i kan yuj ja xiweli.

⁷ Jaxa mandaranum Asuero ti stulu sb'aj ja b'a kulan ek'i, tajkel lek, ti och b'a yoj maka b'a waj ya' kulan t'un sk'ujol. Yajni yila ja Aman yujni oj miljuka, ti kan sok ja ixawalal Ester b'a k'an sk'an yi' ts'akatal a koltajuk.

Ja Amani a'ji el jorka ti chama

^8-9 Yajni kumxi ja mandaranum b'a yoj maka och ja b'a yoj na'itsi, waj yile ti tek'an ek' mojan ja Aman sok ja ixawalal Esteri. Ti yala ja mandaranumi: —Ja'xtani wax majla ja it. B'a ti jsat oj ja wixtala'uk ja jche'um b'a yoj jnaji—. Yajni yabye ja talnanum jumasa ja yawanel ja mandaranumi, ti ochye'a, smakawe yi' ja sat ja Amani. June ja talnanum jumasa, sb'i'il Harbona, ti yala'a: Ja b'a snaj ja Amani, ay tsa'apub'al jun te' b'a ay set ja scha'anili, jun tajb'e sok chab' (22) metro, ye'n stojb'esnej b'a ti oj sch'ay sna'jel tiw ja judio Mardoqueo ja ma' it skolta ja niwan mandaranumi.

¹⁰ Jaxa mandaranumi, ti'xa yala'a: —A'wik k'e lokan ye'n ja Aman b'a te' jawi: Ja talnanum jumasa, ti ya'we k'e' lokan ja Aman ja b'a te' stojb'es b'a ti oj smil ajyi ja Mardoqueo, jachuk ti kujlaji sk'ujol ja mandaranumi.