Ester 2 - Ja yab'al ja Dyosi

Ja Asuero sle'a yajk'achil ixawalal

¹ Tsa'an yajni ek' ja stajel ja mandaranum Asuero, ti' jak sk'ujol ja jas sk'u'lan ja Vasti sok ja jas mi lek yala sb'aji.

^2-4 Jaxa ma'tik wa sna'awe stojel lo'ili, ti yalwe yab' ja mandaranumi: —Niwan mandaranum jel t'ilan oj ja t'oj ma' oj waj b'a spetsanil ja chonab' jumasa b'a oj waj sle'e jan ak'ixuk b'a tsamalik sok b'a mito nupaneluk. Ja ak'ixuk jumasa jawi, t'ilan ti oj i'xuk och b'a snajtsil wax ajyi ja ixuke b'a niwan na'itsi. Jaxa tiwi, ye'nxa wax yi'aj kan b'a sk'ab' ja Hegai oj stalna, ja' winik jaw ja niwan lek sk'ujol wa stalna ja ixuke jumasa, ye'n wax ya'a yi ya'n b'a oj tsamalb'uke. Tsa'an ye'n oj stsa' ja mandaranum ja ak'ix b'a oj yil tsamali, sok ye'n oj st'oj ixawalalil b'a slok'ol ja Vasti. Ja iti jel lek yab' ja mandaranumi, sok jach'ni b'ob'a.

Ja Esteri, k'ot b'a niwan na'itsi

⁵ Ja chonab' b'a Susa ajyi jun winik judio ja tey sok ja k'ole sb'a Benjamini, Mardoqueo sb'i'il, ja yunin ja Jair, ja stat awel jumasa ja Simi, sok ja Quisi.

⁶ Jaxa winik jawi, ja it ma i'ji ye och b'a Jerusalen sok ja Jeconias mandaranum b'a Juda yuj ja Nabucodonosor mandaranum b'a Babilonia, ja yajni yib' k'ab'al aye' b'a chonab' jawi.

⁷ Ja Mordoqueo ye'n ya' k'i'uk ja smoj alijel Esteri, yujni meb'a ja ye'na. Yajni cham ja snan stati, ja Mardoqueo jach' yila jastal yunin. Jaxa Esteri jel tsamal.

⁸ Yajni pukxi ek' ja yab'al ya'a ja mandaranumi, jitsan ak'ixuk i'ji ye och b'a niwan na'its ye'nxa talnaji ye yuj ja Hegai. B'a janek' aye' ja ak'ixuk jumasa jawi, tey ja Esteri.

⁹ Jaxa Hegai, jel lek yila ja jastal ja ak'ix jawi, ja'yuj jel ya'we tsamalb'uk, ya'we yi lekil swa'el. Cho stsa'awe juke ak'ixuk b'a oj stojb'ese lek ja Esteri, b'a oj cho ya'we yi jun tsamal na'its b'a wax ajyi ja ak'ixuk jumasa.

¹⁰ Ja Esteri mix yala b'a sb'aj ja, cho minix yala ma' smoj alijel sb'aj soka yujni jach' alub'al yab' yuj ja Mardoqueo'a.

¹¹ Ja Mardoqueo spetsanil k'ak'u ti wax paxyalani ek' b'a sti' ja snaj ja ixuke'i, jani b'a oj sna' jastal wan ek'el yuj ja Esteri, sok jastal ma wax ilji.

¹² Yajni k'ot ja k'ak'u oj ek'uke jujune ja ak'ixuk jumasa b'a sti sat ja mandaranum Asuero, tsa'an yajni ayxa lajchawe (12) ixaw ti aye'i, yujni jach' ay ja ab'al sb'a ixuke'a, t'ilani oj sts'iktese' ja k'ak'u oj stojb'es sb'aje'a wake (6) ixaw oj ajyuke sok yik'il mirra, sok wake (6) ixaw oj sjax sb'aje' perjume b'ax ajb'ani yik'il oj ajyuke, oj ya'we och yajnal ja sate' b'a oj tsamalb'uke'i.

¹³ Ja ak'ix ma' wax waj b'a sti' sat ja mandaranum b'a niwan na'itsi, ja wax a'ji slap ja sk'u' sjuna'e b'a leki, ye' wax a'ji stsa' ja yuje b'a na'its b'a'ye ja ak'ixuk jumasa.

¹⁴ Ja ak'ix ma' wax waj b'a niwan na'itsi, toj b'a och k'ak'u jaxa b'a sakb'el b'a pilan k'ak'u wax elye ti wax wajye b'a snaj ja ixuke jumasa, ja'ni wax talnajiye yuj ja Saasgaz cho pilan winik ay sniwanil sk'ujol sok ja mandaranumi, ya'tijum ja mandaranumi. Kechan wax waj sje' sb'aje b'a sti' sat ja mandaranum ta yuj k'a ye'n wa sk'ana sok sb'i'il wa sjeka spayjel.

Ja Esteri, tsaji sb'a ixawalalil

^15-16 Ja stat ja Esteri sb'i'il Abihail jaxa Mardoqueo statjun kechani ye'n jel tsamal ilji ja b'a niwan na'itsa, yajni elk'ot ja schol ye'n oj ek' och b'a sti' sat ja mandaranumi, ja slapa och ja sk'u' sjuna it alji yab' yuj ja Hegai. Ja k'ak'u iti, ja'ni ja yixawil Tebet, b'a sjukil jab'il wa'n a'tel ja mandaranum Asuero.

¹⁷ Ja mandaranumi, ja je syajta ja Ester yuj spetsanil ja tuk ak'ixuk jumasa, ye'n sta'a skoltajel sok jel lek ilji, yuj ja tuk ak'ixuk jumasa, ya' slap ja skorona ja mandaranumi sok a'ji och ixawalalil b'a slok'ol ja Vasti.

¹⁸ Tsa'an ja mandaranumi, schapa jun niwan wa'el b'a spetsanil ja ma'tik ay ya'tel sok ja ma'tik yib' k'ab'al ayi. Jani yuj ja Esteri, ya' ko' sts'akol spetsanil ja jastik b'a tuktukil chonab'i. Sk'eb'a yi' jitsan jastik, yujni jach' k'ajyel wa sk'u'lan ja mandaranuma.

Wa'n chapjel yab'alil ja mandaranumi

^19-20 Ja Esteri, man sch'inil wa sk'u'an yab'al ja Mardoqueo jach'ni wa sk'u'lana mi sch'aya sk'ujol. Mi ma' sna'a ma' smoj alijel cho mini ma' alintaji yuj. Yujni jach' alub'al yab' yuj ja Mardoqueo mi oj yala. Jun k'ak'u yajni wa'n stsomjel sb'aj ja ak'ixuk jumasa b'a na'its wax ajyi ja ixuke jumasa, ja Mardoqueo ti waj kulan b'a wax ajyi ochel b'a niwan na'its yuj ja mandaranumi.

²¹ Ti smakla slo'il chab' ya'tijum ja mandaranum ja ma' wa stalnaye b'a wax ajyi ochel b'a niwan na'itsi. Ja sb'i'ile ja iti, Bigtan sok Teres jel wa staklaye ja mandaranumi, wa'ne schapjel jastal oj smil'e.

²² Yajni yab' ja Mardoqueo ja jastal iti, waj yal yab' ja ixawalal Esteri, jaxa Esteri cho yal yab' ja mandaranumi.

²³ Ti och sk'ele' jastal ay ja lo'il iti, sok el ni smeranila, ja'yuj schab'il ja winike iti, a'ji k'e'uke lokan te' ti ts'otji ja snuke'a. B'a sti sat ja mandaranumi, ts'ijb'aji spetsanil ja jas ek' b'a schonab'ili.