Efesios 2 - Ja yab'al ja Dyosi

Ja Dyosi, wax ya'a jsak'aniltik

¹ Ja we'nlex ja mas b'ajtani, lajan sok chamel ayex sb'a ti sat ja Dyosi, kechan ja wajel a k'ujolex sle'jel wa mulexi;

² Ja' waxa nochowex ja jastale ja swinkil ja lu'um iti, sok ja waxa k'u'anex ja yip ja ma' ik' ason ay ek'i, ja ye'nle'i, ja wax ya'teltaye ja ma' mini jun sb'ej ja jas wa sk'u'lane'i, wa sk'okowe ja ma' mi wa sk'u'an ja Dyosi.

³ Ja b'ajtan ja ke'ntiki jach'ni wax k'u'lantik jastal jawa, ja wax k'u'lantik ja jas mi sb'ejuk wa sk'ana ja jkwerpotik sok ja jk'ujoltiki. —Ja'yuj ay lek sb'ej ja oj ya jtuptik ajyi ja Dyos jastal ja tuk jumasa.

⁴ Jaxa Dyosi, jel lek, sok jel niwan ja syajal sk'ujol jmoktiki.

⁵ Ja'yuj, a'nima chamelukotik ajyi yuj ja jmultiki, jaxa Dyosi ya'a jsak'aniltik ja yajni ya sak'wuk ja Kajwaltik Jesusi. Sts'akatal ja syajal sk'ujol ja Dyosi, ja'yuj jta'a jkoltajeltik.

⁶ Ja Dyosi, yajni ya sak'wuk ja Kajwaltik Jesusi, cho jach'ni ja ke'ntiki ya sak'wukotik, cho ya'ki'tik jun lugar ja b'a satk'inali, b'a ti oj ajyukotik lajan sok ja ye'ni.

⁷ Yuj ja jach' sk'u'lani, ja' b'a oj sje' ja tsa'ani, ja slekil sok jastal jel niwan ja syajal sk'ujol it jastal sje'aki'tik yuj ja Kajwaltik Jesusi.

⁸ Ja we'nlexi, jkoltayexta yuj ja a k'u'anex ja syajal sk'ujol ja Dyosi. Mini jun ma stupu'a, toj k'eb'ub'al ya' wi'ex ja Dyosi.

⁹ Jawa koltajel a ta'awexi, mi ja'uk yuj ja jel lek ja jas a k'u'lanexi. Ja'yuj mi ma oj b'ob' stoy sb'aj.

¹⁰ Ja ke'ntiki, ye'n sk'u'lunejotik ja Dyos b'a ti oj ajyukotik sok ja Kajwaltik Jesusi, sk'u'lanotik b'a oj jk'u'luktik ja b'a leki, man b'ajtan yujni jach' yalunej oj sk'u'luk ja Dyosi.

Ja Kajwaltik Jesusi, wa stsomowotik jpetsaniltik

^11-12 Ja judio jumasa jach' wax yala a b'ajex jastal iti —Ja ma'tik mi kupub'aluk ja sk'unili—, jaxa ye'nle'i jach' wax cho yala sb'aje jastal iti —Ja ma'tik kupub'al ja sk'unile'i, yujni ja' wax kupji ja sb'aktele'a. Jaxa we'nlex ma' mi judio'ukexi, jel t'ilan oj jul a k'ujolex ja jastal mixa k'u'anex ajyi ja Kajwaltik Jesusi, cho mini israelenio ukex. Mini cho ti ayukex sok ja strato ya'a ja Dyos sok ja yuntikili. Ti ayex ja b'a lu'um iti, mey sniwanil a k'ujolex mixa k'u'anex ja Dyosi.

¹³ Jaxa ya'n ja we'nlex ja ma'tik najat a wi'ojex ajyi ja Dyosi, mojxi yexta jan sok, lajanxa ayex sok ja Kajwaltik Jesús yuj ja ti cham b'a Cruzi.

¹⁴ Ja Kajwaltik Jesusi ya'awotikta laman. Yuj ja ye'n cham b'a Cruz yuj ja ke'ntiki, ja Kajwaltik Jesusi, sch'ayata spetsanil ja jastal jex takla jb'ajtik ajyi, ja jastal mix b'ob' sta sb'aj ja ma judio sok ja ma' mi judio'uki, b'a schab'il tsome ya' sta sb'aj june ita.

¹⁵ Ja Kajwaltik Jesusi, ya'tani k'ot stik'anal ja jastal wax ya'wotik yib' k'ab'al ajyi ja mandar it a'jiyi ja Moisesi, yuj ja ye'n b'a schab'il tsome yuntikili, ya' sta sb'aje ya yil sb'aje lek.

¹⁶ Yuj ja cham b'a Cruz ja Kajwaltik Jesusi, ja'yuj ya'ta k'ot stik'anal ja jastal je stakla sb'aje ajyi ja chab' stsome yuntikili, sok ya ta sta' sb'aje b'a laman oj ajyuke sok ja Dyosi.

¹⁷ Jak ja Kajwaltik Jesusi, ja jak yal ja tsamal ab'al b'a laman oj ajyukotik jpetsaniltik jastal ja we'nlex mi judio'ukex najat a wi'ojex ajyi ja Dyosi, cho jach'ni ja we'nlex ja ma judio'exi, mojan a wi'ojex ja ye'ni.

¹⁸ Yuj ja jas k'u'lan ja Kajwaltik Jesusi, ja'yuj a'nima judio ma mi judio'uk, junxta ja Espiritu ki'ojtiki, sok ojxa b'ob' mojxukotik sok ja Dyos Tatali.

¹⁹ Ja'yuj ja we'nlex ja b'a sti sat ja Dyos Tatali, mixa tuk chonab'uk jakelex. Ja ya'ni, yuntikilexa, sok spetsanil ja kosa jumasa a b'ajexani yuj ja yuntikilexa ja Dyosi.

²⁰ Spetsanil ja yuntikil ja Dyosi, lajanex sok jastal jun na'its, ja jawi ja tojb'el sok ja jastal sje'awi'ex ja sjekab'anum jumasa sok ja aluman Dyos jumasa. Ja b'a na'its jawi, ye'n ja Kajwaltik Jesús ja ton jaw jel niwan makuni.

²¹ Ye'nani ja ma toj lek tek'an yuj spetsanil ja na'its jawi, sok ye'n wax cho ya k'i'uk, man oj b'ob' stojb'es jastal jun snajtsil tsomjel b'a kechan ye'n sb'aj ja Kajwaltiki.

²² Yuj ja a k'u'anexta ja Kajwaltik Jesusi, ja'yuj tixa ayex ja we'nlex b'a na'its jawi, ja'ni b'a wax ajyi ja Dyos sok ja Yespiritu.