Daniel 9 - Ja yab'al ja Dyosi

Ja Danieli sk'anayi ja Dyos yuj ja kristyano jumasa

^1-4 Ja Danieli cho sts'ijb'an jastal iti: Jun k'ak'u wa'non sk'umajel jas ju'un ja aluman Dyos Jeremiasi. Yaj ni k'otyon ja b'a wax yala ja Dyos b'a wax ya sna' ja aluman Dyos ja Jerusaleni oj kan ch'ab'an b'a yojol ox tajb'e sok lajune' jab'il, ja'yuj ja ke'n neb'a oj jkom ja wa'eli. Cho jlapa jun k'u jastal koton, ti ochyon kulan b'a yoj ta'an, ti och jk'anyi ja Dyos yuj ja kristyano jumasa. Ja yajni ek' ja iti, ay xa yi'oj jun jab'il wan yajel yab'al ja mandaranum Dario b'a Babilonia. Ja Dario ja stat ja mandaranum Asuero, sok ti sb'aj b'a chonab' medos. —Jaxa ke'n ti kala yab' jastal it ja Dyos ja k'umani: Dyos kuj, ja we'n jel niwana sok jel ja wa wipi. Ja we'n wanix wa k'ot smeranil ja jas waxa wala, sok waxa je'a yi jas yajal ja wa k'ujol ja ma'tik wa syajtaya sok wa sk'u'ana. Ja'yujil, t'ilan oj na'tikon

⁵ le'ata jmultikon. Jel kistal ja jastalotikon a moki; jach' ajyitikon jastal lajan sok meyuka ja we'ni, sok jk'okotikonta ja wa wab'ali.

⁶ Ja aluman Dyos jumasa k'umaniye yuj ja we'n sok ja jmandaranumtikon jumasa sok ja ma'tik jel niwak ja ya'tel kujtikoni, cho jach'ni sok ja jnan tatikoni sok jpetsaniltikon ja ke'ntikoni. Mini june' ja ke'ntikon ki'ajtikon niwan.

⁷ Dyos kuj, ja we'n jel ni toja'a. Ja'yuj jel wala k'ixwitikon. Cho jach' wax yab' sb'aje jastal jaw ja ma'tik tey b'a Jerusaleni, cho jach'ni ja ma'tik tey b'a najtil chonab' jumasa, b'a'a ja jipawe el yuj ja sle'a smule a mok ja we'n.

⁸ Dyos kuj, jpetsaniltikon jel wala k'ixwitikon yuj ja jle'a jmultikon amok ja we'n. Jel wax k'ixwiye ja mandaranumtikon jumasa, ja olomaltikon jumasa sok ja jnan jtatikoni.

⁹ Jayuj ja we'n waxa maklayotikon, sok ja chaya ja multikoni. Jpetsaniltikon ja ke'ntikoni jle'ani jmultikon a moka.

^10-14 Me'x kisawatikon, sok mini wax k'u'antikon ja jas a je'a ki'tikon yuj ja aluman Dyos jumasa. Mex le'a wa'tikon, sok mini wax ka'tikon kan sk'ulajel ja b'a kistali. Dyos kujtikon, ja we'n a walata kab'tikon. Ta mik'ax k'u'lantikon b'a lek, jel wokol oj ek' kujtikon sok oj ko' jb'ajtikon jun wokol. Jach' sje'a ki'tikon jastal jaw ja Moisesi, it spetsanil k'ak'u wax ya'teltaya. Sok awatani k'ot smeranil ja jas a wala sok ja ke'ntikoni sok ja jmandaranumtikon jumasa. Ja b'ajtani mi ma wax wa stup ja jastal awa tup ja ke'ntikoni. —Ja jastal ch'ak ja Jerusaleni jel tsats waji— Jaxa ja we'ni tojani sok spetsanil ja jas waxa k'u'lani. We'nani ja Dyos kujtikoni, jayuj mini sok ja jachuki mex maklayatikon.

^15-16 Dyos kujtikon, ja b'a ek'ta we'n awa ki'tikon sok a je'a ki'tikon ja niwan awipi. We'n wa eluk ja b'a Egipto ja wa chonab'ili, ja k'ak'u jawi jel tsamal a je'a ja wa wipi. Mi kechanuka, wax na'tikon jel jas yajal ja wa k'ujoli. Merani'a jle'ani ja jmultikona sok jk'ulantikonta ja b'a kistali, jayuj wax k'anatikon awi mokxa tajkan sok ja Jerusaleni. Spetsanil ja chonab' jumasa b'a mojan yi'oji jel wax tse'ije yuj cho jach'ni jawa wuntikili. Ja jastal jawi jmulni ke'ntikon sok ja nan jtatikoni. Wax na'atikon. —Jayuj a juluk a k'ujol ja Jerusaleni ja ni wa chonab'ila, sok tey b'a wa wits it mi tukuki—

¹⁷ Ts'akataluka'a Dyos kujtikon, makla ja jas wax k'ana awi'i. B'a a toyjel we'na, wax k'ana, k'ela ja jastal jel triste kanel ja wa naji, sok je'a ki'tikon jas yajal ja wa k'ujoli.

¹⁸ —Maklayon Dyos kuj K'ela jastal ch'ak sna'jel ja chonab' b'a wax toyo wa'tikoni— Ta wan k'ax k'anatikon awi ja iti, mi yuj wax k'u'an jb'ajtikon tojotikon, cho mi yuj wax k'u'antikon yuj sb'ej oj ja wa'ki'tikon ja jas wax k'anatikon awi'i. Ja jas wa'ntikon sk'ulajeli yuj wax k'u'antikon ja we'n jel jas yajal ja wa k'ujoli sok jel leka.

¹⁹ —Maklayotikon Dyos kuj, sok ch'aya ja multikoni. Maklayotikon sok la koltayotikon. Dyos kujtikon, wax jk'anatikon awi a we'na, yuj ja wa chonab'ili sok ja wa wuntikili, ma wa stoyowa—

²⁰ —Ti'to wa'non sk'umajel ja Dyos yuj ja Jerusaleni, sok wa'non sk'anjel oj ch'ay ki ja muli sok ja sb'aj ja kristyano jumasa,

²¹ Wan jupel k'ot ja anjel Gabrieli, ja it sje'atani ki sb'aj b'a jwayichi. T'usan mi ja'uk xa ni k'ak'u oj a'xuk yi jas majtan ja Dyos b'ax och k'ak'u.

²² Jaxa Gabrieli ti yala kab'a: Maklan Daniel, jakyon b'a oj koltaya sok b'a oj ja wab' spetsanil ja iti.

²³ Ja Dyosi jel sk'anawa, ja'yuj ja jastal och ja k'umuki, ja Dyosi yalata ja jas ak'anayi'i. Sok ke'n jakyon b'a oj kal awab' ja jas ak'ana. Maklan lek, b'a oj ja wab' sb'ej jasun wa sk'ana yal ja wa wayichi.

²⁴ T'ilan oj wa ek' ox tajb'e sok lajune' semana b'a oj ch'akuk ja wokol sb'aj ja kristyano jumasa sok ja chonab' mi tukuki, jaxa Dyosi oj ni sch'ay sna'jel ja jastal jel kistal. T'ilan oj wa ek' ox tajb'e lajune' semana b'a oj k'ot st'ikanil ja jastal mi jas k'u'ane sok ja mulali. Yajnix ek' ja k'ak'u jawi oj ni ajyuk ja b'a leki, sok ti oj ek'uk ja jas awila'i, jaxa Dyosi oj ya k'ot smeranil ja jas yaluneji. Ja snaj it mi tukuki oj ni sak'xuk leka, oj cho makunuk b'a kechan sb'aj ye'na.

²⁵ Ja we'n sb'ej oj ja wab' lek sb'ej ja iti: Oj ek' juke semana ja yajnix a'ji awi ja ab'al b'a oj ja tujb'es sok oj ja k'ul yajk'achil ja Jerusaleni, man oj k'otuk ja mandaranum tsa'ub'ali. Ja kaye jumasa b'a Jerusaleni sok jas ts'akab' ton jumasa tojb'eli oj alb'uk ox tajb'e sok chab' semana. —Ja k'ak'u jumasa jawi sk'ak'u'il wokol sok cham k'ujol—

²⁶ Yajnix ek' ja ox tajb'e sok chab' semana, oj jak jun mandaranum sok jas soldado jumasa sok oj smile ja mandaranum tsa'ub'ali. —Jaxa Jerusalen sok ja snajtsil tsomjeli oj ch'ak sna'jel— jaxa stik'anali junta ch'ay k'ujol oj k'otuk, ja jastal wax b'ut jun ja'. —Jaxa tiro'anel sok ja chamel ch'akel it alub'alxa mi oj ch'akuk man oj k'ot tik'an ja k'ak'u—

²⁷ B'a yojol jun semana smoj, ja mandaranum jaw jel kistali oj ya jun trato sok jitsan kristyano jumasa; jayuj b'a snalan b'a'an ja semana oj yal'e' mi ma oj ya majtanal, jaxa b'a altar b'a wax a'xi majtanali jel tsats oj sle' smule sok ja Dyosi. Tsa'an sok ja jawi, ja Dyosi oj schak sna'jel ja ma mini t'un lek ilji yuji—.