Daniel 8 - Ja yab'al ja Dyosi

Ja waw chej sok ja waw chivo

¹ —Jayuj sok ja jwayich ch'akta kali, ke'n ja Daniel, cho waychiniyon pilan majke. Jach' ek' jastal it ja yajni wanxa yajel yab'al oxe jab'il ja Belsasari.

² Ja b'a wayich jawi lajan sok ti ayon sok mojan ja niwan ja' Ulai, ja b'a chonab' Susa. Ja chonab' iti ja b'a snalan b'a'an b'a wax, sok ti wax tax b'a lu'um jumasa wax na'xi sb'aj jastal Elam.

³ —Ja b'aj wayichi wax kila ja ke'n najat lek, jun chej ti tek'an ek' mojan sok ja niwan ja'i. Ja chej jawi ay yi'oj chab' sxulub' najtik, jaxa juni jel najat yuj ja jun el tsa'ani.

⁴ Ja chej jawi wa snol k'ab'in b'a stojol k'e'el k'inal, sok b'a ko'el k'inal, sok ja b'a stojol wax mukxi ja k'ak'u. B'ob' kile meyuk pilan chante xb'ob' syam sb'aj soka, cho minix b'ob' skoltan sb'aj ja jastal wax tiro'ani. Ja chej jawi wa sk'u'lan ja jas wa sk'ana oj sk'u'luki, jujune majke wan tsatsb'el.

⁵ —Ti'to wa'non sneb'jel sok ja jas kila'i, ti kila ja b'a stojol wax mukxi ja k'ak'u jakum jun chivo. Ay yi'oj jun sxulub' jel niwan b'a snalan b'a schab'il ja sati, sok jel x'ajni lajan sok wan jujpel.

⁶ Yaj ni mojanxa ay ja chivo sok ja chej it ay chab' sxulub'i, syama sb'aj sok spetsanil ja yipi

⁷ ch'ak sk'ok'el yi schab'il jas xulub'i. Ja cheji mi ajyi yip b'a oj skoltan sb'aj, ja'yuj ja chivo sjipa lu'um ja cheji ti och sb'atala'uk. Sok mini ma b'ob' kolta juk yuj ja.

⁸ —Ja chivo k'ak'u k'ak'u wan julel ja yipi. Jayuj yaj ni jel xa ja yipi, jas xulub' jel niwani k'ok' ele. Ja b'a b'ay ja niwan sxulub' jawi, el chane sxulub' smoj. June ja ye'n ti wa sk'ela stojol k'e'el k'inal, jaxa juni ti b'a stojol ko'el k'inal, ja juni ti b'a sts'e'el b'a wax jak ja k'ak'u, sok ja juni ti b'a stojol spunto wax och ja k'ak'u.

⁹ B'a june jas xulub' jumasa el pilan sxulub' ch'in. Jaxa ja xulub' jawi jel k'i, b'a stojol ko'el k'inali, b'a stojol wax mukxi ja k'ak'u sok ja b'a lu'um jel tsamali.

¹⁰ Jel k'i, sta'a k'ot ja k'anal jumasa b'a satk'inali. Jitsan ja ye'nle'i ch'ak sipko'e sok ch'ak sb'atala'uk.

¹¹ —Ja ch'in sxulub' iti cho sneb'a oj slaj sb'aj sok ja olomal yuj ja k'anal jumasa. Yuj jas takeli, yala mi lekuk oj a'xuk yi smajtan jujune k'ak'u ja Dyosi, sok jel sk'e'na ja snajtsil tsomjeli.

¹² Jel xa kistal ja jas wa sk'u'lani, cho ya'yi yab'al jas soldado jumasa a b'i stalnaye spetsanil ja k'ak'u jumasa ja b'a wax a'xi smajtan ja Dyosi; tsa'an cho sjiptalan ko b'a lu'um, ja smeranili ja och sk'uluk ja jas wa sk'ana ja ye'ni. —Sok spetsanil ni el leka—

¹³ —Mi ek' jitsan k'ak'u ti kab' jun anjel wan yaljel yab' pilan anjel: Ja it ja wa'ntik yiljeli, jach wan ek'el jujune' k'ak'u ja b'a altar wax axi ja majtanali. ¿Jas k'ak'u oj ch'ak'uk? ¿Jas k'ak'u oj yal ja Dyos mixa jel oj sle' ja smule' b'a yoj snajtsil ja tsomjeli ¿Jas k'ak'u oj yi lek ja ma' oj k'uljiyi kistal ja ma'tik wax k'u'aji yuji?

¹⁴ —Jaxa pilan anjeli ti yala'a: man ek'ta jun mil syen chab' tajb'e sok lajune (1,150) k'ak'u, ek'el t'usan ja oxe jab'ili. Yajnix ek' ja k'ak'u jumasa jawi ja snajtsil ja tsomjeli, oj kan sak lek mi jas kux oj kanuk.

¹⁵ —Yaj ni ti wa'non yiljel spetsanil ja iti, wax le'a jastal oj kab' sb'ej, ti ay ma' sje'a sb'aj ki jastal jun winik.

¹⁶ Ti kab' jun k'umal ti el jan b'a niwan ja' Ulai. Ja k'umal jawi, ti yala jastal ita: Gabriel, ala yab' ja winik jaw ja jas wa sk'ana yal ja swayichi.

¹⁷ —Yaj ni mojxi mok ja Gabrieli, ja ke'n jel xiwyon jipa b'aj man lu'um. Ja ye'n ti yala kab'a: Ja jas awila, oj k'ot smeranil yaj nix k'ot tik'an ja k'ak'uji.

¹⁸ —Yaj ni wan yaljel kab' ja jastal it ja Gabrieli, ja ke'n ch'ay k'ujol ti kanyon b'a'an b'a lu'um. Jayuj ja ye'n jaki jak skoltayon ti stuluwona.

¹⁹ Ti yala kab'a: Ja yan oj kala wab' jasunka oj ek'uk' ja yajnix k'otikan ja k'ak'u. Yajnix ek' ja jawi, ja Dyosi jel oj tajkuk sok ja kristyano jumasa.

²⁰ Ja we'n awila jun chej ay chab' sxulub'. Ja chab' sxulub' jawi ja wa slaja ja mandaranum jumasa b'a Media sok b'a Persia.

²¹ Jaxa chivo jawi ja wa slaja ja mandaranum b'a Grecia, jaxa sxulub' it jel niwan el b'a snalan schab'il ja sati ye'n jel niwan b'a spetsanil ja mandaranum jumasa.

²² Jaxa chane sxulub' eli ja yajni k'ok el ja it el b'ajtani ja wa slaja ja chane mandaranum oj eluk ja b'a chonab' iti. Jaxa ja mandaranum jumasa jawi, mi jeluk yipe ja jastal ja b'ajtani.

²³ Yajni xk'ot tik'an jas k'ak'uji ja yipe ja mandaranum jumasa jawi, sok yaj mixax b'o kuch yuj jas skistalile'i, oj jak jun mandaranum jel niwan oj ya' sb'aj sok jel oj stoy sb'aj.

²⁴ Ja mandaranum jawi k'ak'u k'ak'u jel tsats wax yab' sb'aj, a'nima mi yuj yipuk ye'na. Jel lek oj waj spetsanil ja jas oj sk'u'luki, jel oj ya yi wokol ja kristyano jumasa. Oj sch'ay sna'jel winike jumasa b'a jel niwan ja ya'tele'i, cho jach'ni ja yuntikil ja Dyosi.

²⁵ Jun mandaranum jel oj sna' ja jas oj sk'u'luki, jitsan kristyano oj slo'lan. Oj yal sb'aj ye'n ja mandaranum jel niwan ja yipi, jun ch'ay k'ujol oj smil ja kristyano laman aye'i. Oj tiro'anuk sok stujk'anub' sok ja mandaranum jumasa, jayuj mi oj b'ob' yujile'.

²⁶ Kalata awab'i ja jasun wa sk'ana yal ja jas awila yuj ja oxe jab'il sok ja k'ak'u jumasa. Ja jawi jach'ni oj ek' jastal jawa. Jayuj ja we'ni mok ma'a wal yab'i, yuj ja oj ni k'ot smeranil a'nima x'ek' jitsan k'ak'u.

²⁷ —Jaxa ke'n ke'nani ja Danieloni, jch'aya ja kipi yuj ja jel jitsan k'ak'u koyon chameli. Jayuj k'ot jun k'ak'u k'eyon cho kila st'ilanil ja jasun wax k'ulaxi sb'aj ja mandaranumi. Jayuj jel ni cham k'ujol ayona yuj ja mix kab' lek sb'ej spetsanil ja jas kila—.