Daniel 7 - Ja yab'al ja Dyosi

Ja swayich ja Danieli ( 7—12 )

¹ B'a yojol ja sb'ajtanil jab'il wan sk'ulajel mandar ja Belsasar b'a Babilonia, ja Danieli ay jas waychin, ja b'a swayich jawi jel jitsan ja jastik jumasa yila. Yaj ni ya'a sb'aji sts'ijb'an ja jas waychini. Jach ay ja jas sts'ijb'ani:

Ja chane niwak chante jumasa

² Ke'non ja Danieloni. Jun a'kwal waychin, ja b'a schanil schikin ja satk'inali jel tsats sju'u ja ik' ja b'a niwan paman ja'i.

³ Junta ch'ay k'ujol el jan chane niwak chante b'a niwan paman ja'i, b'a schanwanile tuktukil.

⁴ —Ja sb'ajtanil chante'i lajan sok jastal jun choj ay swech' jastal liklik. Jayuj k'utsji yi ja swech' jumasa, ti k'e tek'an sok ja yoki lajan sok jastal jun winik. Jaxa b'ay ja yaltsili, a'ji yi jun yaltsil kristyano.

⁵ —Ja b'a schab'il chante'i lajan sok jastal jun oso, june ja b'a ts'e'eli jel cha'an yuj ja juni. Ja b'a yej jumasa ay yi'oj oxe sxa'ax. Ti a'ji yi ja ab'ali a k'e'uk b'a oj sk'ux jitsan b'ak'et.

⁶ —Ja yoxil chante'i lajan sok jastal jun leopardo choj. Ay yi'oj chane swech' yal chan ja b'a spatiki, cho ay chane s'olom. Ja tan chan iti, a'ji yi yip b'a oj ya' yab'al.

⁷ —Cho waychiniyonto, waj to kile sje'a sb'aj ja schanil chante'i jel tuk yuj ja oxe b'ajtani jel tsats jel xiwela sb'aja. Ay lajune ja sxulub' jumasa, ja yej jumasa jel niwak sok chab' chole ay ja ni' ja yeji, ts'ipanik xta jastal sni' tak'in. Chok' wax ya'a ja jas wax yab'i, jaxa tuk jumasa wa sb'atala'an sok was ch'aya sna'jel.

^8-12 —Ti'to wa'non sk'ejel ja lajune sxulub' jumasa, ti'xta cho el pilan sxulub' jel ch'in, yajni el ja jun jawi ya el oxe ja b'a ti'ni ayi. Ja oxe iti, ya elyi ja yipi, jayuj sak'an ya'kani, yuj ja mitox k'ot ja k'ak'u oj chamuke'i. Tsa'an smilawe ja schanil chani stsikaweyi ja sb'ak'teli. Ja ch'in sxulub'i, ay sat jastal winik, ja yaj ni wan ek'el spetsanil ja jastal iti, jel tsamal ja jas wax yala. —Ti kila sje'a sb'aj jujuntik chonab' jumasa'a, sok jun ma ay xa sk'ujol ti och kulana. Ja sk'u'i sak ja jastal ja te'ewi, jaxa stso'otsil s'olomi sak jastal ja sk'u' cheji. Ja b'a lu'um jaw sok b'a sjoyanali wa'n ajlel jun niwan k'ak'. Jel jitsan ja kristyano jumasa spetsanil k'ak'u wa'ne stoyjel ja it ma' ay xa sk'ujoli. Jaxa ma' ayxa sk'ujol och kulan och ske'l ja mulal jumasa sok sjama ja ju'un jumasa.

¹³ —Yajni wa'non yiljel spetsanil ja iti, jun winik sje'a sb'a b'a yoj ason ti wa sta och mojan ja winik jaw ayxa sk'ujoli.

¹⁴ Jaxa winik jawi jel toyji sok a'jiyi yip b'a oj ajyuk ek' b'a slechanil ja lu'umi. B'ob' kile wax k'u'aji b'a spetsanil ja ch'in chonab' jumasa sok ja niwan chonab' jumasa. Ja yipi jun xta ni spetsanil k'ak'u sok mini oj k'ot stik'anala, ja' xa b'a wa xya'a yab'ali mini oj ch'ak sna'jela.

¹⁵ —Jaxa ke'n jun jom olomil ya'ki yuj ja jas kila, ko'yon chamel yuj.

¹⁶ Ja'yuj ti mojxiyon och sok june ja chawane it ti aye' tiwi, jk'anayi'ile ke'a yalwe kab' jasun wa sk'ana yal ja wayichi. Ti yala kab'a:

¹⁷ Ja chane chante jumasa iti, ja wa sk'ana yale chanwane mandaranum oj ya'e yab'ale ja b'a lu'umi.

¹⁸ Jaxa ja kristyano stsa'unejxa ja Dyos jel niwani oj a'juk yi'ile b'a oj ajyuke'a, sok ti'ni oj ajyuke spetsanil k'ak'u.

^19-23 Cho job'o yi ja winik jawi jasyuj ja schanil niwan chante jel tuk. Ja yuj ja niwan chan jawi, sok ja yej jumasa toj tak'in sok jas k'ab' jumasa toj cobre, jel xya'a xiwel; spetsanil wax ch'ak sb'uk'o'e, jaxa janek' wax kani wax ch'ak sb'ate. Jaxa winik jawi ti yala kab'a: Jas chanil niwan chani ja schanil mandaranum oj ajyuk ja b'a lu'umi. Jel tuk yuj ja b'as chanil mandaranumi, oj sch'ak spetsanil ja kristyano jumasa b'a lu'umi, oj ch'ak sb'atala'uk sok oj st'ene. —Ti cho job'o yi jasun wa sk'ana yale ja lajune sxulub' it ti yi'oj b'a s'olom ja chan jawi. Cho jach'ni cho job'oyi jasun wa sk'ana yale ja ch'in sxulub' it ay sati, sok yuj ja jel tsamal xk'umani'i. Cho jk'anayi a yal kab' jasyuj ja yajni eli, ya ko ib'elajel oxe jas xulub'i. Ja ke'n kilunej jas ch'in xulub' jawi jel niwan wax ya'a sb'aj, wax tiro'ani sok ja ma stsa'unej ja Dyosi sok wax b'ob' yuj, ti k'ot ja winik it ay xa sk'ujoli ya'yi yip b'a oj sk'el ja kristyano jumasa, sok ya'yi yip b'a oj ya' yab'al. —Ja winik jawi yala kab' jastal iti:

²⁴ Ja lajune sxulub'i wa sk'ana yal lajune mandaranum, oj ya' yab'al ja b'a lu'umi. Tsa'an sok ja ye'nle'i, oj k'e pilan mandaranum, jel tuk sok ja tuk jumasa, jel ch'in oj yil oxe mandaranum.

²⁵ Oj k'umanuk sb'aj kistal ja Dyos jel niwani, sok oj tiro'anuk sok ja kristyano stsa'uneji. Oj sle jastal oj stukb'es ja jastal wa sk'u'ane'i sok ja yab'al ja Dyosi, b'a yojol oxe jab'il sok snalan oj sk'u'luk ja jas lek wax yila oj sk'u'luki.

²⁶ Jaxa ja mandaranum jawi oj a'juk stupe sok oj sch'ay ja yipi, ojni ch'ay sna'jela.

²⁷ Jaxa schonab'il ja Dyosi oj a'juk yipe b'a oj sk'ok'e' spetsanil ja mandaranum jumasa b'a lu'umi, sok ti'ni oj ajyuke spetsanil k'ak'u.

²⁸ —Jach waj spetsanil ja jas kila'i, jel cham k'ujol kanyon. A'nima jel och ja xiweli, mi ma kala yab' ja jas kila'i.