Daniel 6 - Ja yab'al ja Dyosi

Ja Daniel b'a sk'e'en ja choj jumasa

¹ B'a oj ajyuk lek ja b'a wa xya'a yab'al ja Dario, stsa'a wak tajb'e kristyano b'a oj koltajuk sk'eljel jastal oj ya'a yab'al.

² Ja b'a yojol ja wak tajb'e jawi wax k'eljiye yuj oxe olomal jel niwake, june b'a yoxil ja olomal jumasa jawi ja Danieli.

³ Sok jel lek waj ja ya'tel ja Danieli, ja mandaranumi st'ojo ye'n oj och mas niwan ja ya'tel yuj spetsanil ja tuk jumasa, sok sneb'a b'a oj ya och olomalil b'a spetsanil ja b'a wa xya'a yab'ali.

⁴ Jaxa tuk jumasa kechan wa smajlaye ja Danieli oj sk'u'luk b'a kistali, ma ay jas mi oj b'ob' sk'u'luk, b'a oj sle'eyi smul sok ja mandaranumi. Jayuj mini jun smul b'ob' sta'e yi'a, yuj ja Danieli spetsanil k'ak'u wa sk'u'lan lek ja ya'teli.

⁵ Ja'yuj och schap'e ti yalawe'a: yuj ja mini jun smul xb'ob' ta'tik yi ja Danieli, ja yuj kechan oj b'ob' le'tik yi smul sok ja jastal wa sk'u'ani—.

⁶ Ja'yuj ja olomal jumasa b'a niwan ja ya'tele'i waj sk'umuke ja mandaranum Dario, ti yalawe yab'a: —Wax k'anatikon niwan mandaranum a ajyuk ja wa sak'anil jitsan jab'il—

⁷ Spetsanil ja ma'tik jel niwak jas choli sok ja olomal jumasa wax k'ana oj kaltikon a wab' niwan mandaranum ke'a pukxuk jun yajk'achil ab'al. Oj yal ja ab'al jawi, b'a yojol jun ixaw mi ma oj b'ob' stoy mini jun dyos sok mini jun winik, kechan we'n oj toy xan niwan mandaranum. Ja ab'al jawi oj axuk ti b'a spetsanil ja b'a waxa wa'a wab'ali, ja ma oj sk'ok ja ab'al jawi oj axuk och sak'an ja b'a sk'e'en ja choj jumasa.

⁸ Ta wan k'axa k'u'lan pirmar ja ab'al it niwan mandaranum, mini june ma oj b'ob' stukb'esa. Jach' wax yala jastal it ja ab'al b'a wa sk'u'ane ja swinkil ja medos sok ja persa—.

⁹ Ja mandaranumi yila lek ti sk'u'lan pirmar ja ab'ali.

¹⁰ Jaxa Danieli yab' yab'alil, ti waj b'a snaja waj sk'umuk ja Dyosi. Ja jastal was k'ulan ja Danieli oxe ek'ele' wa sk'uman ja Dyos ja k'ak'u, ja'yuj cho och ja b'a skwarto sjama ja sbentana ti sk'ela b'a stojol Jerusalen, ko mek'an och sk'umuk ja Dyosi.

¹¹ Yajni yilawe ja ma'tik jel niwak ja ya'tel wa'n sk'umajel ja Dyos ja Danieli,

¹² wajye', waj sle'eyi smul ja mandaranumi. Ti yalawe yab'a:— Ja wa wab'ali yalunej b'a yojol jun ixaw mi ma oj b'ob' stoy jun dyos mi we'nuk. Ja ixawi mito xch'aki, ¿mi ma meranuk b'a? Mi kechanuka ja wa wab'ali cho awala ja ma oj sk'ok ja ab'al jawi oj a'xuk ochuk b'a sk'e'en ja choj jumasa. Ja mandaranumi ti yala'a: —Jach'ni jastal jawa, ja mandar jumasa yi'oje medos sok ja persa mi ma oj b'ob' stukb'es.

¹³ Ja'yuj ti yalawe'a: Ja Danieli it yi'aje jan b'a oj lutxuk preso b'a Juda, mis k'u'an ja ab'al niwan mandaranum. Mi kechanuka, —ox ek'ele' wax ko mek'an ja k'ak'u b'a wa sk'uman jas Dyosi—

¹⁴ Yajni yab' ja mandaranum ja jastal iti, jel triste axi, snajtil ja a'kwali wan sneb'jel jastal oj skoltan ja Danieli.

¹⁵ Jaxa b'a pilan k'ak'u, ja olomal jumasa jel niwak ja ya'tele'i ti waj sk'umke ja mandaranumi ti yalwe yab'a: —Niwan mandaranum waxa na'a lek ja Danieli oj chamuk. Jun mandaranum sb'a medos sok b'a persa was k'u'lan pirmar jun ab'al, mini ma oj b'ob' stukb'esa.

¹⁶ Ja'yuj ja mandaranumi ti sjeka ik'uman ja Danieli, b'a oj ya'we ochuk b'a sk'e'en ja choj jumasa. Jayuj b'ajtan ja oj ya'we ochuki, ja mandaranumi ti yala yab' ja Danieli, wax majla oj skoltaya ja Dyos it spetsanil k'ak'u waxa toyo'i—.

¹⁷ Tsa'an ti'xa yawe ochuk ja Daniel ja b'a sk'e'en ja choj jumasa'a. Ti smak'awe sok jun niwan ton jas ti ja k'e'eni, jaxa mandaranumi ya ochuk jas seyo ja b'a toni. Cho jach' jun xta sk'u'lane ja ma'tik jel niwak ja ya'tele'i b'a mini june ma oj sneb' oj ya eluk ja Daniel ja tiwi.

¹⁸ Tsa'an sok ja jawi, ja mandaranumi ti waj b'a sniwan snaja, jayuj snajtil ja a'kwali mini jas yab' t'unuka. A'nima mix b'ob' wayuk, jayuj mini cho sk'ana oj a'juk ok'yi k'in.

¹⁹ Yaj ni sakb'i ja k'inali, ti'xa k'e ja mandaranumi ti waj ja b'a sk'e'en ja choj jumasa ja b'a ak'ub'al ochuk ja Danieli.

²⁰ Yaj ni mojanxa ay ja b'a sti ja k'e'eni, jel och striste'il ti awani'a: —Daniel, ja we'n waxa toyo ja Dyos it wax ya'a sak'anili— ¿b'ob' ma skoltaya ja wa Dyos ja b'a choj jumasa?

²¹ Jaxa Danieli ti yala'a: Wax k'ana niwan mandaranum a ajyuk ja wa sak'anil jitsan jab'il—

²² Ja Dyos kuji sjeka ja yanjel b'a oj slut yi ja sti ja choj jumasa, b'a mi jas oj sk'u'luke'i. Ja Dyosi wa sna'a mi jas kistal jk'ulunej, cho mini b'a wax ki'aj a patik niwan mandaranum.

²³ Yaj ni yab' ja jastal it ja mandaranumi jel tsamal yab'i ti yala a a'juk eluk ja b'a k'e'en ja Danieli. Yaj ni yaweta eluki, spetsanile ch'ak yil'e' mini jas k'ulajiyi yuj ja choj jumasa, yuj ja ye'n ja sniwan k'ujol ja Dyosi.

²⁴ Ochta k'ak'u, ja mandaranumi sjeka ik'uman ja ma'tik sle'ayi smul ja Danieli, a ajuk ochuke ja b'a sk'e'en ja choj jumasa lajan sok jas che'ume'i sok ja yuntikile'i. —Jaxa choj jumasa syamawe ch'ak sk'ok e' yi ja sb'akele'i. Ja mitox koye' k'ot b'a lu'umi, ch'akta elke xe'ntiyaman—

²⁵ Ja'yuj ja mandaranum Dario sts'ijb'an jun lo'il b'a spetsanil ja niwak chonab' jumasa sok ja ch'in chonab' b'a wa sk'ulan mandari. Ja lo'il jawi wax yala: Wax k'ana oj ajyanik laman a petsanilex.

²⁶ Wax kal yab' spetsanil ja swinkil ja b'a wax k'ulan mandari a stoy'e' sok a sk'u'uke ja Dyos yuj ja Danieli. Ja Dyos yuji sak'an tola bida, jaxa b'a wa sk'ulan mandari mini ma oj b'ob' ch'ake. Ja yipi junxtani oj ajyuka

²⁷ Ja Dyos yuj ja Danieli oj b'ob' skoltaya sok oj ya elan b'a k'ab'al, sok jel tsamal ja jas wa sk'u'lan ja b'a satk'inal sok ja b'a lu'umi. —Ja Dyos yuj ja Danieli koltaji yuj ja b'a sk'ab' ja choj jumasa.

²⁸ Ja'yuj ja Danieli juni winik b'a jel niwan ja schol ja b'a wa xya'a yab'al ja Dario, sok ja b'a wa xya'a yab'al ja Ciro mandaranum b'a Persa—