Daniel 5 - Ja yab'al ja Dyosi

Ja sk'in ja Belsasari

¹ Ja Mandaranum Belsasari sk'u'lan jun k'in, sloko jun mil kristyano jumasa, ja ma'tik jel niwan ja ya'tel b'a wa xya'a yab'ali. Spetsanil ja ma'tik k'ot ja b'a k'ini jel yu'aje ja ya'al ts'usub'i.

^2-3 Cho jach'ni ja Belsasari jel yu'a, yaj ni yakb'elxa'i ja b'is b'a toj k'anal tak'in sok sakal tak'in jas tat Nabucodonosori ti yi'a jan b'a snajtsil tsomjel b'a Jerusaleni. Sjeka sk'anjel b'a jachuk ja ye'n sok jas lok jumasa jel oj yu'e sok ja b'is jawi.

⁴ Yajni wane yu'jeli, wane sts'eb'ojtajel ja dyos yujile'i, k'u'lub'al jastal sok k'anal tak'in, sakal tak'in, cobre, tak'in, te', sok ton.

Ja Dyosi sts'ijb'an ja b'a sts'akab'il ja na'itsi

⁵ Ja jun xta juts'in jawi, jun k'ab'al sje'a sb'aj ja b'a sat ja yib'el ja na'itsi ti och ts'ijb'anuka. Sok ja yilab' ja k'ak' jumasa wax b'ob' ilxuk lek ja jas wa sts'ijb'ani. Yajni yila ja mandaranum ja k'ab'al jawi,

⁶ sak lek waj ja yelawi sok och k'itk'unuk yuj ja xiweli.

⁷ Ti'xa spaya sok tsatsal awanel jas k'intanum jumasa sok ja ma'tik jel sna'a, ti ya'a jas mandari: ¿Ay ma junuk ja we'nlexi oj ja walwex kab' jasun wa sk'ana yal ja jas ts'ijb'anub'al b'a sts'akab'il ja na'itsi? Ja ma oj sk'u'luki, oj ka slap jun sk'u ja jastal june ma jel niwan ja ya'teli, sok oj ka'yi ox majke smoj jas stsatsali, sok oj ka sk'ul mandar ja b'a wax k'u'lan mandari—.

⁸ Jayuj mini june ja ma'tik jel sna'a sok ja k'intanum jumasa b'ob' sna'e ja jas ts'ijb'anub'ali, jachuk cho mini b'ob' yalwe yab' jas b'ej ja mandaranumi.

⁹ Ja'yuj ja mandaranumi jel cham sk'ujol, ja yuj jel xiwi. Cho jachuk jas lok jumasa mi sna'a jas oj sk'u'luke.

¹⁰ Yaj ni yab' ja mandaranum sche'um ja mandaranumi ja jastal wan awanel ja Belsasar sok jas lok jumasa, ti och ja b'a niwan na'its ja b'ay ja k'ini ti yala yab' ja mandaranumi: —Wax k'ana ja wa niwanili, a ayuk a sak'anil jitsan jab'il, mok cham ka k'ujol mok xiwan

¹¹ Ja il b'a Babilonia ay jun kerem jel sna'a sok ja sneb'jeli. Ja ye'n tey sok ja Yespiritu ja Dyosi. Ja Nabucodonosor wa tat niwan mandaranum, wa sna'a lek sb'aj, ja'yuj ya och olomalil b'a spetsanil ja ma'tik jel sna'a.

¹² —Ja kerem jawi oj b'ob' yal awab' jas b'ej ja wa wayich jumasa sok ja jastik jumasa jel wokol mix b'ob' ab'xuk sb'eji. Jas b'i'ili Daniel, a'nima ja mandaranum Nabucodonosor stukb'es jas b'i'ili ya sb'i'iluk Beltsasar. Paya ja we'n. Ja ye'n oj yala wab' niwan mandaranum ja jas wa sk'ana yal ja jas ts'ijb'anub'al b'a smak'b'ak ja na'itsi—.

¹³ Jaxa mandaranumi ti sjeka spayjel ja Danieli. Yaj ni k'ot ja Danieli, ja Mandaranumi ti sjob'o yi'a: —¿A we'nama junuk ja judio jumasa it yi'ajan ja tat b'a Juda?

¹⁴ Ja yalawe kab'i, sok ja we'n ti wax ajyi amok ja Yespiritu ja Dyosi, ja'yujil jel ja sneb'jel a wuji sok jel xa na'a.

¹⁵ —Ja ke'n jeka spayjel spetsanil ja ma'tik jel sna'a sok ja k'intanum jumasa, b'a yalwe kab' jasun wa sk'ana yal ja jas ti ts'ijb'anub'al b'a smakb'ak ja na'itsi, jayuj mi b'ob' sk'u'luke.

¹⁶ Ja ke'n wax na'a ja we'n oj b'ob' a wal jasun wa sk'ana yal, jun jastik b'a jel wokol oj na'xuk. Ta wan k'axa wal kab' jasun wa sk'ana yal ja jas ti ts'ijb'anub'al b'a smakb'al ja na'itsi, oj jeltesa b'a oj ajuk a lap jun a k'u ja jastal june ma jel niwan ja ya'teli. Mi kechanuka oj kawi b'a ox majke jel niwan oj iljan sok oj ja wa wab'al ja b'a wax k'u'lan mandari.—

¹⁷ Jaxa Danieli ti yala'a: —Ja ke'n niwan mandaranum oj kala wab' jasun wa sk'ana yal ja jas ti ts'ijb'anub'al b'a smakb'al ja na'itsi. Jayuj mey sb'ej ay jas oj ja k'eb' ki ma oj ja wa'ki jun jchol b'a jel niwan.

^18-19 —Ja Dyos jel niwani ya'yi jun schol b'a jel niwan ja mandaranum Nabucodonosor ja wa tat niwan mandaranum. Spetsanil ja chonab' jumasa wax kisji yuj sok wa sna'awe ja jastal jel niwani. Cho jach'ni wax xiwye yuj, yuj ja ye'n wa sna'a machunk'a oj smili sok machunk'a oj yakan sak'ani, cho jach'ni ja ma jel ch'in oj yili sok ja ma oj ya'yi jun schol b'a jel niwani.

²⁰ —Ja mandaranum Nabucodonosori jel niwan wax yab' sb'aj sok jel ja yipi, och yixtala'uk ja kristyano jumasa. Ja'yuj ja Dyosi ya elyi jas choli,

²¹ jaxa Nabucodonosori mi b'ob' ajyuk sok ja kristyano jumasa, yuj ja jach' jastal jun chante. Ti wax ajyi sok ja burro jumasa b'a yoj k'uli, wa sk'uxu ak jastal swaw wakax, ja wax noxji sok ja ts'ujul wax ko b'a satk'inali. Jach' ajyi jastal jawi man sna'a kechan ye'n ja Dyos jel niwan wa xya'a yab'al b'a spetsanil ja chonab' jumasa, sok kechan ye'n wa sna'a machun wa sk'ana oj ya och mandaranumil.

²² —Niwan mandaranum ja it wanxax ch'ak a na' spetsanil, jayuj a'nima waxa na'a mixa k'ana oj ja wa'a b'aj ch'inili.

²³ Mi kechanuka niwan mandaranum, a jeka sk'anjel ja b'is jumasa b'a snajtsil tsomjeli, ti a wu'aj tiw niwan mandaranum sok spetsanil ja wa lok jumasa. Ja yuj ja jel tsamal lek aya', sb'ejni ja oj toy ja Dyos ma sk'u'lana sok ja ma wax ya'a wi' ja wa sak'anili, jayuj ja iti ja we'n sok ja wa lok jumasa ja a toyowex ja wa dyosex jumasa jawi. —Ja dyos jumasa jawi mix ilwani mix yab' k'inal sok mi jas na'a, yuj ja k'u'lub'al sok tak'in, te' sok ton— —Ja jastal jaw a k'u'lanex niwan mandaranum, a wa'wex tajkuk ja Dyos b'a satk'inali.

²⁴ Ja'yuj ye'n yala ja k'ab'al oj sts'ijb'a:

²⁵ mene, mene, tekel sok parsin,

²⁶ jach' jastal it wax yala ja lo'il jumasa jawi: —Ja mene wa sk'ana yale ja Dyosi sneb'ata oj ya k'ot stik'anal jawa chol niwan mandaranum.

²⁷ Tekel wa sk'ana yale ja Dyos niwan mandaranum ya'wi jitsan k'ak'u, niwan mandaranum mi ana'a jastal oj ja k'uluk.

²⁸ Parsin wa sk'ana yale ja Dyosi oj spil chab'e b'a waxa k'u'lan mandar niwan mandaranum, ja oj axukyi ja swinkil ja medos sok ja persa.—

²⁹ Jaxa tsa'an ja mandaranum Belsasari ya'a jas mandar ayawe slap jas k'u' ja Daniel jastal june ma jel niwan jas choli. Cho yala aya ek' b'a spetsanil ja b'a wa xya'a yab'ali, ja Danieli ye'n ay b'a yoxil lugar b'a jel niwan ja ya'tel sok jas yab'ali.

³⁰ Ja jun xta a'kwal jawi smilawe ja Belsasar rey b'a Babilonia.

³¹ Ja'yuj ja Dario ye'n k'ot mandaranumil b'a medosi. Ja yajni ek' ja iti, ja Dario ay yi'oj ox tajb'e sok chab' jab'il.