Daniel 4 - Ja yab'al ja Dyosi

Ja Nabucodonosori pax jom olomil

¹ Tsa'an yuj ja iti, ti yala ja Nabucodonosori: Yuj ja jel lek ayoni wax k'ana ajyuke laman sok a ek'yujile lek spetsanil ja kristyano jumasa b'a lu'umi, ja ke'n, mandaranum Nabucodonosor,

² wax k'ana oj kala wabyex ja jas jel tsamal sk'u'lanki ja Dyos jel niwani.

³ —Jel niwan ja senya sk'u'lan k'i'i sok jel tsamal— Ja jastal wa xya'a yab'ali mini oj ch'akuka, jaxa yipi mini ay stik'anala.

⁴ —Ja yajni wa'non jijlel tsamal lek ja b'a niwan naji,

⁵ ay jas waychin, Ja jas kila ja b'a wayichi jel ya xiwkon.

⁶ Ja'yuj ti kala yabye a ch'ak wajuke b'a stij sat spetsanile ja ma'tik jel sna'awe b'a Babilonia, b'a oj yal wekab' jas b'ej ja jwayichi.

⁷ Yajni julye'i, ti kala yabye ja wayichi; jayuj mini june ja ye'nle'i b'ob' yalwe kab' jas b'eja.

^8-9 Tsa'an ti k'ot ja Danieli. Jaxa ke'ntikoni wax na'atikon sb'aj jas b'i'ili Beltsasar, b'aj oj toyxuk ja dyosi. Ja ke'n wax na'a ja Danieli ja wax je'ji yuj jas oj sk'u'luk yuj ja Yespiritu ja Dyosi. Ja'yuj ti kala yab' ja wayichi, jach' kala yab'i: —Ja we'n Beltsasar, jel waxa na'a ja we'n spetsanil yuj ja ma'tik jel sna'a it lajan aye'i. Ay jas waychinej, sok wax k'ana oj ja wal kab' jasun wa sk'ana yale.

¹⁰ Ja it ja waychini: B'a snalan b'a'an ja lu'umi ay jun te' jel cha'an.

¹¹ Mi b'a ajyel pilan te' b'a jel tsats; mi b'a ajyi pilan te' b'a jel niwan. A'nima najatuk aya wax b'ob' ilxuk, sok wa sk'ot man b'a satk'inal.

¹² Jel ya'ax ajyi ja spowili sok jel jitsan ja sati, wax ch'ak sta ja jas wax yabye spetsanil ja yal chan jumasa b'a satk'inali, spetsanil ja chante jumasa b'a k'uli sok spetsanil ja kristyano jumasa.

¹³ —Ti'to b'a'anon ek' ja b'aj ch'ati, ti kila ja b'aj wayichi ko'jan jun anjel ja b'a satk'inali

¹⁴ tsats lek awani ti yala'a: —Ochanik b'a yib'el ja te' jawi— k'utsuwik jas k'ab' jumasa, mok a wawex kan jun spowil, ch'akan tuluwik jas sati. A ch'ak wajuk ja chante jumasa a axub'anuke b'a yib'el; a ch'ak wajuk ja yal chan jumasa it ti wa sk'u'lan soje b'a sk'ab' jumasa.

^15-16 Kechan oj ja wa'wex kan jas topi, mok a jots'ex ja yech jumasa. Ti'xa wa'wex kan b'a yoj k'ul b'a wits, ja oj ulb'ajuk yuj ja ts'ujulu. Na'awik ja te' jawi, ja rey Nabucodonosori, a stukb'es ja jastal was neb'a sok a kumxuk ja jastal ja chante jumasa. Sok awik sk'ux k'ul, Mochowik sok kadena b'a yojol juke jab'il.

¹⁷ Ja yanjel jumasa ja Dyosi sneb'aweta oj ya'we stup jas muli. B'a jachuk spetsanil ja kristyano jumasa oj sna kechan ja niwan Dyosi wa stalnan spetsanil ja lu'umi. Wax ya och mandaranumil ja ma wa sk'ana ja ye'ni, sok wax ya och jel niwan ja ya'tel b'a jun chonab' jun winik ani ma jel ko'eluk.

¹⁸ —Ja it ja waychini, mini june ja ma jel sna'awe' b'ob' yal kab' jasun wa sk'ana yale. Jayuj ja we'n wax na'a oj b'ob' a k'uluk, yuj ja Yespiritu ja uniko Dyosi tey a mok—.

¹⁹ Jaxa Danieli jel wax cham sk'ujol ja jas wan ek'el b'a sk'ujoli, ja'yuj ti kan jak'ana. Jaxa ja mandaranumi ti spaya sok sb'i'ila, ti yala yab'a: —Mok chamuk a k'ujol Beltsasar. Ala kab' jasun wa sk'ana yal ja wayichi. Jaxa Danieli ti yala'a: —Wanikex k'ana ja ke'n ja jas wax yala ja wa wayichi ja wa sk'ana yal yuj ja wa matik mixa wi'ajb'a sok niwan mandaranum—

^20-22 Ja niwan te' sok jel ja yip a wila b'a wa wayichi, we'n jun xta. Niwan mandaranum jel niwan wajya ja wa niwanil jawi wax k'ot ajyi man b'a satk'inal. Ja jastal ja te' ya'ax lek ja spowil ajyi, sok spetsanile wa slo'owe ja sati, jachuka jastal jaw ajyiya niwan mandaranum we'n waxa wa'a wab'al ajyi spetsanil ja lu'umi, sok spetsanil ja kristyano jumasa wa sna'awe jastal jel ja wa wipi.

²³ —Ja b'a wa wayichi a wila ja b'a satk'inali wan ko'el jan jun anjel, wan yaljel ke'a kutsxuk ja te'i. Ab'i yawekan jas top sok ja yech jumasa, sok a smoche' sok kadena b'a yojol juke jab'il. Mi kechanuka, ja te'i t'ilan ti oj kan b'a yoj k'ul lajan sok ja chante jumasa.

²⁴ Ja jawi wa sk'ana yal ja Dyos it jel niwani sneb'a oj ya'wi wokol niwan Mandaranum.

²⁵ Ja we'n mixa ti oj ajyan sok ja kristyano jumasa, jaxa oj ajyan sok ja chante jumasa, sok ja oj ja k'ux ja k'ul ja jastal ja ye'nle'i. Ja oj nox jan sok ja tsujul wax ko b'a satk'inali, jach' oj ajyan b'a yojol juke jab'il, jachuk niwan Mandaranum oj ja na' kechan ja Dyos jel niwan wa sk'u'lan mandar b'a spetsanil ja lu'umi, sok kechan ye'n oj ya och mandaranumil ja ma wa sk'ana ja ye'n.

²⁶ —Ja te' it yawe kan jas top sok ja yech jumasa. Ja jawi wa sk'ana yal niwan Mandaranum oj cho kumxan b'a oj ja wa wab'ali, jaxa ja yajni a wilata ja yip ja Dyos b'a satk'inali.

²⁷ —Ja ke'n oj ka'a na' niwan Mandaranum akan sk'ulajel ja b'a kistali, sok koltan ja kristyano jumasa jel ajula sb'aje sok mi jas yi'oje'i. B'ob'ta ja jachun niwan Mandaranum jel tsamal oj ajyan.

²⁸ Ja jas alji yab' ja Mandaranum Nabucodonosor yuj ja Danieli k'otni smeranila.

²⁹ Ek' jun jab'il, ja Mandaranumi ti wan paxal ja b'a sniwan snaj

³⁰ ti wax yala: —Jel niwan ja Babilonia. Ke'nani ja ma jel niwan ya wajuke sok jel tsamali, b'a oj je'yi ja kip b'a spetsanil ja kristyano jumasa b'a lu'umi—

³¹ Ti'to wan k'umal ja mandaranumi, yajni yab' jun k'umal ja b'a satk'inali ti alji yab'a: Mandaranum Nabucodonosor, ja yan oj elan mandaranumil.

³² Mixa ti oj ajyan sok ja kristyano jumasa, ti oj ajyan sok juke jab'il ja chante jumasa. Oja ja k'ux po'o b'a k'ul ja jastal ja ye'nle'i, man oj ja na' ja Dyos jel niwani kechan ye'n Mandaranum ja b'a lu'um iti. Kechan ja Dyos oj b'ob' ya och Mandaranumil ja ma wa sk'ana ye'n oj ya och Mandaranumili—.

³³ Ja k'umal yab'i juts'in ni ch'ak k'ot smeranila, ja Mandaranumi ya'kan smojtajel ja kristyano jumasa. Wax k'uxu ak' ja jastal ja swaw wakaxi, ja wax noxji sok ja tsujul wax ko b'a satk'inali. Jas tso'otsil ja s'olomi lajan sok jas k'uk' mal ja liklik, jaxa yech jumasa lajan sok jas b'a yal chan jumasa.

Ja Nabucodonosori tojb'i pilan majke

³⁴ Yajni ek' ja juke jab'ili, jaxa ke'n jna'a jastal ayon. Ja'yuj ti jk'ela ja b'a satk'inali ka'yi ts'akatal ja Dyos jel niwan sak'an spetsanil k'ak'u. Jtoyo ti kala: Jawa wipi mi oj ch'akuk, jaxa b'a waxa k'u'lan mandari mini ay stik'anala.

³⁵ Ja b'a sti wa sati, mini jas oj b'ob' k'ultikon ja janek' ti aytikon b'a lu'umi. Ja we'n waxa k'u'lan ja jas waxa k'ana oj ja k'ul sok ja wa soldado jumasa b'a satk'inal sok ja ma'tik tey b'a lu'umi. Mini ma oj b'ob' k'e kontra amok ja we'na, sok mini ma oj b'ob' yal mi lekuk ja jas waxa k'u'lani.

³⁶ Yaj ni ch'ak kal ja jastal iti juts'in tojb'i yon ja jastal mix na'a jastal ayoni sok cho sta'a ja jastal jel niwan wax k'u'lan mandar ajyi. —Cho kumxiyon jun xta ja jastal ja b'ajtani— Spetsanil ja ma wax ya'a rasoni ja olomal jumasa jak ya'tel tayone, cho jel niwan wajyon ja jastal ja b'ajtani.

³⁷ Ja'yuj wa sts'eb'oj taj sok wax toyo ja Mandaranum b'a satk'inali, yuj ja spetsanil ja jas wa sk'u'lani lek tojb'ela. Ye'n ja Dyos jel toji, wax ya ch'in b'uk jama jel niwan wax ya'a sb'aji. Ke'n wax kala, Mandaranumon Nabucodonosor—.