Daniel 3 - Ja yab'al ja Dyosi

Ja kristyano jumasa wa stoyowe ja jas it sk'uluneje sok k'anal tak'ini

¹ Ja Mandaranum Nabucodonosori sjek'a sk'ulajel jastal jun winik toj k'anal tak'in. Ja jastal winik jawi, ay yi'oj jun tajb'e sok lajune metro jas cha'anili, oxe metro jas sati, ti waj ajuk tek'an b'a loman yaman b'a Dura it tey b'a lu'um jumasa b'a Babilonia.

^2-3 B'a oj sje' ja jastal jaw sk'u'lane'i, ja Mandaranumi, ch'ak stsom spetsanil ja ma'tik jel niwak ja ya'tel wax a'tiji sok b'a wax kulani. Yajni tixa tsoman ja jaw jumasa,

^4-5 Ay ma' yala jastal ita: Ja ma'tik tey ili, ay ma' ti jakele b'a tuktukil chonab' jumasa, sok wax k'umaniye tuktukil k'umal. A petsanil ja we'nlexi, jach'ni we'n Mandaranum Nabucodonosor wax alxi a wabyex maklayik lek jastal oj k'inanuke, ja ma'tik oj ya ok'uk ja sk'ine'i. Yajni xa wabyex ja yok'el ja k'ini, apetsanilex ja we'nlexi, jel t'ilan oj ja nujts'uk ja wa satexi man oj sta' ja lu'um ja wa patanex b'a oj ja toy'ex ja it sjeka sk'u'lajel ja Mandaranumi.

⁶ Ja ma mix ko mek'an b'a oj stoy ja k'u'lub'al jastal jawi, oj jipxuk juts'in b'a jun orno wan ajlel—.

⁷ Jach' waj jastal jawa. Yajni yabye ja kristyano jumasa ja yok'el ja k'ini spetsanile ch'ak ko'uke mek'an b'a stoyjel ja k'u'lub'al jastik jaw sok k'anal tak'ini. Jayuj ja judio jumasa mis k'u'ane ja ab'ali,

⁸ chab' oxe babilonio jumasa waj yalwe yab' ja Mandaranumi b'a waj schon'e' ab'al.

⁹ Ti yalawe yab'a: —Wax k'anatikon niwan ajwalal ajyuk jitsan jab'il jawa sak'anili—

¹⁰ Wax na'atikon we'n awa'a jawa wab'al b'a oj toytikon ja k'u'lub'al jastal jaw sok k'anal tak'ini, juts'in oj ko'kotikon mek'an ja yajnix kab'tikon ja yokel ja k'ini.

¹¹ Cho jach'ni wax na'atikon ja ma' mi oj sk'u'uki oj jipxuk b'a jun orno wan ajlel.

¹² Jayuj ay chab' oxe judio mis kisawa niwan Mandaranum, sok mi ni stoyowe ja dyos yujile'i, sok mi sk'anawe oj ko'uke mek'an b'a sti sat ja k'u'lub'al jastal jaw sok k'anal tak'ini. Mi ja'uka niwan Mandaranum awa'oj yi jun niwan ya'tele sok ja b'a ma wax ya'a yab'al b'a Babilonia. Wa'ntikon k'umal yuj ja Sadrak, Mesac sok ja Abed-nego—.

¹³ Yajni yab' ja jastal it ja Mandaranum Nabucodonosori, jel tajki yala ke'a i'juk ochyi ja oxwane Judio jawi. Yajni k'otye ja b'a sti sat ja Mandaranumi,

¹⁴ ja ye'n ti sjob'o'a: —Jna'ata ja we'nlexi mixa toyowex ja dyos jumasa sok mixa k'anawex oj ko'anik mek'an ja sti sat ja k'u'lub'al jastik jaw sok k'anal tak'ini. ¿Ja jastal jawi meranima'a?

¹⁵ Oj ka'awi'ilex jun majke smoj. Ja yajni xa maklayex ja yok'el ja k'ini, ta ko'yex mek'an b'a oj ja toy'ex ja k'u'lub'al jastik jawi, mi jas oj k'uluka wi'ilex. Jayuj ta mixa toyowex, oj ka ja ab'al oj aji ochanik juts'in b'a orno. —Ti oj ja wil'exa mey Dyos b'a oj skoltayex—

^16-18 Jaxa Sadrak, Mesac sok ja Abed-nego ti yalawe'a: —Niwan Mandaranum. Yuj ja jawi mini t'un wax cham jk'ujoltikon yuj ja. Ta yuj k'a jach' wa sk'ana ja Dyos wax toyotikoni, yujni oj b'ob' ya elkotikon ja b'a k'ak'a' sok ja b'a wa wip we'n niwan Mandaranum. Jayuj ta mik'a sk'ana oj sk'u'luk, ja ke'ntikoni mix neb'atikon oj toytikon ja jastik jaw k'u'lub'al sok k'anal tak'ini.

Ja Dyosi skoltan ja b'a yoj k'ak' ja oxwane keremtiki

¹⁹ Yaj ni smaklan ja Nabucodonosor ja jastal iti, jel tajki sok ja oxwane keremtik jawi yala ke'as k'ixnaye lek ja janek' oj b'ob' k'ixnajuk ja orno.

²⁰ Tsa'an ti yal yab' jas winik jumasa jel tsatsi ke'a smoche' ja keremtik jumasa jawi sok ayawe och yoj k'ak'.

^21-22 Ja swinik ja Mandaranumi smochowe juts'in ja Sadrak, ja Mesac sok ja Abed-nego. Yuj ja Mandaranumi wa sk'ana oj yawe och b'a yoj orno, ja swinik ja Mandaranumi ya'we kan sok ja jun xta sk'u'e lapan yujile jel cha'an sts'akoli. Jayuj ja orno jel jelxel jas k'ajk'ali, ja'yuj ja juts'in jawi sjip'e ko ja oxwane keremtik ja b'a orno, lajiye yuj ja k'ak' jas winik ja Mandaranumi ch'ak miljuke.

²³ Jaxa ja keremtiki ja ye'nle'i mochane lek mokyeko ja b'a yoj orno.

²⁴ Yaj ni yila ja Nabucodonosor ja jastal iti, k'e juts'in ti sjob'oyi ja ma'tik wax ya'a konsejo: —Wax na'a ja keremtik ke'a wa'wex och b'a orno oxwane, sok yoxwanile mochanelek. —Jach'ni jastal jawa —xchi ja ma'tik wax ya'a konsejo.

²⁵ —Ja'yuj —ti yala ja Mandaranumi—, ¿Jastal ay b'a jaxa ja ke'n wax kila chanwane'e? Spetsanile nakaxa tukane, sok wane paxyal ja b'a yoj orno, sok mini jas wa sk'u'lane'a. Mi kechanuka, —ja b'a schanil keremi oj slaj jastal jun anjel—

²⁶ Yaj ni yala jastal iti, ja Nabucodonosori ti och mojan ja b'a orno ja janek' xb'ob' yujili, Ti awani'a: Sadrak, Mesac sok Abed-nego, ya'tijumex ja niwan Dyosi, —elanik ja tiwi— Jaxa oxwane keremtiki ti elye ja b'a orno.

²⁷ Ti'xa joyb'ajiye el yuj spetsanil ja kristyano jumasa b'a jel niwan ja ya'tel yuj ja Mandaranumi, jel cham k'ujol kanye yuj ja mi jas k'ulajiye' yujil ja k'ak'i. Me'x tsik jas ts'umile'i sok jas tso'otsil ja s'olome'i, —mini jas k'u'e'i mey yik'il tsikel—

²⁸ Ja'yuj ja Mandaranumi ti yala'a: Sts'akatal ja Dyos yuj ja Sadrak, ja Mesac sok ja Abed-nego, yuj jas jeka ja yanjel b'a oj skoltani. Jachuk ja ye'nle'i jel sk'u'ane ja Dyos yujile'i, mis k'u'ane ja k'ab'ali. —chapan aye' b'a oj chamuke ajyi yuj ja b'a oj sk'u'uke pilan dyos jumasa—

²⁹ —Me'y pilan dyos oj b'ob' sk'u'luk ja jastal sk'u'lan ja Dyos yujile' ja keremtik jumasa iti. Ja'yuj wax ka'a ja ab'ali, ja ma oj k'umanuk sb'aj kistal ja Dyos jawi oj k'utsxuk xe'ntiyaman, jaxa snaji a kan jastal snaj ts'i'lel. —Chikan b'a jakela chikan jas k'umal wax k'umani—

³⁰ Mi kechanuka, Ja Nabucodonosori ya'yi ya'tel b'a jel niwak ja oxwane keremtik iti ja b'a oj ya' yab'al b'a Babilonia.