Daniel 2 - Ja yab'al ja Dyosi

Ja swayich ja Nabucodonosori

^1-2 Jun majke ja Nabucodonosori swaychin jujuntik jastik junuk jel tuk kani, mixa b'ob' ochuk ja swayeli. Ja'yuj ti sjeka spayjel spetsanil ja ma'tik jel sna'a sok ja k'intanum jumasa it tey b'a kulana, yuj ja wa sk'ana oj aljuk yab' jasun wa sk'ana yal jas wayich jumasa. Ja yajni ek' ja iti, ja Nabucodonosori ay xa chab' jab'il mandaranum ay. Jaxa ma'tik jel sna'a sok ja k'intanum jumasa wajye ja b'a sti sat ja mandaranumi,

³ ja' xa mandaranumi ti alji yabye yuj ja: —Ay jas waychin sok jel xcham jk'ujol yuj ja mi xna'a jasun wa sk'ana yali.

⁴ Jayuj ja ma'tik jel sna'a wax k'umani ye arameo, jach' sk'umane ja mandaranum sok ja k'umal jawi: —Ja ke'ntikoni ti ayotikon b'a oj ka'teltayatikon niwan ajwalal, sok wax k'anatikon oj ek' awuj jitsan jab'il ja b'a wa sak'anali. Niwan ajwalal ta wan k'axa wala kab'tikon jasunka ja waychini, ja ke'ntikoni oj kaltikon a wab' jasun wa sk'ana yale.

^5-6 Jaxa mandaranumi ti yala'a: Neb'ata jasun oj k'uluk. Ja we'nlexi ta wan k'axa walawex kab' jasunka waychini sok jasunk'a wa sk'ana yale. Jel jitsan ja jas jun oj k'eb'awilexi sok oj kal yab' spetsanil ja kristyano jumasa jel oj toyjanik. Jayuj ta mik'axa walawex kab' jasunka waychini sok mini ja jasun wa sk'ana yali, oj jek milumanex sok xe'ntiyaman oj ch'ak a'ji elanik jaxa wa najexi oj kan jastal b'a wax jipxi ts'i'lel. Ja'yujil ja lek alawik kab' jasunka waychini sok jasunka wa sk'ana yali.

⁷ Jaxa ma'tik jel sna'awe'i ti cho yalawe'a: —Merani'a niwan ajwalal oj ma b'ob' a wal kab'tikon jasunka a waychini, jaxa ke'ntikoni oj kaltikon awab' jasunka wa sk'ana yali.

^8-9 Jaxa mandaranumi ti yala: —Wax k'u'an ja we'nlexi kechan b'a waxa wa'wex eki k'ak'u Wa'nex slajel b'a oj ja walwex kab' spetsanil le'uj ab'al. Jayuj ja jas jk'uluneji mi oj tukb'uk. Alawik kab' jasunka waychini, sok jachuk oj jna'e oj ni a na'ex jasunka wa sk'ana yala. Ta mik'axa walawex kab'i oj jek ex b'a oj a'juk awi'ex lek wokol apetsanilex.

¹⁰ Jaxa ma'tik jel sna'awe'i wa sle'awe jastal wa skoltan sb'aje: Mini jun mandaranum, a'nima jel niwanuk ja yipi, b'a wa sk'anayi ja ma'tik jel sna'a sok jas k'intanum jumasa b'a oj yal jastik junuk b'a jel wokol. Sok cho mini mach' ay ja b'a lu'umi oj b'ob' jak sk'ujol ja jas wa sk'ana sna' ja niwan ajwalali.

¹¹ B'ob'ta ja dyos jumasa oj b'ob' aljuk yab'i, —Jaxa ye'nle'i mi ti ayuke b'a lu'um iti—

¹² Yajni yab' ja jastal it ja Mandaranumi, jel k'e jas stakeli sjeka miluman spetsanil ja ma'tik jel sna'awe ti aye' b'a Babilonia,

¹³ cho jach'ni sle'a ja Daniel sok ja matik lek wa xyi'ab'a soki b'a oj smil'e'.

Ja Danieli yala yab' jasun wa sk'ana yal ja wayich ja Mandaranumi

¹⁴ Ja ma' jel niwan ja ya'tel yuj ja soldado jumasa ja mandaranumi sb'i'il Arioc, mixa wax kan k'ak'u b'a oj ch'ak smil spetsanil ja ma'tik jel sna'a b'a Babilonia,

¹⁵ Jaxa Danieli, waj yile, sle'a jastal sjob'oyi', jas yuj ja lom ya'a yab'al oj ch'ak miljuk spetsanil ja ma'tik jel wa sna'awe'i. Yajni ja Arioc yala ja sb'ej ja ab'al jawi.

¹⁶ Jaxa Danieli ti waj skum sb'aj sok ja Mandaranumi waj sk'ap sb'aj b'a oj yal yab' jasun wa sk'ana yal jas wayichi cho yal yab'i sok ja jawi wa sk'ana t'usan k'ak'u.

^17-18 Tsa'an ti waj b'a snaja, ch'ak yal yab' ja yamigo jumasa ja jas wan ek'eli. Cho yala a sk'umuke ja Dyos yuj ja ye'ni, b'a mi jas oj ek' yuj kistal ja ye'n sok ja ye'nle'i, sok ja ma'tik jel sna'a b'a Babilonia.

¹⁹ Ja jun xta a'kwal jawi, ja Dyosi skoltan ja Danieli yal yab' jasun wa sk'ana yal ja wayichali. Ja'yuj ja Danieli sk'anayi ts'akatal ja Dyos jastal iti:

²⁰ Dyos kuj, kechan we'n jel xa na'a sok jel niwana. —Jelni niwana b'a spetsanil k'ak'u—

^21-22 We'n ja Dyos b'a jas wax ek'i. Spetsanil ja jas wax ek' ja b'a lu'umi yujni waxa k'ana jach' oj ek'uka. Ay ma wax wa och b'a oj ya' yab'al, sok pilan ja ma wax wa elyi jas choli. We'n wax wa jul sk'ujol b'a oj sna ja ma'tik jel sna'a ja jas mix ab'xi sb'ej b'a jel wokoli. Ja b'aya ja we'ni mix ajyi axub', yuj ja we'nani ja sakal k'inala.

²³ Ja we'n, ja Dyos yuj ja jnan jtati, wax kawi ts'akatal sok wax toyowa, yuj ja waj na'e ja jasun swaychin ja Mandaranumi.

²⁴ Tsa'an sok ja jawi, ti waj sk'umuk ja Arioki ti yala yab'a: Lek ja mito ma'xa mila, i'ajon b'a oj k'um b'aj sok ja mandaranumi. Ke'n oj kal yab' ja jasun wa sk'ana yal jas wayichi—.

²⁵ Ja'yuj ja Arioki ti yi'aj och ja Daniel b'a sti sat ja Mandaranumi, ti yala yab'a: Ti ki'oj jan il jun yal kerem, it ki'ajtikon jan b'a Juda. Wax yala ja ye'n oj b'ob' yala wab' ja jasun wa sk'ana yal ja wa wayich niwan ajwalal—.

²⁶ Ja b'a Babilonia ja Danieli wax na'ji sb'a Beltsasar jas b'i'ili. Jaxa Mandaranumi ti yala yab' ja Danieli: —¿We'n a ma ja oj ja wal kab' jasunka waychini, sok ja jasun wa sk'ana yal ja wayichi?

²⁷ Jaxa Danieli ti yala'a: —Mini jun ma jel sna'a sok mini jun k'intanum oj b'ob' sna' ja jasun waxa k'ana oj ja na' niwan Mandaranum.

^28-30 Cho jach' jun xta ja ke'n, mi masuk wax na'a ke'n yuj ja tuk jumasa. Jayuj ja b'a satk'inali ay jun Dyos wax ch'ak sna' spetsanil ja jas mix na'xi. —Ja yaj ni wa'na wayel niwan ajwalal, jel waxa neb'a ja jas ojto ek'uki cho ti och waychinana. Lek ay, Ja Dyosi sje'awi niwan ajwalal ja b'a wa wayich ja jas ojto ek'uki. Jaxa ke'ni ya'ta jna' ja jasun wa sk'ana yal ja wa wayich jumasa.

³¹ —Niwan Mandaranum a waychin wan mok'el ja jastik junuk jel niwan sok jel kistal, jaxa we'n jel wala xiw yujil.

³² Ja s'olom ja jastik jawi toj k'anal tak'in, jaxa sni sk'ujol sok jas k'ab' jumasa toj sakal tak'in, jaxa yoj slukumi sok ja yechmal jumasa toj kobre,

³³ ja'xa yechmal jumasa toj tak'in. —Ja'xa ja yoki sokan sok tak'in sok lokok—

³⁴ —Niwan ajwalal yajni wa'na ske'ljel ja niwan jastik junuk jawi, jun ton mi ma wa sjipa, jak tseleluk, jak smak' sb'a sok b'a yok ja jastik jawi, —Jaxa k'u'lub'al jastik jawi ti mok'a—

³⁵ Spetsanil ja tak'in k'u'lub'al sok ja jastal yiljel jawi xe'ntiyam ch'ak wajuk. Ti jak jun tsatsal ik'a, ch'ak yi'el spetsanil lajan sok jastal ts'i'lel. Mixani jas tax ja b'a k'u'lub'al jastik jawa. Jaxa ton spak'tsun sb'aj sok ja k'u'lub'al jastik jawi k'ot jun niwan yaxk'ul. —Jel niwan wax ch'a sb'ut' spetsanil ja lu'umi—

^36-38 —Ja wa wayich it niwan ajwalal wa sk'ana yale we'na ja mandaranuma jel niwana yuj spetsanil ja mandaranum jumasa. Niwan ajwalal we'na ja toj k'anal tak'in wa olomi, ja Dyos b'a satk'inali ya ochan mandaranumil sok yawi jitsan ja wa wipi b'a spetsanil ja kristyano jumasa tey b'a lu'umi, sok spetsanil ja chante jumasa tey b'a lu'um sok b'a satk'inali.

³⁹ —Tsa'an sok ja we'n niwan ajwalal oj ajyuk pilan Mandaranum, jayuj mey yip ja ye'n yuj ja we'ni. Tsa'an oj cho jak pilan b'a yoxil Mandaranum, ja wa sk'ana yal ja kobre, oj ya' ja yab'al b'a spetsanil ja kristyano jumasa.

⁴⁰ Tsa'an oj jak pilan Mandaranum ja yi'oj ja yip jastal ja tak'ini. Ja mandaranum iti oj b'ob' yuj, sok ja tuk mandaranum jumasa, ja jastal ja tak'in wax b'ob' yuj sok ja pilan tak'in b'a mi tsatsuki.

^41-42 —Niwan Mandaranum a wila ja b'a wa wayichi ja yok jumasa ja jastik jaw k'u'lub'ali ay yi'oj tak'in sok lokok. Ja jawi wa sk'ana yale ja b'a ch'akulab'il Mandaranumi mi junuk xta oj ajyuke. Tsats ni oj ajyuk ja jastal ja tak'ina jayuj cho me yip jastal ja lokoki.

⁴³ Ja sokan tak'in sok lokok b'a yoki wa sk'ana yale ja Mandaranum jawi wa sk'ana oj ajyuke lajan. Ja jastal jawi oj b'ob' nupanuke b'a smoj alijel sb'aje b'a tuktukil Mandaranum. Jayuj mix b'ob' sta sb'aj ja tak'in sok ja lokoki, cho jach' jel wokol oj ajyuke lajan ja Mandaranum jawi.

⁴⁴ —Mi kechanuka, ja k'ak'u jumasa jaw ja Dyos b'a satk'inali oj sjek jun Mandaranum oj ya'a yab'al b'a spetsanil k'ak'u, mi ma oj b'ob' yuj sok. Ye'n ja ma oj sjom ja pilan mandaranum jumasa.

⁴⁵ Ja wa sk'ana yal ja ton it mi ma sts'elpuni, sch'aka ja jastik jaw k'u'lanub'ali. —Niwan Mandaranum, ja it ja jas wa sk'ana oj ja na' ja niwan Dyos ja b'a ojto ek'uki. Jach' a waychin jastal iti sok ja wa sk'ana yal ja jastal kalata awab'i, sok spetsanil oj ek'uk ja jastal kalata awab'i.

⁴⁶ Yajni yab' ja Mandaranum Nabucodonosor ja jastal iti, sjipa sb'aj b'a lu'um was neb'a oj stoy ja Danieli. Mi kechanuka ya'a ja yab'al ke'as k'eb'eyi ja smajtan ja Danieli, jastal Dyos.

⁴⁷ Tsa'an ti yala yab' ja Danieli: Mi jas x'ek' jk'ujol. Jawa Dyosi ja ni Dyos yuj b'a spetsanil ja dyos jumasa; —Ja ni smandaranum b'a spetsanil ja mandaranum jumasa— Ja ye'n wa sna'a spetsanil, ja'yujil ja we'n b'ob' awal kab' ja wayich it mi max b'ob' yal kab'i.

⁴⁸ Jaxa mandaranumi ya'yi jitsan smajtan b'a jel a'ay sts'akol, sok st'ojo b'a oj och Mandaranumil b'a spetsanil ja Babilonia sok olomalil b'a spetsanil ja ma'tik jel sna'a.

⁴⁹ Ja'yuj ja Danieli sk'anayi ja Mandaranumi a ya'yi ja matik wa xyi'ab'a soki jun schol b'a jel t'ilan. Ja'yuj ja Sadrak, ja Mesac sok ja Abed-nego k'otye b'a oj sk'el'e' ja Babilonia. Jaxa ye'n ja Danieli ti kan b'a snaj ja mandaranumi.