Daniel 11 - Ja yab'al ja Dyosi

Ja tiro'anel b'a stojol k'e'el k'inal sok b'a ko'el k'inali

¹ Jaxa winik jawi ti cho yala kab'a: B'a yojol ja sb'ajtanil jab'il wan yajel yab'al ja Dario b'a Media, ke'n jkoltaya sok ka'a ja wa wipi'.

² Sok ja Persia ayto yi'oj oxe mandaranum. Tsa'an oj jak jun schanil mandaranum, jel ja jastik sb'aj ja ye'n yuj ja oxe ek'ta. Jel ja jastik sb'aji sok jel ja yip oj snol k'ab'uk ja niwan chonab' Gresia.

³ —Tsa'an oj cho jak pilan mandaranum b'a jel tsats, oj ya' yab'al tsats lek, sok oj sk'u'luk ja jas wa sk'ana oj sk'u'luki.

⁴ Yaj ni lekxa lek ay ja b'a oj ya' yab'ali, ti oj ch'ak sne'jela sok oj spil chane parte. Ja mandaranum iti mi oj ya' kanyi ja yip ja yuntikili, sok mixani oj ajyuk yip ja jastal ja b'ajtani, yuj ja b'a wa xya'a yab'al jaxa b'a slu'um ja ye'n oj ya' yab'al pilan mandaranum jumasa.

⁵ —Ja mandaranum b'a ko'el k'inali jel niwan oj wajuk june ja olomal yuj jas soldado jumasa oj ajuk yi yuj ja oj ya laman jitsan niwak chonab' jumasa sok ch'in chonab' jumasa.

⁶ Tsa'an sok chab' oxe jab'il, ja mandaranum b'a k'e'el k'inal sok b'a ko'el k'inali oj sta' sb'aje ja yipe'i. B'a oj ajyuke laman ja ye'nle'i, ja mandaranum b'a k'e'el k'inali oj nupanuk sok ja yunin ak'ix ja mandaranum b'a ko'el k'inali. Jayuj ja sneb'jel yujile iti mi oj el lek yuj ja oj miljukyi ja yunin yuj jas tatami, lajan sok ja yunin winik sok ja a'tijum jumasa.

⁷ —June jas moj alijel jumasa ja mandaranum b'a ko'el k'inali oj tiro'anuk sok jas soldado jumasa ja mandaranum b'a k'e'el k'inali oj b'ob' yuj; ti oj yi'kan ye'n ja b'a wa sk'u'lan mandar ja mandaranumi, sok jas soldado jumasa oj ch'ak ya laman.

⁸ Oj ch'ak yi b'a Egipto jas tak'in dyos jumasa sok pilan jastik junuk jumasa b'a k'anal tak'in sok sakal tak'in. Ja jastal jawi oj alb'uk jitsan k'ak'u mi ajyuk tiro'anel b'a ye'nle ja chab' mandaranum jumasa iti.

⁹ —Yaj nix ek' ja k'ak'u, ja mandaranum b'a k'e'el k'inali oj sle jastal oj tiro'anuk sok ja mandaranum b'a ko'el k'inali, jayuj t'ilan oj kumxuk b'a jun xta schonab'il.

¹⁰ Jaxa yuntikil jumasa ja mandaranum b'a k'e'el k'inali jel oj tajkuke oj stsom'e jitsan soldado b'a oj tiro'anuke sok ja mandaranum b'a ko'el k'inali. Oj snol k'ab'uke, sok oj k'otuke man b'a wa sk'u'lan mandar ja mandaranumi. Ja jastal wajume'i oj ch'ak sch'ak'e' spetsanil, ja jastal jun niwan ja' wax el ja b'a yuk'mali.

¹¹ —Yaj ni wan ajyel ja tiro'anel jawi, ja mandaranum b'a ko'el k'inali jel oj k'e jas takeli. Ti oj eluka b'a oj tiro'anuk sok jas soldado jumasa ja mandaranum ja b'a k'e'el k'inali, yajni b'ob' yuj spetsanil.

¹² Sok jastal b'ob' yuj ja mandaranum b'a ko'el k'inali jel niwan oj ya' sb'aj. Jaxa niwanil jawi mi oj alb'uk jitsan k'ak'u,

¹³ Yuj ja mandaranum b'a ko'el k'inali oj schap jun nole soldado jel a'ay sok jel chapan lek yuj ja b'ajtani, yajnix ek' chab' oxe jab'il oj cho snol k'ab'uk ja mandaranum b'a ko'el k'inali oj b'ob' yuj.

¹⁴ —Ja k'ak'u jumasa jawi jitsan ja ma oj sta sb'aj sok ja mandaranum b'a k'e'el k'inali b'a oj tiro'anuke sok ja mandaranum b'a ko'el k'inali. Ja jastal awila ja b'a wa wayichi, b'a ye'nle ita oj el jujuntik israelenio b'a jel kistale'; jayuj mi oj ekyujile lek, mi oj b'ob' yuj ja ye'nle'i.

¹⁵ Ja mandaranum b'a k'e'el k'inali oj sk'ul jun sk'ejlub' te' b'a sjoyanal ja chonab' makan sok cha'anil ts'akab' ton, ti oj k'e'uk ja b'a scha'nil ts'akab' toni b'a oj tiro'anuk sok. —Mini ja soldado jumasa b'a jel tsatse'i b'a ko'el k'inali oj b'ob' komxuk yujile ja soldado jumasa skontra'e'i—

¹⁶ Ja mandaranum ma wan le'waneli oj sk'u'luk ja jas wa sk'ana, sok mi ma oj sk'an oj syam sb'aj sok ja ye'ni. Oj ch'ak sch'ak sna'jel ja jastik oj sta ja b'a oj ek' ochi, sok ti kan ja b'a lu'um b'a jel tsamali.

¹⁷ —Ja mandaranum b'a k'e'el k'inali oj sle jastal oj yi' spatik ja mandaranum b'a ko'el k'inali. B'a oj kan sok ja b'a wa xya'a yab'ali, oj sk'ul pirmar jas lamanili sok oj ya el yib' k'ab'al ja yunin oj nupanuk sok ja ye'n. Jayuj ja jas chapan yujile'i mi lek oj wajke sok.

¹⁸ Ja'yuj ti oj snol k'ab'uk ja chonab' jumasa it tey b'a sti paman niwan ja'i, sok jitsan ja jaw jumasa oj sb'ajuk. Jaxa jun smandaranum ja soldado jumasa oj sch'ak spetsanil ja iti, sok jel oj ya k'ixwuk ja mandaranum b'a k'e'el k'inali.

¹⁹ Jachuk ja mandaranum b'a ko'el k'inali kumxi ja b'a wa sk'u'lan mandari, jayuj jun ch'ay k'ujol sloko yok chami, mixani ma oj sta ti mas ja ye'n.

²⁰ —Ja b'a ya'teli och pilan mandaranum, b'a oj sta jitsan ja jastik sb'aji sjeka june ja ya'tijum jumasa b'a oj stajb'an ja b'a wax chonxi jastik junuki. Jayuj mi oj ek k'ak'u oj chamuk, a'nima mi ti'uk b'a tiro'anel.

²¹ —Tsa'an yuj ja mandaranum jawi oj jak june jel kistal, mi sb'ejuk oj och mandaranumil, jayuj ojni ochuka yuj lo'lanel, sok mini ma oj sna' ja jas wa sneb'jel oj sk'u'luki.

²² Ja mandaranum kistal jawi oj sch'ak sna'jel ja soldado jumasa skontra'e'i, cho jach'ni ja ma mi tukuk it sk'u'lan sok jun trato.

²³ Oj cho slo'lan ja ma jel lek xyila sb'aj soki, a'nima mey yi'oj jitsan soldado ojni sta ja jas was neb'a.

²⁴ Ja kistal winik jawi junta ch'ay k'ujol oj sb'ajuk ja lu'um jumasa b'a jel x'ayi jas b'a'al ja b'a lu'um, sok oj sk'u'luk ja jas mi sk'u'lan jas nan stat sok jas tat aweli: oj ch'ak spilyi jas soldado jumasa ja jastik jel sta'awe ja b'a tiro'aneli, sok oj schap'e' b'a oj tiro'anuke sok ja chonab' jumasa jel talnanub'ali. Jayuj ja iti mi oj alb'uk jitsan k'ak'u.

²⁵ Mi ja'uka, jel niwan oj yab' sb'aj sok jas soldado jumasa, oj snol k'ab'uke ja mandaranum b'a ko'el k'inali. —Jayuj ja mandaranum b'a ko'el k'inali oj syam sb'aj sok ja jach' sok ja yipi, b'a oj skoltan jas soldado jumasa it jel niwake sok jel ja yipe'i. Jaxa ja mandaranum iti, oj i'juk spatik mi oj b'ob' kuch yuj ja oj nol k'ab'ijuk yuj ja matik mi xyi'ab'a soki.

²⁶ Ja ma' jel lek xyila sb'aj sok, ja ma wa sloko wa'el ja b'a jun xta smesa ye'n oj miljuk yuj. Jachuk jas soldado jumasa oj ch'ayuke ja b'a tiro'aneli, sok jitsan soldado oj sch'ay jas sak'anile'i.

²⁷ —Ja chab' mandaranum jumasa iti oj ochuke kulan wa'el b'a jun xta mesa, jayuj kechan b'a oj sk'u'luke b'a oj sk'ul sb'aje kistal. Ye'nta oj slo'lan sb'aje, jayuj mini june ja ye'nle oj sta'e ja jas wane sneb'jeli, yuj ja mito ja'uk ja sk'ak'u'ili.

²⁸ Tsa'an yajnix k'ot smeranil ja jas chapawe'i, ja mandaranum b'a k'e'el k'inali oj kumxuk b'a schonab'il, oj ch'ak yi spetsanil ja jas el yuj b'a tiro'aneli. —Yajnix ek' ja k'ak'u, ja mandaranum b'a k'e'el k'inali mi oj sk'ul meran ja trato b'a slamanil sk'u'lane'i.

²⁹ Mi ja'uka, ja yajni jel tsamal aye'i oj tiro'anuk sok ja mandaranum b'a ko'el k'inali, kechan yuj ja ek'ele' iti mi oj b'ob' yuj.

³⁰ Sok barco oj jakuke jitsan soldado b'a stojol wax och ja k'ak'u, oj nol k'ab'i juke yuj. Ja it jumasa jel oj a'ji xiwke yuj, oj spak'e' ajnel. Jachuk ti oj skis'e' ja ma'tik oj och ya'tijumili, mi sk'u'lane meran ja trato b'a slamanili. Jel jas tajkel ja'yuj jel ja jas oj sk'u'luk b'a tsats lek yuj ja trato jawi.

³¹ —Ja soldado jumasa mi oj skis'e' ja snajtsil tsomjel sok mini ja chonab' makan sok cha'anil ts'akab' toni. Mi oj sk'an'e' b'a oj ya'we ja majtanal it wax ya'we jujune' k'ak'u, jaxa b'a wax yawe'i oj yawe jun jastik b'a jel kistal.

³² Ja mandaranumi oj sle jastal oj sta jas lekil ja ma'tik mi sk'u'lane ja trato b'a slamanili, jaxa ja ma'tik wa sk'u'an ja Dyosi tojni oj ajyuke'a sok mi oj skis'e'.

^33-35 —Ja ma'tik wa sje'a ju'un b'a chonab' jumasa oj sje'e' yi jitsan kristyano jumasa b'a toj oj ayuke sok ja Dyosi, a'nima wax tsajlajiye. Jayuj ay chab' oxe ja ye'nle oj miljuke, jaxa tuki oj tsikjuke, sok ay ma oj ch'ak elk'ajuk yi ja jastik sb'aji. Jitsan ja ye'nle oj i'juke jastal yib' k'ab'al b'a tuk chonab' jumasa. Yajni wan ek'el ja iti, ojni koltajuke t'usana, a'nima jitsan ja ye'nle oj sta' sb'aje kechan yuj ja wa sk'anawe'i. Spetsanil ja iti oj ek'uk ja jastal jun schapjel, b'a oj b'ob' yujile ja pilan chonab' jumasa. Jaxa ja iti kechan t'usan k'ak'u oj alb'uk, kechan man oj k'ot stik'anal ja k'ak'u it yalunej ja Dyosi.

^36-37 —Ja mandaranum b'a k'e'el k'inali, oj ni sk'u'l spetsanil ja jas wa sk'ana'a. Jel niwan wax ya'a sb'aj wa sk'u'an sb'aj jel niwan ja ya'tel ja ye'n yuj spetsanil ja dyos jumasa. Man k'ot sta ti tsats lek ja Dyos merani. Spetsanil ch'ak el yuj lek, jayuj kechan ja man oj ya stup ja Dyosi, ja'yuj ja jas t'ilan wa sk'ana oj sk'u'luk ja Dyosi wani sk'u'lana.

³⁸ —Ja mandaranum iti oj stoy jas dyos ja kristyano b'a chonab' jumasa it lutan sok cha'anil ts'akab' toni, ja dyos mini ja snan stat sok jas tat awel stoyowe'i, ya'yi k'anal tak'in, sakal tak'in, tsamal ton jumasa sok jastik jumasa b'a jel cha'an sts'akol.

³⁹ B'a oj skoltaj ja chonab' jumasa it ik'ub'alxa kani, oj sk'an oj kolta juk yuj jun soldado oj stoy'e' pilan dyos jumasa. Spetsanil ja ma oj stoyi, oj ya'yi jun smajtan b'a jun ya'tel jel niwan sok niwan chonab' jumasa.

⁴⁰ —Yajnix k'ot tik'an ja k'ak'u, ja mandaranum b'a ko'el k'inali oj snol k'ab'uk ja mandaranum b'a k'e'el k'inali, jaxa ye'n ojni cho sjak' ja tiro'anela. Oj el b'a sti sat sok karro jumasa b'a tiro'anel, sok jitsan soldado jumasa kajan kawu, sok oj koltajuke sok jitsan barco. —Oj ko sb'aj spetsanil ja chonab' jastal yip jun tsatsal ik'—

⁴¹ Cho jach'ni sb'ajan ja lu'um jumasa b'a jel tsamali, sok jel jitsan oj smil ja kristyano jumasa; jayuj mi jas oj ek' sb'aje ja ma' tey b'a Edom sok b'a Moabi, sok mini ja ma jel a'ay ti aye' b'a Amoni.

⁴² —Jas soldado jumasa ja mandaranum b'a k'e'el k'inali oj ch'ak yi'ejan jitsan chonab' jumasa, mini ja Egipto oj b'ob' skoltan sb'aj.

⁴³ Ja mandaranumi oj ch'ak yi spetsanil ja jas ay b'a Egipto: ja k'anal tak'in, ja sakal tak'in sok spetsanil ja jastik jel yi'oji. Tsa'an yuj ja jawi, oj sb'ajuk ja Libia sok ja Etiopia.

⁴⁴ —Jayuj oj k'ot schikine ja kristyano jumasa b'a stojol wax jak ja k'ak'u sok b'a k'e'el k'inali, cho jel oj a'ji xiwuke. Jayuj jel oj tajkuke oj skan'e oj smil'e' jitsan kristyano.

⁴⁵ Ja'yuj ti oj sk'u'luk ja b'a oj ayuk ja soldado jumasa b'a yoj niwan paman ja' sok ma b'a syaxk'ul ja Dyosi, ja tey b'a lu'um jel tsamali. Ti oj k'ot tik'an tiw jas chamel ch'akelali, sok mini ma oj b'ob' koltajuk yuj ja.