Efésios 6 - Teusö Tä Waheta

Pö̃ töpö, pöpönö töpö, ulu töpö, ĩ na töpö kui, ĩ töpö na Paulo a hapalo nömöo noai ĩ ta

¹ Ulu pö! Jesus pata ma tä thapo kutenö, au hao a, au nao a, ĩ na töpö kui töpö a hiniö! Ĩ ma töpö a hini wi ĩ tä topa.

^2-3 ‑Ĩ na wa kua kuköma, toitai wa kutio kitäö!‑ ĩ na Teusö anö nö patapö töpö noa thaa soma noai, pi na ĩ ta kuuma: ‑Au hao a, au nao a, ĩ na töpö kui wa töpö a hini totio kuköma, toitai wa kutio kitäö! Toitai wa kutiki nö, masita tä uli ha wa kua soa tä, wa patasipöa totiso kitäö!‑ ĩ na Teusö a kuuma.

⁴ Pö̃ makö, pöpönö makö, ĩ na makö kui makönö au ulu töpö hĩsuma maikiö! Au ulu ma töpö sawäma makoka totio opa wi, Jesus pata tänö ĩ tä taa pi topa apa kutenö, pö̃ wa, pöpönö wa, ĩ na kilii makönö kamakö hai ulu ma töpö noa thaa läo sinomoö! Au ulu ma töpö pi hatukama nö, ĩ töpö na Cristo ta wäsä soamoonöö! Ĩ na makö kuati ha, kama makö ulupö sawäo makoko toito opa kitä.

Noa mi töpö kalipalo sinomo wi ĩ töpö na

⁵ Noa mi pö kalipalo sinomo wi ĩ pö! Makö kalipalo holisimo mai, pitilii pö kalipalo totihoö! ‑Pata tä na sa kili mai kitäö!‑ pö kuu tihöö! Pata ta hini totioheö! Cristo ma hini kua wi na, ĩ na noa mi makö kalipalama sinomo wi, ĩ na ĩ ma töpö a hini kua totiatalo hö̃töoheö!

⁶ Kama töpö mamo tetela tä, kama ma töpö pi mönaha päpamanöpö, makö kalipalo päo mai nököö! ‑Ĩ töpö na makö kalipalo salo, pö kalipalo makoka totihoö!‑ ĩ na Teusö a pi kuu kutenö, holisii pö kalipalo päo tihöö! Cristo a na noa mi makö kalipalo sinomo wi ĩ makö kutenö, makö kalipalo makoka sinomoö! Makö kalipalama sinomo wi, kamakö na ĩ töpö mamo tetetia mi päla tä maaki, pö kalipalo loteteapalo sinomoö!

⁷ ‑Ĩ töpönö sa simöa sisa mai kitäö! Jesus pata tänö sa simöa totio wi ĩ saö!‑ ĩ na makö pi kuu nö, noa mi makö kalipalo päla nö maaki, pö kalipalo kasiapalo opaö!

⁸ Noa mi makö kalipalo sinomo wi ĩ makö, noa tä na makö kalipalo sinomo pasio wi ĩ makö, ĩ na makö kui makö pewö aiki, ‑Toitai sa tä thaö ha, kamisa na Teusö anö noa tä totoa hö̃töpi kitäö!‑ ĩ na pö pi kuu totihoö!

Pata töpönö ai töpö kalipalama sinomo wi, ĩ pata töpö na

⁹ Noa mi, ai ma töpö kalipalama sinomo wi ĩ pö! Kamakö na ĩ töpö kalipalo makoka kuati wi na, ĩ na ĩ töpö simöa makoka kua totihoö! Ĩ ma töpö kilima tikiloti maikiö! Ĩ töpö peama maikiö! Hi tä hẽtu hamö Teusö pata tä kupoli, ĩ anö kamakö thapoö, noa mi ma töpö kalipalama sinomo wi, Teusö anö ĩ töpö thapo naia, ĩ na Teusö a kuaö. Ĩ tä na pö pi hatukuikiö! Teusö anö ai töpö totiapala asaö, Teusö anö ai töpö möö hanopo pasioö, ĩ na Teusö a kua mai kitä ta pi kuu mai.

Kama makö noamo sapao kõo wi, ĩ nasimö tökö uni na pö uni haloikiö!

¹⁰ Ĩ na sa kuu mapo pia kule. Jesus Kaikana a na makö kokaiki nö, pö lotetepaloö! Pe epii Jesus a lotetea apati wi, ĩ tänö pö lotetepaloö!

¹¹ Kamakö na Sai tä sai wasu pata ekuo tä, makö läa hö̃tököpököö! Makö läa mosawia hö̃tököpö, Teusö anö ösökö uni totoma wi, ĩ ösökö ha pö uni haloikiö! Kama makö noamo sapao kõopö, ĩ ösö ha pö haloikiö!

¹² Ai sanöma töpö solo makö säso wi, ĩ makö pasi mai kitä. Sai töpönö hiopö tä thaa wi ĩ töpö solo makö säso wi, ĩ makö sisawö. Sai pata töpönö sanöma töpö simöati wi, ĩ töpö solo makö säso naioö. Mumi mumi tä ha töpö kule, ĩ töpönö wanisala tä thaa sinomo wi ĩ töpö na sai töpö lotete epii töpö simöo sinomo wi, hi tä hẽtu hamö ĩ sai töpö kupoli, ĩ sai töpö solo makö säso naio wi ĩ makö.

¹³ Ĩ na tä kuaö ha, Teusö anö makö noama wi ĩ nasimö ösökö uni ha pö haloikiö! Makö haloköma, sai töpö wanisala apati wi ĩ töpö wasu huima tä, makö lotetea apa asa läa hö̃töpasopököö! Makö lotetea apa asa läpalo nö, sai ma töpö sasua sapa totia kopalöma, sai töpönö makö utitipama mai kitä.

¹⁴ Önö kutenö, pö läapalo hö̃töoö! Pitili ma tä tälöma, pili kolo ha ösö läpo kua wi na, ĩ na pitili tänö ĩ na makö nö läpo kua hö̃töo kitä. Pili kotopö ha söpala ösö amatosii ma ösö halolö nö, makö noamo kua wi na, ĩ na toitai ma tä thaa tä, ĩ na makö noamamo kua hö̃töo kitä.

¹⁵ Jesus ta topa apöle, ĩ tänö töpö pi topapalama wi, ĩ ma ta wäsä hätäpotipöö! ‑Sanöma makö na Teusö a noimo kõa kuleö!‑ tä kuu wi ĩ ma ta wäsä hätäpopököö! Ma ta wäsä hätäpo pi topa tä, söpala ösökönö sotatu ami haloiki nö, töpö noamo kua wi na, ĩ na makö noamo kua hö̃töo kitä.

¹⁶ ‑Jesus a pitili‑ ĩ na pö pi kuu totioö! Söpala ösökö läa läatala wi ĩ ösökönö sotatu tä noama kua wi na, ĩ na, ‑Jesus a pitili‑ ĩ na makö pi kuu kuköma, ĩ na makö noama kua hö̃töo kitä. Söpala ösökö läapala wi ĩ ösökönö silaka wakö hili pole, ĩ taka lupama kua wi na, ĩ na, ‑Jesus a pitili‑ ĩ na makö pi kuu kuköma, Sai tä sai pata wanisala wi ĩ a pata na ĩ na makö noamo kua hö̃töo kitä.

¹⁷ Makö pi tapoiki nö, ĩ na pili makö pi kuu sinomoö! ‑Teusö anö sa õsi totipalöma kutenö, sa pea mai, Teusö a na sa kuo soatio kitäö!‑ ĩ na makö pi tapoiki nö, ĩ na makö pi kuu sinomo opati nököö! Ĩ na makö pi kuu sinomo kuköma, pili he ha hesowa a amatosi soholö nö, töpö he noamo kua wi na, ĩ na makö õsi noamamo kua hö̃töo kitäö! Teusö a õsi kua tolele, ĩ anö Teusö ta totopi wi, ĩ ma ta tälöö! Sotatu tänö poo a täa thali wi na, ĩ na Teusö ma kai sua thaa nainöheö! Ĩ Teusö ma ta thaa nainö nö, sai ma töpö kilima hö̃töopököö!

¹⁸ Ĩ na tä kua tä, Teusö a na pö hapalo sinomoö! Teusö a na makö hapalo tä, Teusö a õsi kua tolele, ĩ anö makö simöa sinomopöö! Teusö a õsi kua tolele ĩ a na, ‑Sa pasilipalöö!‑ ĩ na makö kuu sinomopöö! Pö pi mosawia totikiö! Teusö a na makö hapalo mapo maikiö! Teusö a na makö hapalo tä, Jesus a thapo wi ĩ ma töpö pewö a wäsäö!

¹⁹ Kamakönö sa wäsä naio sinomopököö! Teusö a na makö hapalo nö, ‑Paulo anö wa kai a wäsä tä, ta wäsä makoka apa wi ta totoköö!‑ ĩ na makö kuu! ‑Kawanö wa töpö õsi totipa wi ĩ ta wäsä paio maa noai, huki Paulo anö ĩ ta wäsä tä, ta wäsä kili mai, Paulo anö ĩ ta wäsä totiopököö!‑ Teusö na ĩ na makö kuu!

²⁰ Teusö anö töpö õsi totipa wi ĩ sa ta wäsäpö, Jesus Cristo anö sa simöa wi ĩ sa. Huki sai õsi ha sa õkama titia kule maaki, Jesus sa kai wäsä wi ĩ sa soawö. Teusö a na makö hapalo nö, ‑Paulo a kili mai, kawa kai a wäsäpöö! Ĩ na Paulo a kua kuköma, wa kai a wäsä tomöpo mi mai kitäö! Önö kutenö, Paulo a wäo kili maapököö!‑ ĩ na pö kuu!

‑Kamakö na Síkiku sa simöpalöma‑ Paulo a kuu noai ĩ ta

²¹ Ĩ na tä kua tä, kamisa kuati pole, kamakö na Síkiku anö ĩ ta wäsä pia salo. Teusö a thapo naio wi ĩ ma pi ipa wi ĩ a. Cristo pata tä na ĩ a kalipalo sinomoö.

²² Kamisamakö kuati pole, Síkiku anö ĩ ta wäsäpö, kamakö na ĩ sa simöpalöma. ‑Epesu tili töpö na Síkiku anö ĩ ta wäsä kuköma, ĩ töpö pi topa apöpamanöpököö!‑ ĩ na sa pi kuu salo, kamakö na ĩ sa simöpalöma.

Teusö anö makö totiapala apapököö!

²³ Toitai makö kutio wi, kamakö hai ĩ pö̃ Teusö a, Jesus Cristo pata tä, ĩ na kilii töpönö ĩ tä totoköpöö! Makö noimaso wi ĩ tä totoa naiköpöö! Ĩ tä pewö totokö nö, ‑Teusö a pitili‑ makö pi kuu totio wi, ĩ tä totoa naiköpöö!

²⁴ Kamakö pewönö kamakö hai Jesus Cristo Kaikana ma tä pii mapo mai, Teusö anö ĩ makö totiapala apapököö!