Efésios 2 - Teusö Tä Waheta

Teusö anö Cristo a na makö kokamakö nö, makö temöpamanö noai ĩ ta

¹ Teusö ma hini totio mai, wanisala ma tä thaa tikiliapalo opatii, ĩ na makö kuatima kutenö, makö õsi nomawöo opama. Makö õsi nomawöo opama maaki, Teusö anö makö õsi temöa kopamanöma.

² Makö õsi nomawö öpö tä, Teusö a thapo mai, ĩ ma töpö uömatima. Sai tä sai patanö sai töpö simöati wi, ĩ Sai ma ta pata hini toitioma. Sanöma töpönö Teusö a hini mai, huki ĩ Sai tä sai patanö ĩ töpö simöatii.

³ Teusö a hini mai, ĩ töpö kua kuati wi na, ĩ na makö pewö kua totio naitioma. Kama makönö ma tä thaa pi topa päo noai, ĩ ma tä thaa pätioma. Makö pi tapomo wanisala apa nö, wanisala tä na makö puko pi topa päo salo, ma tä thaa pi topa apa päo noai, ĩ ma tä tha apatima. Ai sanöma töpö pewönö Teusö a hĩsumanöma kutenö, waiha Teusö anö ĩ töpö peama kua piale na, ĩ na Teusö ma hĩsua thaa naimanöma kutenö, ĩ na makö moni peamamo kua naioma.

⁴ Makö wanisala apatima maaki, pe epii Teusö anö makö pi ipaö, pe epii makö totiapala apaö, ĩ na Teusö a kua kutenö,

⁵ makö temöpalöma. Teusö ma hini mai ĩ makö õsi nomawö öpö soa tä, Teusö anö Cristo a na makö kokaköma, makö temöpasoma. Makö wanisala apama maaki, Teusö anö makö totiapala apa nö, makö täa konöma.

⁶ Jesus Cristo a na makö kokaköma, makö õsi temöpamanö nö, makö uni hoköpamanö nö, hi tä hẽtu hamö Cristo a lopoli, ĩ hamö makö uni loa naimakö lasoma.

⁷ ‑Sanöma makö wanisala apa noai maaki, Teusö anö makö pi ipamaö! Makö pi ipa nö, pe epii makö totiapala satia apapö, kamakö na Jesus Cristo a simöpalömaö!‑ waiha ĩ na makö pi thama totio pia salo. Hi masita tä uli mapaso noai ha, ĩ na makö pewö pi thama soatio pia salo.

^8-9 Kamakö lö kui, makö wanisala apa wi maaki, Teusö anö makö totiapala satia apa nö, ‑Teusö a pitili‑ makö pi kuu kuköma, makö täa koni. Makö täapa kõo läo wi, noa mai ha Teusö anö ĩ tä totomaö. ‑Toitai sa tä thati ha, Teusö anö sa täa konömaö!‑ ĩ na makö pi kuu tihöö! Teusö anö noa mai makö täapa kõo päoö.

¹⁰ Makö täa konö noai ha, toitai ma tä thatipö, Teusö anö Jesus Cristo a na makö koka totimakö nö, tute makö thapalöma. ‑Ĩ töpönö toitai tä thatipököö!‑ ĩ na Teusö a pi kuu nö, tute makö thapalöma.

Makö wanihasoma maaki, makö noipaso kõo wi, Cristo anö ĩ kamakö na ĩ tä toto

¹¹ Kamakö hai ĩ nö patapö töpö hai, ĩ juteu töpö kuo maama. Ĩ na tä kua tä, kamakö pasi lö kui, juteu makö pasi mai ĩ makö ola hö̃töwö. Juteu töpö aiki, ‑Samakö isi ola ösö hosapamo pasio wi ĩ samakö asa kutenö, Teusö sama thapo wi ĩ samakö asawö‑ ĩ na ĩ töpö kuu wi, kamakö na ĩ töpö aiki, ‑Makö isi ola ösö hosapamo pasio mai ĩ makö pasi kutenö, Teusö ma thapo wi ĩ makö mai kitä‑ ĩ na ĩ töpö kuu. Ai sanöma töpö na makö isi ola ösö hosapamo pasio mi kutenö, ĩ na ĩ juteu töpö kuu päoö. Teusö ma thapo mai, ĩ makö kuo totio paio noai, ĩ tä na pö pi motipo tihöö!

¹² Teusö ma thapo paia mi tä, Cristo a na makö pi hatukuo paio maama. Teusö anö ai töpö saia asalö noai ĩ ai makö kuo maama kutenö, tiko makö kuo pasioma. Teusö aiki, ‑Kamisanö makö totiapala kuki kitäö!‑ ĩ na kama hai juteu töpö na ĩ na a kuu kua noai na, kamakö na ĩ na a kuu kua pasio maama. Teusö ma thapo mi kutenö, ‑Teusö anö makö totiapala apa kitäö!‑ ĩ na makö pi kuu tao maama.

¹³ Ĩ na makö kua paioma maaki, Teusö a na makö kuo pã apa paio tasoma maaki, huki Jesus Cristo ma thapo salo, Teusö a na ĩ makö waloa atea totia waikiki solöma. Cristo a iä pö halaso noai, ĩ tänö Teusö a na makö atea totimaköma.

¹⁴ Juteu samakö, juteu makö pasi mai ĩ makö, ĩ na makö kui makö wanihasotima maaki, huki makö noimaso kuki wi, Cristo anö ĩ tä totopöma. Makö wanihasoti noai, ĩ tä mötali ha tä uni pata katöo läo noai, ĩ tä hõo pata ha juteu samakö kua, ĩ tä hẽtu hõo pata ha hö̃tö soatawö, juteu makö pasi mai ĩ makö kua hö̃töa soataa, ĩ na makö kua paitioma maaki, tä pata katöo läo noai, Cristo anö ĩ tä uni pata waniapalöma, polakapii makö kuo paitioma maaki, samii makö kupasoma.

¹⁵ Teusö anö juteu samakö hai ĩ nö pata töpö noa thaa nö, ‑Ĩ na pö kuikiö! Ĩ na tä kua tä, ĩ na pö kua tihöö!‑ ĩ na töpö noa thatalati noai, Cristo anö ĩ ta hosalöma. Ĩ ta hosalö nö, juteu samakö sokaa, juteu makö pasi mai ĩ makö soka hö̃töa, ĩ na makö kuoma maaki, Cristo anö makö pewö kokapalö nö, samii makö thapalöma. Önö kutenö, makö wanihasoma maaki, Cristo anö makö noipaso kõo wi ĩ tä totopöma, makö noipaso kõköma.

¹⁶ Hii ti pakalai ti ha Cristo a säpamoa waikilasoma kutenö, juteu samakö, juteu makö pasi mai ĩ makö, ĩ na makö kui makö wanihasopili, Cristo anö ĩ tä mapamanöma. Cristo anö makö pewö kokapalö nö, makö samii makö uni thapalö nö, Teusö a na ĩ makö pewö waloa komaköma.

¹⁷ Teusö a na juteu samakö kotöo asa soata noai ĩ samakö pi hatuka asa wi ĩ samakö, Teusö a na juteu makö pasi mai ĩ makö kuo pã apa pasio taso noai ĩ makö pi moti ipii ĩ makö, ĩ na makö kui makö pewö na Cristo a walokiso nö, noimaso kõo wi ĩ ta topa apöle ta wäsä solöma.

¹⁸ Cristo anö makö noamaö, Teusö a õsi kua tolele, ĩ ma thapo wi ĩ anö makö pasilipoö, ĩ na ĩ tä kua kutenö, Teusö a na makö pewö walo taö öpa kõoö.

¹⁹ Önö kutenö, juteu makö pasi mai, ĩ tiko makö kuoma maaki, tiko makö soa mai kitä. Huki Teusö ma thapo wi ĩ makö nai waikiwö. Teusö ulupö makö nai waikiwö.

²⁰ Sai a kui na ĩ na makö kuö. Kamakö hai, Teusö a hai ĩ sai makö uni. Sai a lototomaköpö, ĩ a sai kolo ha maa makö paa sinomoö. Cristo anö töpö simönö noai ĩ töpö, Teusö a kai a wäsä sinomo wi ĩ töpö, ĩ na töpö kui töpönö sai a kolo ha maa makö uni paköma. Ai maa manö sai a lototo satio opa wi ĩ Cristo a uni paköma.

²¹ Ĩ maa ma toita sati ipii, ĩ Cristo a uni hai, ĩ ma hösöka ha satehe epii ai ma pö makekele, ĩ kamakö uni pasiwö. Cristo a na makö uni makekea topa totiki nö, Teusö pata tä hai ĩ sai a uni thaa hötötöa totiki.

²² Ĩ a sai õsi ha Teusö a õsi kua tolele ĩ a kule, ĩ a sai hai, kamakö solo makö pewö uni kuki.