2 Bibɔrb Aabɔr 28 - Uwumbɔr aagbaŋ

Juda Aabɔr Ahas aabɔr

¹ Ahas nan ye ŋibin moninko aanii le ki jin nnaan, le ki ka Jerusalem ni, ki joo waanib ki ti saa ŋibin kipiik ni ŋiloob. Waa nan dii uyaaja Ubɔr David aah nan dii nsanyaan mu na. Uma nan labr tun Uwumbɔr aah kaa gee pu na la,

² le ki dii Israel yaab aabɔrb aasan i kaa ŋan na. U nan di tikur naan naan liwaal Baal aanaŋ,

³ le ki seer nnyɔknii Hinom Aafataŋ ni. U nan kpaan di ujapɔtiib kɔr ki see mmii ni tii ŋiwaa, le ki tun titunwanbir ti binib bi Uwumbɔr nan jenn nyan bi baatiŋ ni buyoonn Israel yaab nan choo na aatun.

⁴ U nan toor kitork ki seer nnyɔknii tiwaadir ni, ni ŋigongon paab, ni busub bumɔk nan kpa mboon na taab.

Siria yaab ni Israel yaab aatɔb

^5-6 Ubɔr Ahas aatunwanbir pu, le Udindaan Uwumbɔr nan cha Siria yaab Aabɔr nyaŋ u, ki chur Juda aanib pam buen Damaskus aatiŋ ni ti ŋa tinaagbiir ni. Uwumbɔr ki cha Israel yaab aabɔr Peka u aate nan ye Remalia na nyaŋ Ahas, ki ku Juda aajakaab ŋichur nkub ni moninko liwinbaal. Juda aanib aah nan yii biyaajatiib Aadindaan Uwumbɔr na, le u nan cha kina ŋa.

⁷ Israel aaja ubaa nan bi, bi yin u ke Sikri le u nan ku Ubɔr Ahas aajapɔɔn u bi yin u ke Maaseya na, ni libɔrdichal ni aayidaan, u bi yin u ke Asrikam na, ki kpee Elkana, u nan paa ubɔr pu na.

⁸ Juda yaab ni Israel yaab nan ye binibaam la, tɔ, Israel yaab ngbaan nan chur Juda aapiib ni mbim ŋichur ikui ilee tinaagbiir ki di buen Samaria aatiŋ ni, ki kpee tiwan ni bi nan gaa butɔb ni na sakpen.

Uwumbɔr aabɔnabr Oded aabɔr

⁹ Uja ubaa nan bi nima, bi nan yin u ke Oded, le u ye Uwumbɔr aabɔnabr. U nan koo Samaria aatiŋ ni la. U nan ti ton Israel aajab bi choo kun ni ki joo baah chur Juda yaab bi tinaagbiir na, nin chee bi ban bi koo kitiŋ ni na, le u bui ke, “Niyaajatiib Aadindaan Uwumbɔr le gee liŋuul Juda yaab pu ki cha ni nyaŋ bi; n‑yoonn mue na, u ki ŋun naah di mbiin ku bii bi pu na.

¹⁰ Le ni ban ke ni di Jerusalem ni Juda aajab ni bipiib ŋa nimi aanaagbiib. Naa nyi ke nimi nibaa mu tun Nidindaan Uwumbɔr titunwanbir aa?

¹¹ Li pel man m chee. Binaagbiib bimina ye ninaabitiib ni nininkpatiib la. Di bi lii man, naa ye kina kan, Uwumbɔr ga di waaŋuul daa nitafal.”

¹² Israel yaab aasalolm binaa bibaa, bi ye Efraim aanibol aanib na, Jehohanann aajapɔɔn Asaria, ni Mesilemof aajapɔɔn Berekia, ni Salum aajapɔɔn Jehiskia, ni Hadlai aajapɔɔn Amasa mu nan yii butɔb aajab aabimbin ngbaan.

¹³ Bi nan bui ke, “Taa di binaagbiib ngbaan koo ni do man. Ti puun tun Uwumbɔr titunwanbir ti ga cha u daa titafal waaŋuul ni na. Le ni ki ban ke ni ŋa tiwan ni ga moo joo ni timi titunwanbir na.”

¹⁴ Kina pu le bijab ngbaan nan di binaagbiib ni tiwan ni bi gaa butɔb ni na ŋa binib ngbaan ni baasalolm aaŋaal ni.

¹⁵ Le bi nyan bijab binaa ngbaan ke bi tii binaagbiib ngbaan tiwanpeenkaan, tiwan ngbaan ponn ni. Bi nan tii bi tiwanpeenkaan ni ŋinaatak bi peen ki taŋ, ki tii bi tijikaar ti ga ŋeer bi bi ji ki nyu na; le ki di olif aakpan meen baabuun. Bi ponn ni bi nan diŋ sakpen kaa ki ŋmaa chuun na, bi nan di bi diŋ ibon pu la. Le bi di binaagbiib ngbaan mɔmɔk di giin Juda aapepel aatiŋ ki bi yin ki ke Jeriko, aan ki ye ŋibɔkpal aasui aatiŋ na ni. Le Israel yaab gir kun bido Samaria.

Ahas aah ban Asiria yaab chee nterm pu na

^16-17 Edom yaab nan ki piin ki loon Juda yaab ki chur binaagbiib pam, kina pu le Ubɔr Ahas bui Asiria aabɔrkpaan Tiglaf Pileser ke u ter u.

¹⁸ N‑yoonn baan ngbaan le Filistia yaab mu nan bi looni ntim mu bi liwilir wɔb aagongon ŋi bi taab na, ni Juda aaŋangii wɔb. Bi nan gaa Bef Semes, ni Aijalonn, ni Gederof aatim, ni Soko, ni Timna, ni Gimso aatim ni itingbaan i bi mu chee na, ki kal mu ni kookoo.

¹⁹ Ubɔr Ahas aah kaa nan tii waanib baabamɔn ki bii Uwumbɔr aakaal na, le Uwumbɔr cha tibɔr dan nan lir waatiŋ Juda pu.

²⁰ Asiria aabɔrkpaan ngbaan aah ba ga ter Ahas pu na, le u labr nyan upuwɔb le ki tii u tibɔr.

²¹ Kina pu le Ahas yoor Uwumbɔr Aadichal ni, ni libɔrdichal ni, ni binib ngbaan aasalolm aadichal ni aasalmaa ki ti di tii ubɔrkpaan ngbaan. Tɔ, nimina mɔmɔk aa nan tii u nterm mubaa.

Ahas aatunwanbir aabɔr

²² Waatunwanbir aah nan ti moo bi nyaŋ ni na, le uja Ahas moo tun titunwanbir ti ubaa aa kee tun na.

²³ U nan toor kitork tii Siria yaab bi nyaŋ u na aawaa. U nan bui ke, “Siria aawaa le ter Siria aabɔrb, kina pu na, m mu yaa toor kitork tii ŋi kan, nibaakan ŋi ga ter m mu.” Le kina aatuln joo ni tibɔbir nan lii u ni waatimbol pu.

²⁴ Ni nan ki kpee na le ye ke u yoor Uwumbɔr Aadichal ni aawanbankaan le ki gbaa wiil ni mɔmɔk yuk yuk. U nan laŋ Uwumbɔr Aadichal le ki maa ŋiwaa aatork aabimbin Jerusalem aatiŋ ni, ni kookoo.

²⁵ Juda aatikpaam ni muwaatiir mɔmɔk ni, u nan maa tiwaadir, le bi seer nnyɔknii tii ŋiwaa nima chee. U nan ŋa kina le ki cha uyaajatiib Aadindaan Uwumbɔr aaŋuul fii u pu.

²⁶ Waanaan yoonn aatun mɔmɔk, ki nyan mu aapiin ki ti saa ndoon na, bi Juda ni Israel Aabɔrb Aatun Aagbaŋ ni la.

²⁷ Ubɔr Ahas nan kpo le bi sub u Jerusalem aatiŋ ni. Baa nan tee di u sub bibɔrb aakaakul ni. Ujapɔɔn Hesekia le nan nab waanaan pu.