2 Bibɔrb Aabɔr 22 - Uwumbɔr aagbaŋ

Juda Aabɔr Ahasia aabɔr

¹ Arab yaab bibaa nan ti koo Juda aajab aakakaa ni, ki ku Ubɔr Jehoram aajapɔtiib mɔmɔk. Ujapɔɔn uwaatiir Ahasia baanja le nan ti ŋmar. Kina pu na, Jerusalem aanib nan di Ahasia le ŋa ubɔr, u gaa ute aanaan.

^2-3 Ahasia nan ye ŋibin moninko ni ŋilee le ki jin nnaan. U nan bi Jerusalem ni, nnaan aajal pu, ki ti saa libiln libaa la. Ahasia mu nan dii Ubɔr Ahab aadichal aasan la; ba pu? una Atalia, u aate nan ye Ubɔr Ahab aan uyaaja mu ye Israel Aabɔr Omri na, nan joo nsurm mu kaa ŋan na le sur u.

⁴ Ute aah kpo na, Ubɔr Ahab aadichal ni aanib bibaa le nan ye waasusurb, le ki cha u tun Uwumbɔr titunwanbir le ki lir.

⁵ U nan kii baasurm le ki buen ti kpee Israel Aabɔr Joram pu, le bi buen ti faa Siria Aabɔr Hasael butɔb. Bijab ngbaan nan ti di biyil kpaa tɔb Ramof aatiŋ ki bi Gilead aatiŋ ni na ni la. Nima chee le Joram nan kan titotonn butɔb ni.

⁶ U nan gir buen Jesreel aatiŋ ni u ti teb ubaa, le Ahasia buen nima chee u ti mann u.

⁷ Uwumbɔr nan di lisachuln limina le daa ker Ahasia lii kitiŋ. Waah nan bi nima chee na, le Nimsi aajapɔɔn Jehu, u Uwumbɔr nan lee ke u kuln Ahab aanaan na dan nan lir u ni Joram pu.

⁸ Jehu aah nan bi tun Uwumbɔr aah siin nnaan ngbaan ntafadaan mu na aatuln pu na, le u ti kan binib bibaa. Bi nan ye Juda aasalolm bibaa, ni Ahasia aado yaab aajapɔtiib bi nan cheen u ke u ti mann Joram na la. Jehu nan ku bi mɔmɔk.

⁹ Bi nan tee mban ki ban Ahasia, le ki ti kan u, u bɔr Samaria aatiŋ ni. Le bi di u buen Jehu chee, le u ku u. Tɔ, uyaaja Ubɔr Jehosafat, u nan pɔɔn ubaa ki dii Uwumbɔr mbamɔm na pu, bi nan sub u. Ahasia aadichal ni aanii ubaa aa nan ki gur ki ga ŋmaa joo nnaan ngbaan.

Juda aatiŋ Aapiibɔr Atalia

¹⁰ Ubɔr Ahasia aana Atalia aah kpaan ŋun ujapɔɔn aakun pu na, le u siin ke bi ku Juda aabɔrdichal ni aanib mɔmɔk.

¹¹ Ubɔr Jehoram aabisal u bi nan yin u ke Jehoseba na nan bi. Uchal le nan ye utotoor u bi nan yin u ke Jehoyada na. Uma le nan loon yoor Ubɔr Ahasia aajapɔɔn Joas, mbɔrbim bi bi nan ban bi ku na chee, ki ti di u ni upii u ga li kpiini u na bɔr Uwumbɔr Aadichal ni aadijɔk kibaa ponn ni. Waah nan di u di bɔr na, le u gaa waamɔfal Atalia chee lii.

¹² Atalia nan joo kitiŋ ki ti saa ŋibin ŋiloob, le Joas mu beenin bɔr nima chee.