फिलिप्पियों 4 - काँगड़ी

¹ हे प्यारे साथी बसुआसियो, मैं तुहां नैं बड़ा प्यार करदा ऐ, कने तुहां नैं मिलणा चांह़दा ऐ, जेह्ड़े मेरी खुसी कने इनाम हन। इसतांई हे प्यारे साथी बसुआसियो, प्रभु दे बसुआसे च मजबूत बणी रेह्आ।

अप्पु च मेल-जोल दे बारे च

² मैं यूओदिया कने सुन्तुखे जो भी हौंसला दिंदा ऐ, कि सैह़ प्रभु च इक्क मन रैह़न।

³ हे सच्चे साथी, मैं तिज्जो नैं भी विणती करदा ऐ, कि तू तिन्हां जणासां दी इक्क मन रैहणे च मदत कर, क्जोकि तिन्हां मिन्जो सौगी सुसमाचार फैलाणे च, क्लेमेंस कने मेरे होर साथियां सौगी मेहनत कित्ती, तिन्हां सबना दे नां ज़िन्दगिया दिया कताबां च लिख्यो हन।

⁴ प्रभु च सदा खुस रेह्आ। मैं भिरी ग्लांदा ऐ, खुस रेह्आ।

⁵ सारे माणु तुहां दे नरम सभावे जो जाणी लैन। प्रभु दा बापस औणां नेड़े ऐ।

⁶ कुसा भी गल्ला दी फिकर मत करा। अपर हर इक्क हलात च तुहां दी दरखास्त, प्रार्थना कने विणती धन्यावाद सौगी परमात्मे सामणै पेस कित्ते जान।

⁷ ताह़लू परमात्मे दी सांति, जेह्ड़ी माणुये दिया समझा ते बाहर ऐ, तुहां दे दिलां कने सोच बचारां जो यीशु मसीह च सम्भाल़ी रखगी।

⁸ इसतांई आखर च हे प्यारे साथी बसुआसियो, तुहां अपणा ध्यान तिन्हां गल्लां पर लग्गा, जेह्ड़ियां-जेह्ड़ियां गल्लां सच्च हन, कने जेह्ड़ियां-जेह्ड़ियां गल्लां इज्जता आल़िआं हन, कने जेह्ड़ियां-जेह्ड़ियां गल्लां खरियां हन, कने जेह्ड़ियां-जेह्ड़ियां गल्लां पवित्र हन, कने जेह्ड़ियां-जेह्ड़ियां गल्लां छैल़ हन, कने जेह्ड़ियां-जेह्ड़ियां मने भाणे आल़िआं हन। कने तुहां दा मन तिन्हां गल्लां पर लग्गी रैंह्, जेह्ड़ियां उत्तम कने तरीफां दियां गल्लां हन।

⁹ जेह्ड़ियां गल्लां तुहां मिन्जो ते सिखियां, कने अपनाईयां, कने सुणियां कने मिन्जो च दिक्खियां, तिन्हां ई दा पालण करदे रेह्आ। ताह़लू सांति दा परमात्मा तुहां लोकां सौगी रैंह्गा।

दाने तांई धन्यावाद

¹⁰ मैं प्रभु च बड़ा खुस ऐ कि हुण इतणेयां दिनां बाद तुहां दे मने च मेरे बारे च पैसे घल्लणे दी भिरी ते फिकर होई। सच्ची च तुहां जो सुरू च भी इसदे बारे च फिकर थी, अपर तुहां जो मौका नीं मिल्लेया।

¹¹ एह़ नीं कि मैं अपणिया जरूरता दिया बज़ाह ते एह़ ग्लांदा ऐ। क्जोकि मैं एह़ सिखया ऐ कि जिस हलात च मैं ऐ; तिस च खुस रैंह्।

¹² मैं थोड़े च भी ज़िन्दगी जी सकदा ऐ, कने जरूरता ते जादा होणे पर भी जीणा जाणदा ऐ। भुखा रैहणा, कने बधणा घटणा, इन्हां हर इक्क गल्ला च कने सारे हलातां च मैं जीणा सीखी लेआ।

¹³ मसीह दे जरिये जेह्ड़ा मिन्जो सामर्थ दिंदा ऐ तिस च मैं सारा कुच्छ करी सकदा ऐ।

¹⁴ तमी तुहां खरा कित्ता कि मिन्जो पैसे घल्ली करी मेरिया मुसीबता च मेरे साझी बणैं।

¹⁵ हे फिलिप्पी दे लोको, तुहां अप्पु भी जाणदे हन कि सुसमाचार जेह्ड़ा तुहां जो सुरू ते सणाया गेआ, कने जाह़लू मैं मकिदुनिया प्रदेसे ते गेआ, ताह़लू सिर्फ तुहां दिया कलीसिया दे लोकां लैण-दैण च मेरी मदत कित्ती।

¹⁶ इसते पैहल्ले जाह़लू मैं थिस्सलुनीके सैहरे च था, ताह़लू भी तुहां मेरी जरूरत पूरी करणे तांई कई बरी पैसे घल्लेयो थे।

¹⁷ मैं एह़ नीं ग्लांदा ऐ, कि मेरी मदत पैसेयां नैं करा, अपर मैं ऐदेया फल़ चांह़दा ऐ, जेह्ड़ा तुहां दे फायदे तांई बधदा जां।

¹⁸ मिन्जो अल्ल सब कुच्छ ऐ, अपर मता सारा ऐ; जेह्ड़ियां चीज्जां तुहां इपफ्रुदीतुस दे हत्थे ते घल्लियां थियां तिन्हां जो लेई नैं मैं रज्जी गेआ, सैह़ तां सुख आल़ी सुगंधा साइआं, कने अपनाणे जोग्गा बलिदान ऐ, जिन्हां जो याजक परमात्मे जो चढ़ांदे हन, जिसियो परमात्मा अपनांदा कने खुस हुंदा ऐ।

¹⁹ मेरा परमात्मा भी अपणी तिसा धन-दौलता मताबक जेह्ड़ी महिमा सौगी यीशु मसीह च ऐ, तुहां दी हर इक्क जरूरता जो पूरी करगा।

²⁰ अहां दे परमात्मे कने पिता दी महिमा जुगा-जुग हुंदी रैंह्। आमीन।

आखरी नमस्कार

²¹ यीशु मसीह च परमात्मे दे सारे लोकां जो मेरा नमस्कार ग्ला। जेह्ड़े बसुआसी भाऊ मिन्जो सौगी हन, तुहां जो नमस्कार ग्लांदे हन।

²² सारे परमात्मे दे लोक जेह्ड़े ऐत्थु हन, खास करी नैं जेह्ड़े कैसर राजे दे घराने दे बसुआसी हन, तुहां जो नमस्कार ग्लांदे हन।

²³ मैं प्रार्थना करदा ऐ, कि अहां दे प्रभु यीशु मसीह दा अनुग्रह सदा तुहां सौगी रैंह्। आमीन।