Markus 8 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

At Yesus en aphwami esan ap nak enebe 4.000 so’boru eseik-’beseiksogo wogentesi wene

¹ Asogo tigisema agauwa wei nak welegesarik en, aphwami esanat pobuk at Yesus e’bek odoktu egesa. Asogo wegesarik so’boru modok erlak agama re, no’gwe no ’gela’ge aga. Asogo agama re, at Yesus en osi iak wogu legesa a’ge ebano worlentesimu wegesema re, disogo mo’gulentesi,

² “Nosi yu logwe. Is aphwami esan yema nenemin agauwa henagan pam nogogerikmu re, onso’boru modok erlak agama, no’gwe no ’gela’ge agama oruak ai en, nede en nede heselegei o.

³ Is so’boru weat onowi pam peragonoboma, is pema onowi walek en wegesarikmu re, ebelema lagaimu dawat hwerlil yawat hwerlil louwano yo,” oluk mo’gulentesi.

⁴ Asogo mo’gulentesimu at osi iak wogu legesa a’ge ebano en e, disogo mo’gulegisa, “O leimu aphwami onowi werik modok erlakma yema re, is enebe a’bigatma so’boru roti a’ge onogumsogo nouwagoluk, ebe ’geba a’ge wokho wogonto yo. Mia o,” oluk mo’gulegisema re,

⁵ at en e, “His so’boru roti a’ge meren pekharok welegep,” oluk hin wesimu re, is en e, “Erlak o. We, ebe sabiren nak pekharok welege o,” oluk mo’gulegisa.

⁶ Asogo mo’gulegisema, at en e, aphwami a’bik odoktak welegesa a’ge ebano ’gwiangma huremagoluk mo’gulentesi. Mo’gulentesirik so’boru roti a’ge sabiren a’ge eriano e’gigem wesirik e, Allah hau wusogo re, e’gik en so’boru roti a’ge eriano ’gusogo aphwami esan ebano so’burontouwagoluk, osi iak wogu legesa a’ge ebano ene’gigem pesimu so’burentigisa.

⁷ So’burentigisarik e, hiane wei a’ge we, wei nak oruakma re, Yesus wogegisema, Allah hau wusogo asogoat so’burontouwagoluk mo’gulentesi.

^8-9 Asogo mo’gulentesimu re, is en so’burentigisema onogumsogoat ne’gesa. Aphwami enebe esan a’bigat ene’gik wenakho re, 4.000 ’gela’ge ne’gesarik, ado dedilogo pegesema re, Yesus osi en mul egeik a’ge sabiren yagasogo pegesa. Asogo pegesema at Yesus en aphwami ebano onowi lo’gwe peragenebesi.

¹⁰ Peragonoboluk erianoat, at Yesus osi iak wogu legesa a’ge ebano eneminat ik so pam ’goluk ’gwigisarik so wusogo o Dalmanuta liplau wegesa.

Ap Farisi a’ge en e, “Nis pobi hobul en, hat en elalin a’ge mesik tin o,” oluk Yesus mo’gulegisa wene

¹¹ At Yesus lak o Dalmanuta liplau wegesema re, ap Farisi a’ge logon Yesus emin weneane ogulat ebabut ’baluogoluk, e’bek wegesarik e, disogo mo’gulegisa, “Hat hebe Allah en perakhobou wagama wegen holuk e, nis en pobi hobul en, hat elalin a’ge mesik tin da,” oluk mo’gulegisa.

¹² Mo’gulegisema re, at ede pisogo ’gela’ge iak opmane eselat e, disogo mo’gulentesi, “His aphwami o yogodak welegep a’ge yema en ogulat e, Nis en pobi hobul en hat en elalin a’ge mesik tin da, oluk mo’gulnogu legep yema nopaget. An niak demat mo’gulhentaik o, Pobi nobogup en an en elalin a’ge mesik tik modok erlak o,” oluk mo’gulentesi.

¹³ Asogo mo’gulontoluk e, is aphwami ebano o eba ukpoluk ik so pam ’gwigisarik e, ik so wusogo pobuk ik iak etle akhit libegesa.

“Ap Farisi a’ge emin, Herodes emin, onowene re, e’gen so’boru roti a’ge poruagoluk ogola ’gwelabogwi a’ge ai ’gela’ge o,” oluk mo’gulentesi wene

¹⁴ Ik omugwe ano etle akhit libomogoluk e, Yesus osi ebano so’boru roti a’ge memerak poluk mesik nak e, ik so ogola woluk libegesa.

¹⁵ Libegesarik e, Yesus en enesa’go weriselat e, disogo mo’gulentesi, “Is ap Farisi a’ge emin, at Herodes emin, e’gen so’boru roti a’ge poruagoluk ogola ’belabogwi a’ge ano ’gela’ge oruak ai pam wiagaphonobuano oluk, henepe heberlogo welemis o,” oluk enesa’go weregei.

¹⁶ Asogo enesa’go weregeimu re, is-is nak ogulat e, disogo egesa, “Nis so’boru roti a’ge erlak ai en egei hegi,” oluk ogu legesema re,

¹⁷ at Yesus en enak a’ge pobi enebegeitik e, disogo mo’gulentesi. “His-his nak ogulat e, Nis so’boru roti a’ge mesik erlak ai en egei, oluk wene ogu legep ai nopaget. His owan henaluk om erlak pobirak erlagat welarat de, henede ’gagalak erlak ebesik welegep yema re!

^18-19 His e, henil oruak a’geat de, hogwi erlagat, henesa’go oruak a’geat de, hologwi erlagat, welat ogu legep yema re! An en so’boru roti a’ge huaben a’ge ’gusogo aphwami esan 5.000 wogentegis ano meme egeptik a? Is en ne’gesarik dedilogo pegesema mul egeik a’ge meren emde loropsogo pegep no,” oluk mo’gulentesimu, is en e, “Dua belas yagasogo pege ebano re,” oluk mo’gulegisema,

²⁰ at en e, mesik disogo mo’gulentesi, “Ye, an en so’boru roti a’ge ebe sabiren en ’gusogo aphwami esanat 4.000 wogentegismu ne’gesarik dedilogo pegesa a’ge mul egeik a’ge meren emde lorophegeik yagasogo pegep no,” oluk mo’gulentesimu, is en e, “Sabiren en yagasogo pege ebano re,” oluk mo’gulegisema,

²¹ at en e, “A’ge re, his wene owan pobitu erlak welegep yema re!” oluk mo’gulentesi.

Yesus en ap il hopnik a’ge o Betsaida a’ge obaptegei wene

²² Yesus osi enemin wene asogo il-il e, o Betsaida libegesa. Libegesema re, is aphwami o eba a’ge en e, ap mesik il hopnik a’ge Yesus en e’gik tenhouwagoluk e’bek woluk wegesarik e, eniak enerlagaik ’gusogo mo’gulegisa.

²³ Mo’gulegisema re, at en ap ai e’gik tenakho woluk o selimu en leget o’borloma libaga. Woluk libagarik e, was il pam pesirik e, e’gik tenak pasulat e, disogo mo’gulesi, “Yogodak hil di a’ge yu a’ge mesik yethasu legen a? Erlak a,” oluk hin ebam wesimu re,

²⁴ at il yethesirik e, disogo mo’gulesi, “Aphwami lagaimu yerentegis a’geat de, e hwi a, epegi o,” oluk mo’gulesimu re,

²⁵ at Yesus en pobuk e’gik il pam tenak pesimu re, il dek otluk op agarik e, di a’ge yu a’ge il pobisogo yethesi.

²⁶ Il pobisogo yethesimu re, at Yesus en e, disogo mo’gulesi, “O kota eba pobuk ’gu erlakma en ’bekhirat lu o,” oluk owi pam perakpesi.

Petrus en, “Hat hebe Kristus at o,” oluk ’baksogo Yesus mo’gulesi wene

²⁷ Asogo toluk, at Yesus osi iak wogu legesa a’ge ebano en, o eba en o kota Kaisarea Filipi eba eragam o’gwe o seli wei a’ge pema ebe lo’bok da ’gwil ya ’gwil louwogoluk orlu egesa. Orlu agalat e, osi ebano enebam hin wasulat e, disogo mo’gulentesi, “Is aphwami yema en, an nebe nebaget ogulat e, sa oluk ogwi no,” oluk mo’gulentesimu re,

²⁸ is en e, disogo mo’gulegisa, “Aphwami ado en e, At ebe re, Yohanes ik olomu ’belabenebise laga a’ge ano, ogulat, is ado en e, At ebe re, Elia o, ogulat, is ado en e, At ebe re, ap Allah iak mo’gulontogu legesa a’ge ebano mesik ogulat, ogwi o,” oluk mo’gulegisa.

²⁹ Asogo mo’gulegisema at en e, “Is en asogo ogwi a’geat de, his nak e, an nebe nebaget, sa oluk opogu legep no,” oluk mo’gulentesimu, at Petrus ano en e, “Hat hebe re, Kristus nis delnonobuagoluk Allah en perakpou weigoluk obok mo’gulnentesi a’ge anoat o,” oluk egeimu re,

³⁰ at en osi ’berlegat mo’gulentasulat, “An nebe nebaget egei ai re, his en aphwami ado pema modok mo’gulentagup o,” oluk enesa’go weregei.

At Yesus en e, “Di wene yu wene nebam poluk watnobua ani o,” oluk naduk mo’gulentesi wene

³¹ At Yesus en asogo enesa’go weregeirik e, wene pobuk mesik disogo mo’gulentesi, “An abat daklau wegi ano re, is ap enarlue a’ge emin, Allah eiye a’ge onuelak ’gaindek emin, Allah iak pelal wogo eiye a’ge emin, enemin en an nebe enebirapnoboluk di obotut yu obotut a’bigat taknoboluk, nebe watnobua o. Watnobuema re, nebe agauwa ’biren werak weleiktik e, henaganak a’ge en nelaluk eik o,” oluk

³² osi ebano ’baksogo mo’gulentesimu re, at Petrus en e, Yesus ebe ematekma woluk lagarik e, disogo mo’gulesi, “A! Hat e’gen ai asogo ogun o!” oluk esa’go weregeimu re,

³³ at Yesus en osi iak wogu legesa a’ge ebano epe edenogo il yerentesirik e, Petrus disogo oluk wene yagesi, “Hat Iblis hegi. Allah ogola epasu a’ge hegitsogo eberise legen erlak, we, aphwami en eberogwi ’gela’ge eberise legen yu re! Hat hebe nologotma yema enat ’bok lak o,” oluk wene yagesi.

³⁴ Wene yagesirik e, aphwami a’bik ebano emin, osi iak wogu legesa a’ge ebano emin, worlentesimu wegesema re, disogo mo’gulentesi, “Ap sa en an ne’berlik denaga leigoluk holuk e, ebabut u’gwarek paget tago a’ge ai, Nebit o, oluk ukpoluk e, e pam edikpoluk waronobogwi a’ge ai agan a’geat woluk e, an ne’berlik denaga leigoluk wemak o.

³⁵ Ye, ap sa en, An nebe nelaluk wolom nagai o, oluk ebe erlele horlouwa holuk e, waremarik nal ema o. A’geat de, ap sa en, an nebe nebaget emin, op wene yu paget emin, warema holuk e, ebe delhorlouwa o.

³⁶ Asogo a’geat de, ap sa en, di a’ge yu a’ge ’gwiangma a’ge ’berlegat eiye ema a’geat de, ebe nal ema holuk e, at en e, An agaikhen elirat sabusogo pagathwerlegi o, oluk u no? Modok erlak o.

³⁷ Ebe nal ema ai ebalema re, no’gwe a’ge e’birek o’go dip tu no. Mia o.

³⁸ Aphwami yema enebabut wiak welat Allah ebe emin opsogo wolom erlakma en, di wiak yu wiak togwi a’ge ai heneminat welat, is enil pam ap sa en, An Yesus orat o, eselat, an niak ai mo’gulontogulat, u ebele re, emde e’gerli ema holuk e, an abat daklau wegi ano pobuk naik erliktogwi modok welagai ’gela’ge takpoluk, is malaikat Allah u’gwarek paget yo’go ’belagonobou wago a’ge ebano nenemin womultik e, At yu an norat o, oluk niak ’baksogo u re, niak e’gerliat ema o,” oluk mo’gulentesi.