Ester 8 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Is Yahudi a’ge enebe waronobu a’ge paget wene le’gelak welaga a’ge ano erlagapsogo pegesa wene

¹ Agauwa ai erligeat ap Yahudi a’ge waronobu a’ge wene le’gelegei a’ge Haman ano a’ge-a’ge di a’ge yu a’ge ’berlegat at onuk logo a’ge Ahasyweros en wokho hwe lok Ester wogesi. “Ye, at Ester en, ap Mordekhai ai, naik at o,” oluk, mo’gulesimu, Mordekhai wemagoluk, yo’go pesimu e’bek wagoam e.

² Ap onuk logo a’ge cincin ene’gik segerlet pam wantogwi a’ge ai a’ge a’bosu pam cap togwi a’ge ano takpoluk e’gik ’burl a’ge pam ap Haman ’buktak pesi a’ge ano ebe weriselat, wesi a’ge, no’gorlogo ap Mordekhai ’buktak pesimu, at hwe Ester en Haman a’ge-a’ge ebano ’berlegat Mordekhai gwelabogo welemagoluk, edikpesi.

³ Asogo poluk, at ap Agag en a’ge Haman en is Yahudi a’ge tagonobo a’ge iak hwalogo pesi a’ge ano, ap onuk logo a’ge en erlagapsogo pou wagolukhwe Ester ano agauwa ano pam ap onuk logo a’ge eragam sebelogo hutla’gwegeitik nge tago oruakma.

⁴ Ap onuk logo a’ge en wa’gun emas a’ge ebelak a’ge ano pam ’bilhasuam hwe Ester ano inotluk, horoksogo oyukmu ya’gutsogo loluk, mo’guleselat.

^5-6 An heragam a’ge nil oruakhwe, aphwami an a’ge e’gin enebam agalat, norokhwi waronobogulat, tu nebitmu re, hat tu op epasulat, nebe hedeap noboluk wene yu hwalu obat hasulat, ye, hede hwedik taknebasulat, tagalat holuk, ap Agag a’ge Hamedata omlogo Haman en aphwami Yahudi a’ge di owi yu owi honuk logo a’ge heragam onoboluk welegen a’ge ebano modok perlengsogo warenebinogoluk pelal wokho perakpesimu re, erlak emagoluk, naik haren wene mu a’ge mesik hwelak poluk pelal wokho lebikpemen o.

⁷ Mo’gulesimu, ap onuk logo a’ge Ahasyweros en hwe lok Ester ap Yahudi a’ge Mordekhai emin mo’gulentasulat, “Ap Haman ano is aphwami Yahudi a’ge a’bigat warenebigoluk wene le’gelegei ai pam Haman o’gorlop herle erlilogo pogwiam, a’ge-a’ge ’berlegat wokho hat Ester wokhegis ai o.

⁸ Asogoatma re di wene yu wene an nonuk pam pelal wogo poluk cincin ano a’bosu a’ge pam cap tak oruak holuk, erlagapsogo ukpo mia atma re, pelal mesik is Yahudi a’ge enebaget tu a’ge hede en eberak poluk, op ’balu epasulat holuk e an nonuk pam ’belakpoluk, cincin a’bosu hele’gik a’ge ano pam cap poluk perakpemit o, moluk, mo’gulentesi.”

^9-13 Asogo mo’gulentesimu, o agauwa ai erlige dugwi henagan pelelegei a’ge tanggal 23 ai a’ge pam at Mordekhai en ap onuk logo a’ge paget pelal wogwi a’ge worlentasuam wegesema, pelal wouwagoluk, mo’gulentesi. Asogo mo’gulentesimu ap Mordekhai en ap ’gain onuk logo a’ge Ahasyweros onuk pam at Mordekhai en pelal wokho pesi a’ge anore yuat o, “Dugwi 12 arat pelelak tanggal 13 a’ge pam is aphwami Yahudi a’ge ap onuk logo Ahasyweros eragam enebasumu di owi yu owi o oruak o’gwe ’berlegat, onowi di kota yu kota ’berlegat odoktak poluk oruakma, is aphwami eniak mu a’ge enesegen oruak a’ge en de a ap onuk logo eragam enebasumu o do’go seli lo’bok pesimu mesik enesegen oruak a’ge en a, is ap emin, hwami emin, hwelani logomalik emin, warenebil wagaiam, is Yahudi a’ge en pang togulat, enagap delhorlogulat, wusogo onobogulat, ena’guluak modok erlagap pogulat, takpoluk, ena’ge-a’ge ’berlegat hogul wogulom obat o. Ye, agauwa tu ege yu pam is Yahudi a’ge ebano, onowim selei a’ge en wat onobogwi holuk, o’go waronobu a’ge degelogo welemagoluk, wene tu a’ge le’gelak yuat o, oluk, at onuk logo a’ge eragam enebasumu di owi yu owi edik enebi lagalat, is aphwami ena’gul onuk lo’bok enalugwap pogulat, togu lemis o, oluk, pelal wemit o,” oluk, mo’gulentesi. Asogo mo’gulentasimo, ap Mordekhai en ap onuk logo cincin pam a’bosu cap sogo poluk, is Yahudi a’ge emin, ap onuk logo eragam welagai a’ge emin, at osi di owi yu owi eiye welagai a’ge emin, di aphwami-yu aphwami onuelak ’gain-’gain emin, at onuk logo a’ge eragam enebasu mu o India en ’bekhit, o Etiopia hwerli, o 127 o do’go seli lo’bok pesimu welagai a’ge ebano ’berlegat is ap onuk logo a’ge paget modok okuda a’bik weiyalise laga ebano a’ge pam hurotluk perleneat ’gwelak entil no’gulemagoluk, wogentesi. Oluk mo’gulentasuam, ap Mordekhai en mo’gulentesi a’ge hegitsogo, ap onuk logo a’ge onuk pam is aphwami ena’gul onuk lobok di o ap wi yu owi welagai a’ge ebano is eniak pam lo’bok pelal wogwi ’gela’ge pelal wokho pogulat, is aphwami Yahudi a’ge ogo, is eniak pam lo’bok pelal wogwi ’gela’ge pelal wokho pogulat, togwiam.

¹⁴ Wogentesimu, is ap wene werak pelal wogo woluk lagai a’ge ebano ap onuk logo a’ge o kuda pam hurotluk, ap onuk logo a’ge en peraknonobou waga o, oluk, pungtak di owi yu owi so’burentil lagalat, ap onuk logo a’ge owi o lok op ebelogo werikmu o Susan ebano, en lebikpogulat, tegisa.

¹⁵ Asogo til lagaihwe, at ap Mordekhai ano ap ononuk logo a’ge onosum ’buktogwi a’ge orogole wibe’gen ’belak a’ge emin, ’gut a’ge emin, emas pam ’gare-’gare lok honogo a’ge emin, kain ebelak ’borlu welak yat mesik emin, ’buktak welat ap onuk logo a’ge borlu emin wibe’gen eragam en liplau waga. Liplau wagama, wene werak ano pelal wokho perakpil laga ai pam is aphwami o Susan welagai a’ge ’loksogo onogola enagai a’bik hegesa.

¹⁶ Is aphwami Yahudi a’ge en enede yamuk eselat, enagai a’bik loksogoat hogulat enagai en ngai-wai ogulat, nononuk op agama re, nogorlok o, ogulat, tegisa.

¹⁷ Wene werak pelal wogo a’ge ano di owi yu owi emin, di kota yu kota emin, ap onuk logo a’ge eragam enebasumu ebano ’berlegat edik enebil lagaiam, is aphwami Yahudi a’ge enede aganhan oduk ’gela’ge lobuk eselat, seni lok sorogwiam, is aphwami ena’gul onuk mu a’ge eba welagai a’ge ebano a’bigat aphwami Yahudi onogorlok en, “Nis his a’ge omok o,” oluk, enemin egesa.