Ester 7 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Ap Haman o’gorlop Herle erlilogo e pam urlok takpegesa wene

^1-2 Woluk Legesema, ap onuk logo a’ge Haman emin hwe lok Ester agauwa mesik emin seni soru a’ge ano noluk, anggur a’bosu no’gulat, ap onuk logo a’ge en hwe Ester ano mo’guleselat, “Ester yu o. Hat hwe hebe logatma, haren no a’ge ’gonu mo’gulnorogun holuk wokheselat, ye, mo’gulneik epasu legen a’ge ano mo’gulnorogun holuk an ukhebaik erlak ’berlegat wokheselat, tagalat, o an eiye welegimu yema ogo me’gisogo wokheigatma re, in o.”

^3-4 Mo’gulesimu, at hwe lok Ester ano en wene mo’guleselat, “Naik o. Hat honuk logo a’geatma, an emin, aphwami an a’ge nenemin watnonobogulat, nena’guluak modok erlagapsogo nonobo a’ge nenebam oruakma re, hat en an hede hwedigap nebasulat, ye, hat naik obat, nepasulat holuk, an neli inogoluk ’gonu mo’gulheselat, ye, aphwami an a’ge ogo, enagap delinogoluk mo’gulheselat, tu nagai epegirikmu re, mo’gulhegis o. An emin, aphwami an a’ge emin, aphwami eneragam a’ge welemagoluk, o’go ’bal nenebelip holuk, hat di wene yu wene hwalil lasumu, ebenagaikmu e’ginap hoboma, mo’gulhoum puk a’geat de, nenebe erlagapsogo nonobo ai en mo’gulhegis o.”

⁵ Mo’gulesimu, ap onuk logo Ahasyweros en hwe lok Ester ano mo’guleselat, “Ap ano olot het en welat, ogorlok erlaksogo ede se wiak asogo tu oluk egei ai sa o? At ebe re, ’ge o?”

⁶ Mo’gulesimu, at Ester ano en, “Modok ebirap nonoboluk, wiagap nenebayogoluk tiso ano re, ap wiak edip ebe re Haman Yuat o!” Oluk mo’gulesimu, at Haman ano arogun yuk egeitik, ap onuk logo a’ge Ahasyweros hwe lok Ester emin il edenogo ’gwelakhasuam.

^7-8 Ap onuk logo a’ge olot het en anggura’bosu nasu laga a’ge ano ukpoluk, inagarik odipmu o’borlma ebale opsogo hele’gikmu ebano libagama, at Haman ano en, ap onuk logo a’ge yu, an watnebigoluk arat eberegeitik lebaga hegi, oluk epesirik, hwe lok Ester ano huragoma ebalema ebano set hwalisoma, ap Haman ano at ebe eli wouwogoluk, Ester eragam odogorlu pam ya’gutsogo hutla’gwegeitik oruakma ap onuk logo a’ge odipmu en’guagalat, il hesirik, iak loksogo, eselat an modok nugwe nemin nowi pam oruakma at de, wiagap po ’gela’ge tago yu re, no oluk a? Owan osokhwe is ap onuk logo a’ge paget togwi a’ge ebano wegesarik ap Haman orogole sum en dopno takpesi.

⁹ At onuk logo a’ge paget togwi a’ge onouwarli wogo a’ge mesik onuk Harbona en at onuk logo a’ge mo’guleselat, “Ap hat hagab delegei a’ge Mordekhai ano o’gorlop herle erlilogo po a’ge paget at Haman en e yat 23 meter a’ge owi edipmu daintak pesimu oruak o.” Mo’gulesimu, at onuk logo a’ge en, “E ano pamat Haman o’gorlop herle erlilogo pei lit o.”

¹⁰ Mo’gulesimu, at Haman en e, ap Mordekhai erlilogo pul oluk daintegei a’ge ano pam at Haman anoat o’gorlop herle erlilogo urloktak pegesema, ap onuk logo a’ge en olot het pasu laga a’ge ano arat erlak aga.