Ester 2 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Hwe Ester en hwe lok a’ge mesik edikpesi wene

¹ Asogo toluk pobuk, ap Ahasyweros olot het epasu laga a’ge ano Yamuk egeimu, at hwe Wasti en tegei ano pam wene wusogo lebikpesi ano pam ede wiak aga laga.

² Ede ago nak en e, at ebaget togwi a’ge en at onuk logo Ahasyweros ano mo’gulogulat, “Hat nenaik honuk logo a’ge hebaget hwami dogum modok op a’ge ap emin nogogwi erlak a’ge holuk, hera hesilouwogoluk mo’gulnentemen o.

³ Hat heragam enebasumu eba di owi yu owi ’berlegat is hemin togwi a’ge en hwami dogum modok op a’ge holuk nak, wogonoboluk hwami dogum a’ge welagaimu howi o lok opsogo werikmu o Susan yema poumagoluk, edik enebil lagun ai o. Edik enebagun a’ge ano en hwami dogum ai palsogo wogonoboluk wagai holuk, ap ouwarli wogo a’ge hot Hegai hwami ’gwelagentarok welago a’ge ano en degel enebisokhwe, enebe ebelogo dogum welemagoluk, a’bosu e’ben op a’ge egelik enebasu lemak o.

⁴ Egelik enebasu lema ai pam hwele mesik hat honuk logo a’ge hagai epasulat holuk, Wasti ebalema hugwe ebe ebabut op a’ge emak o,” oluk, ogwiam, ap onuk logo a’ge ano en wene ai o’bat hegi, “oluk epesirik, ogwi a’ge ano hegitsogoat tegei.

⁵ Ye, ap Yahudi a’gul onuk Benyamin a’ge Kish en Simei deriselat, Simei en Yair deriselat, tegisama, at Yair omlogo Mordekhai ano agauwa ai erlige ap onuk logo a’ge owi o lok ’bogun wiak werikmu o Susan eba welaga.

⁶ At Mordekhai ano is ap o Babel a’ge onue ’gain Nebukadnezar en o Yerusalem sebelak poluk, aphwami Yehuda a’ge onue ’gain onuk logo a’ge Yoyakin aphwami a’bik enemin herle wusogo wogonoboluk o ’Babel enebeil lagalat Mordekhai emin pei laga.

⁷ At Mordekhai agalogo hwele onuk Hadasa ano aik-ia wat egesema re, at Mordekhai en souweap pesi. Hwele Hadasa onuk mesik Ester, ogu legesa a’ge ano orogole ebe modok op ’boguntak ebelakma re, ’la-aik waregesema at aik ue Mordekhai en at emalik ’gela’ge takpoluk, logap pesi.

⁸ Ye, ap ’gain onuk logo a’ge Ahasyweros en wene werak lebikpesi a’ge ano di owi yu owi mo’gulentil lagaiam, hwami dogum a’bigat wogonoboluk ap ’gain ano owi lok ’bogunsogo werikmu o Susan pou wegesarik, ap Hegai en degelenebise lemagoluk, wogogulat. Ye, hwe dogum Ester ano ogo, woluk ap ’gain ano owi o lok ’bogunsogo werikmu aphwami dogum ’gwelagentarok welago a’ge Hegai ano en eiyesogo welemagoluk, wogogulat, tegisa.

⁹ Asogo togwiam, at Hegai en hwe dogum Ester ano, modok op modok a’ge hesirik, ede hwedik agalat, perleneat ebe orogole modok op emagoluk, a’bosu e’ben op a’ge egeliselom a’ge emin, so’boru op a’ge wogosolom a’ge emin, pulogo pasulat, ye, hwami dogum ap onuk logo a’ge owi o lok op a’ge werikmu en togwi a’ge ene’gerlakma en hwami dogum enebe 7 polik poluk, at Ester degelogu lemagoluk, hwami dogum oruakma ebano ebale mesik modok opma ebano ene’bek pei laga.

¹⁰ At Mordekhai en Ester esa’go weriselat, an hwe ai a’ge o. Ye, naiklak ap degenik a’ge en dak nebegisa o, oluk, mo’gulonto mia o, oluk mo’gulesimu re, an hwe degenik a’ge oluk mo’gulonto erlakma enat welaga.

¹¹ Mo’gulonto erlakma enat eba oruakhwe, at Mordekhai en, Ester ebe no’gosogo oruak haik? Ye, no’gosogo takpogwi haik? Oluk, loruk hopmu hwami dogum welagaimu ebano leget o’borl akhit en il ’gwelakhailo wom nak taga laga.

¹² Is hwami dogum ebano ap onuk logo a’ge Ahasyweros oruakma louwogoluk, enebe petne onorogole petne emagoluk dogwi 1 hwerli en ’bekhit 12 pelelak eria pam tagonobogulom wene taga’ge ano hegitsogo tagonobogulat, e kasai a’bosu ebil-ebel tagonobogukhwe, dogwi 6 peleliselat, toluk, ebe, op ago a’ge a’bosu onuk mur enebetne pil lagaihwe, dogwi 6 peleliselat, takpoluk arat 12 bulan agoam, ap onuk logo a’ge oruakma, ha’gogulat togu legesa.

¹³ Ha’gogu legesa eria pam is hwami dogum ebano en, ai a’ge ’buktak poluk ha’gumu re, woknentemit o, oluk mo’gulontogwi a’ge ano is hwami dogum welagaimu ebano en wogontogwiam,

¹⁴ o hopmu ’gain onuk logo a’ge oruakma ’gwilotluk, o hup agoam, nogoluk togolik liplau wotluk, at ’gain onuk logo a’ge ano omu ugwami lodu paget wogo oruakma ap ’gain onuk logo a’ge o ot ouwarli wogo a’ge Saasgas ’gwelabogo oruakma ebano loluk, oruakma, ap ’gain ano en, at ai, wemak o,” oluk, onuk ’baksogo osoam nak e’bek laga legesa. Ye, erlak holuk, hai laga legesa erlak.

¹⁵ Asogo togwi oruakma at Mordekhai ami Abihail at Mordekhai agalogo ’gela’ge takpoluk logap pesi a’ge Ester ano, ap ’gain onuk logo a’ge oruakma lo erli’ge horok lau wagoam, at Ester en, ai a’ge taknebemin oluk mo’gulom erlakhweat de, is hwami dogum welagaimu ’gwelagentarok welago a’ge ap Hegai en Ester mo’gulesi ano hegitsogoat sum ’buk tisoam, is aphwami a’bik en enil hegesarik, hwe dogum ano, enede hwediktak pagathwerlegesa.

¹⁶ Ye, at Ahasyweros ano onue ’gain onuk logo a’ge otluk wene wusogo mo’gulentasukhwe, tahun 6 takpoluk, mesik tagalat dogwi lo a’ge onuk Tebet pelelak a’ge pam at hwele Ester ano woluk ap onuk logo a’ge owi o lok ’bogun wiak werikmu ano pei legesa.

¹⁷ Pei lagaiam, is hwami pema ebano oruakhweat de, at Ester o ano nak e, ap onuk logo a’ge ede modok hwedik takpasulat, ye, hwami dogum ap enemin nogou erlak a’ge pema oruakhwe, at Ester nak edeap poluk, ede hwedik takpasulat, tegeitik, nonuk logo a’ge nugwe hwe logat welemak o, olukhwe Wasti ebalema edikpoluk, ’gare-’gare honogo a’ge ’gela’ge a’gul pam ’buktak pesi.

¹⁸ ’Buktak pesirik, ap onuk logo a’ge Ahasyweros ano en Ester hwerlesirik agai en is ap onu’gwarek onuelak enemin, at emin togwi a’ge emin, enebaget seni lok seriselat, an nebalema welagai a’ge o di owi yu owi set hwal hwerlil laga lomup o, oluk wene wusogo lagabil lasulat, ye, is ap ononuk logo a’ge enagai en di a’ge yu a’ge so’busogo wogontogwi ’gela’ge, at a’ge-a’ge ’berlegat so’busogo wogentesi.

At Mordekhai ano, ap ’gain onuk logo a’ge ano woru a’ge, obok ogumu esa’go hwelegei wene

¹⁹ Is hwami dogum ap enemin nogou erlak a’ge agauwa mesik emin odoksogo onobou wegesa ai erlige, at Mordekhai ano ap onuk logo a’ge owi o lok ’bogun wiak werikmu ’goduk ’gwi lagaimu at emin ’gwelakharok welemagoluk edikpesi,

²⁰ at Mordekhai en Ester dogum ap pasulat, mo’guloso a’ge esa’go hologo nak taga laga ano ’gela’ge, an hwe di a’ge o. Ye, naik lok ap atnik a’ge en daknebegisa o, oluk, mo’gulonto mia o, oluk egesa ano hegitsogo mo’gulonto erlakma enat welaga.

²¹ At Mordekhai ano ap onuk logo a’ge owi lok ebelogo werik a’ge ano ’goduk ’gwi lagaimu iabuk tiso oruakma, is ap onuk logo a’ge paget togulat, ’goduk ’gwi lagaimu yaga welagai

²² Is enede mesigat otluk, wene ’balogu legesa a’ge ano, at Mordekhai oluk agarik, wene ano at hwe lok Ester mo’gulosoam, Ester en ap onuk logo a’ge ano mo’guleselat, “Hat wat-hobu a’ge ogwi ai at Mordekhai en hwelegeimu en mo’gulhosu egi o,” oluk, mo’gulesi.

²³ Mo’gulesimu wene ano edip horo tegeitik, demat agama, is ap enebe ’biren eriano ono’gorlop herle erlilogo e pam urlok tagenebegesa. Asogo tegisa ano ’berlegat ap onuk logo a’ge Ahasyweros il oruakhwe is ap ononuk logo a’ge en togu legesa a’ge pelal wokho pogu legesema ebano emin pelal wokho pegesa.