Efesus 2 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Nis nenede paget werak ’gela’ge oruakma, Allah en nenelalugapnenebegei wene

¹ His naduk e, Allah iak sagalogo wiak togu legep ai en, henede paget henebe werak ’gela’ge welegep ani o.

² Ai erlige re, aphwami yema enebabut onotogat welat togwi ’gela’ge togu legep ani o. Asogo togulat, mu’gat enebabut wiak a’ge onue ’gain ’bogorl abel olukhwe akhit yema eiye welat, aphwami Allah iak enebit en enesa’go holu puk a’ge onogola ’gwegeitik yogodak ogo enede ’gagalisoat welago a’ge ano iak hologo welegep ani o.

³ Naduk nis ’berlegat is togwi ’gela’geat togu lege o. Nenebabut aphwami enebabut onotogat welat togwi ai ’gela’ge togulat, nenebam aganhan nak agoam wiak togulat, nenede en opoluk wiak togulat, togu legerigat o. Eria erlige re, aphwami enebabut onotogat welat togwi a’ge enemin hegirat oruakma, Allah olot het en, wiagapnenebigoluk welaga.

⁴ Asogo welaga a’geat de, pobuk at ebabut op modok en, loksogoat edeapnenebegei o.

⁵ Nis wiak togu lege ai pam, nenede paget nenebe werak ’gela’ge oruakma, Allah en edeapnenebegeitik, Kristus emin hwedik taknonoboluk neneminat nenelalugapnenebegei ai o. Ai en, his at ebabut op enat delhenebegei ai o.

⁶ Nenelalugapnenebegeimu re, nis Kristus Yesus emin hwedik oruakma, pobuk at emin ’bogorl pam ’gain welat is logon neneragam tenentarok welemagoluk emin ediknenebesi ai o.

⁷ At Allah en asogo tegei ai re, o pobuk wolomul eria pam welat aphwami en e, “Allah ebabut op modok en edeapnenebesi o,” oluk enagat pobi togu lemagoluk delnenebegei ai, ebe re, Kristus Yesus enat delnenebegei o.

⁸ His henede at ebam he’berik pogwiam e, at ebabut op ano en delhenebegeimu welegep ai, edip honu’gwarek en delhwerlegep puk. We, di a’ge yu a’ge o’go erlagat wogontogwi ’gela’ge, at Allah enat delhenebegeimu welegep ai o.

⁹ His en, “Nis op togu lege pam en de, delnenebegei o,” oluk, his pema honu’gwarek en erlikhorlo modok mia o.

¹⁰ At enat opsogo heli’gogo nenebesimu welege o. Ai re, nis Kristus emin hwedik welat, di a’ge yu a’ge opsogo nak togu lemagoluk, nenebabut muat ’get walnentesi ai re, ebe Kristus Yesus enat walnentesimu welege o.

At Kristus en nenebe at u’gwarek emin mesigat la’bulogo nenebesi wene

¹¹ His naduk e, henebe o’borl o’gwe a’ge welegep ano, henede eberit o. Is ap Yahudi a’ge aphwami enepenen en enagap ene’gerlimu a’ge ’balenebigisa a’ge ai en, his henebaget e, “Enagap ene’gerlimu a’ge ’belak erlak a’ge o,” oluk ogu legesa.

¹² Ai erlige re, Kristus ebe emin hektak welat, henebe Israel a’ge erlak o. We, is mu a’ge ’gela’geat welegep ani o. Asogo oruakma, at Allah en e, wene is Israel a’ge enemin ’balogulat e, “Disogo takhenebaik o,” oluk obok mo’gulentesi a’ge ano, his heneperlagat welat, “Op ema o,” oluk henede opo erlakma enat, Allah eragam ’gu erlakma en, ’gwiangma yema welat, Allah ebe heneperlagat welegep ani o.

¹³ Naduk e, henebe walekmayat welegep a’geat de, yogodak, Kristus Yesus emin hwedik tigepma re, at emep namogo waraga ai pam, horok ya henebesimu welegebat o.

¹⁴ Aphwami Yahudi a’ge emin, o’borl o’gwe a’ge emin, enemin hektak oruakma re, ’burl ’gwe ’belak leget ’gela’ge lok werik welaga a’ge, at Yesus en la’bulogo nenebasu a’ge ano ebe waragalat hwerli ’belak ano moluksogo erlagap poluk e, nenebe mesigat la’bulogo nenebesimu welege ai o.

¹⁵ At Kristus en, nena’gul onuk Yahudi a’ge emin, is o’borl o’gwe a’ge emin, ’biren eria welaga a’geat de, at emin mesigat hwedik taknonoboluk nena’gul onuk mesigat ’get a’ge la’bulik nenebaigoluk e, wene Allah en nenesa’go wusogo, “Disogo tu, asogo tu o,” oluk mo’gulnentesimu wene ’belak oruak a’ge ai erlagap pasulat, emin hwedik taknenebesi ai o.

¹⁶ At Kristus ebe e pam edikpoluk werigisema waragalat, Allah emin wik-wiaksogo il ’belak ’gela’ge welege a’ge ano, erlagap poluk e, nenebe nin pema a’ge, nin pema a’ge enemin, mesigat la’bulogo nonoboluk, Allah e’bek woknonoboluk waga ai o.

^17-18 At Yesus en asogo woknonoboluk wagama re, nin pema a’ge, nin pema a’ge enemin, at Allah Arogun mesigat ai pam nenaik Allah e’bek ’gwilo a’ge elirat aga, oluk, Yesus ebe nadugat wagarik e, “Henemin la’bulik henebegi o,” oluk, wene op wene his o’borl o’gwe a’ge walekma oruakma mo’gulhentasulat, nis aphwami Yahudi a’ge horoksogo oruakma mo’gulnentasulat, tu aga ai o.

¹⁹ Asogo waga ai pam, his henebe ap mu a’ge, ap ’bok a’ge ’gela’ge welegep a’ge ano, yogodak asogo erlak agama, henebe Allah eiyagai egeptik e, is enemin, at Allah owi pam eba honowiragat egeptik welegep o.

²⁰ At Kristus Yesus ebe wa’gi logo a’ge delak oruakma, is ap at en yo’go onoboluk peragenebesi a’ge ebano emin, is ap Allah iak mo’gulontogwi a’ge ebano emin en, ebam louksogo worogu legesema re, his henebe nis en ebam louksogo werik henebegema welegep o.

²¹ Nis ’berlegat nenebe lo’bok, at Yesus emin hwedik taknonoboluk e, o dip-dip worogwi ’gela’ge, o ai ebesigat nenaik Allah u’gwarek ebaget owi wusogo nenebasu ai o.

²² Ai ’gela’ge re, his Kristus emin hwedik oruakma, is logon enemin o mesigat Allah owi werikmu Arogun welemagoluk, wusogo henebasu ai o.