फीलीप्पी INTRO1 - पश्चिम तामाङछ्येःकी परीचय चु चीठी पावलचे तीन्हम्स्योकी युरोप् पङ्बे ग्लाकी ङोन्ग्यम्की मन्डलीत ब्रीबल मुबल। हुजु मन्डली फीलीप्पी पङ्बे सहर्री मुबल, हुजु सहर्मी माकेडोनीया पङ्बे रोमी प्रदेस्की सहर् गीः मुबल। चु चीठी ब्रीबे बेलोरी पावल जेल्री च्युप्पल मुबल, ओसेम् गदे ख्रीस्टीयन्माचेम् थेत बीरोद् लज्यीम् दुख तनलबल मुबल। हुजु बेलोरी फीलीप्पीइ मन्डलीरी भ्युकी तम्मा प्रचार् तटीब मुबल। हुजुचे लज्यीम् थे दुखी तबल मुबल। तर होले तलेनो, चु चीठीचे फीलीप्पीइ बीस्वासीमात तङ्नलबतेङ् बीस्वास्री आर् खनलबमी पावलचे ख्रीस्ट्री स्य्हेङ्बे बीस्वास्चे लज्यीम्नो य्हीन्ब बी पङ्ब खम्ब। चु चीठी फीलीप्पीइ ख्रीस्टीयन्मात व्होर्छ्येः पीन्बे लागीरी ब्रीबल मुबल। थेङ्यीमाचे पावलत खाचो तबे बेलोरी भेटीमा पीत्पल मुबल। चुइ मौकरी पावलचे र्हङ्तेङ् थेङ्यीमात खबे दुखइ बेलोरीएनो थेङ्यीमात आर्तेङ् भर् पीन्बरी चु चीठी ब्रीबल य्हीन्ब। थेङ्यीमाचे र्हङ्की लागीरी लोभ्तेङ् घमन्ड लज्यीम् सोब बीमम् येसुइ नम्र बानीबेहोर्मा लोप्खइ पङ्ज्यीम् अर्ती पीन्ब। ख्रीस्ट्री मुबे थेङ्यीमाकी जीवन्मी पर्मेस्वर्की बर्दान् य्हीन्ब। चु थेङ्यीमाचे यहुदीमाकी मोसाचे ब्रीबे नीयम्की पर्बमा म्हन्दीज्यीम् अय्हीन् तर थेङ्यीमाकी बीस्वास् ग्यम्से यङ्बल य्हीन्ब पङ्ज्यीम् व्हल् लपीन्ब। थेचे ख्रीस्ट्री तज्यीम् सोबलमात पर्मेस्वर् ग्यम्से यङ्बे तङ्बतेङ् सान्तीइ बारेरी ब्रीब। ख्रीस्टीयन् बीस्वास्तेङ् जीवन्री यङ्बे तङ्ब, भरोसा, सेम् गीः तज्यीम् टीब ओसेम् बीस्वास्री कोङ्ज्यीम् टीबरी बङ् लथोब बी पङ्बे चु तम्मानो पावल्चे चु चीठीरी पङ्बे य्हक्को महत्वइ तम्मा य्हीन्ब। चु चीठी ल्हो-ल्हो चीठी बीम फरक् म्रङ्ब। चुरी पावलचे फीलीप्पीइ मन्डलीत गत्ते य्हक्को म्होइब मुबल पङ्बे तम् ङोन्बल मुब। चु छ्येःरी मुबे तम्मा परीचय १:१-११ पावलकी र्हङ्की अवस्था १:१२-२६ ख्रीस्ट्री मुबे जीवन् १:२७-२:१८ तीमोथीतेङ् इपाफ्रोडीटसकी लागीरी योजना २:१९-३० बीरोदीमातेङ् खतरामा ग्यम्से जोगइतीबे चेतावनी ३:१-४:९ पावलतेङ् फीलीप्पीइ र्होमा ४:१०-२० बुत्पल ४:२१-२३ |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.