फीलीप्पी 4 - पश्चिम तामाङअर्तीमा 1 होत्तज्यीम् ङइ म्होइबे बीस्वासी र्होमा, ङ एङ्यीमात म्होइब, ओसेम् एङ्यीमात य्हक्को व्हल् लस्यीनो टीब, एङ्यीमाचे लज्यीम् ङ य्हक्को तङ्ब ओसेम् एङ्यीमानो ङइ लक्की बक्सीस् य्हीन्ब। ङइ म्होइबे बीस्वासी र्होमा, एङ्यीमा प्रभुरी चोलेनो कोङ्ज्यीम् टीउ। 2 इयोदीयातेङ् सुन्तुखे, ङ एङ्य्हीत प्रभुरी सेम् गीः तज्यीम् थुन्ज्यीम् टीउ बी फ्या लब। 3 ओसेम् ङइ बीस्वासीलो र्हो, चु अमकोल ङ्य्हीत र्हो लपीनो बी ङ एत फ्या लब, तलेपङ्सम् थेङ्य्हीचे ङतेङ् बक्च्य ज्यबे सम्तर् स्येत्पे लक् स्य्हेङ्बल मुब। ओसेम् ङतेङ्कीनो अय्हीन्, क्लेमेस पङ्बे र्हो ओसेम् ङइ ल्हो-ल्हो र्होःमातेङ्एनो थेङ्य्हीचे बक्च्य लक् स्य्हेङ्बल मुबल। थेङ्यीमाकी मीन् पर्मेस्वर्चे खेम पङ्लेनो सोबे जीवन्की छ्येःरी ब्रीज्यीम् थेन्जेत्पल मुब। 4 प्रभुरी खेम पङ्लेनो तङो। ङ देबेएनो पङ्ब, तङो! 5 एङ्यीमाचे जम्मतेङ्नो स्य्हेङ्बे ज्यबे ब्यबहार् जम्मनो म्हीमाचे स्येःखइ। प्रभु ग्योनेनो ब्योन्खजेत्स्ये मुब। 6 तइ तम्रीएनो थछेरो, तर एङ्यीमात तोःबे जम्मनो तम्री प्रार्थना स्य्हेङो, ओसेम् पर्मेस्वर्त व्होर्छ्ये पीन्ज्यीम् र्हीदो। 7 ओसेम् म्हीइ सेम्चे गोबनो अखम्बे पर्मेस्वर्की सान्तीचे एङ्यीमाकी सेम्तेङ् लोत येसु ख्रीस्ट्री जोगइतीज्यीम् थेन्स्ये मुब। 8 देरेम् ज्युःरी बीस्वासी र्होमा, खजु तम् देमेन् मुब, खजु तम् स्य्हेस यङ्बल मुब, खजु तम् ठीक् मुब, खजु तम् सुद्द मुब, खजु तम् म्होइबरी जेःबल मुब, खजु तम् म्हीमात सेम्री ङ्यीबल मुब, ओसेम् खजु तम् य्हक्को ज्यबतेङ् तोप्परी जेःबल मुब हुजु तम्मारी सेम् पीनो। 9 एङ्यीमाचे ङ ग्यम्से खजु तम् लोप्ज्यी, ग्रहन् लज्यी, थ्येःज्यी ओसेम् ङतेङ् म्रङ्ज्यी, हुजुनो स्य्हेङो, ओसेम् सान्ती न्हङ्जेत्पे पर्मेस्वर् एङ्यीमातेङ् तजेत्स्ये मुब। भेटीइ लागीरी व्होर्छ्येः 10 प्रभुरी ङ य्हक्को तङ्बल मुब, तलेपङ्सम् य्हक्को दीन् लीप्चे एङ्यीमाचे ङत देबेएनो व्हल् लबल मुब। ङचे स्येःब, एङ्यीमाचे ङत खेम पङ्लेनो व्हल् लस्यीनो टीबल मुब, तर एङ्यीमाचे ङत र्हो लबे मौक अयङ्बलकीनो य्हीन्ब। 11 ङत तोःज्यी पङ्ज्यीम् ङचे पङ्बल अय्हीन्, तलेपङ्सम् खतेबे बेलोरी पङ्लेनो सन्तोक् लज्यीम् टीब ङचे लोप्पल मुब। 12 अयोःलेएनो, य्हक्को योःलेएनो खले सोथोःब बी ङचे स्येःब। खतेबे बेलोरी पङ्लेनो, म्रेन्लेएनो, ख्रेन्लेएनो, य्हक्कोरीएनो, चेक्रीएनो ङचे सन्तोक् तज्यीम् सोब लोप्पल मुब। 13 ख्रीस्ट्चे ङत न्हङ्जेत्पे सक्ती ग्यम्से ङ चु जम्मनो तम् स्य्हेङ्ब खम्ब। 14 होलेतलेनो, एङ्यीमाचे ङत दुखमा तबे बेलोरी र्हो लस्यीनो टीज्यीम् य्हक्को ज्यब स्य्हेङ्ज्यी। 15 फीलीप्पी सहर्री मुबे ङइ बीस्वासी र्होमा, सुरुरी ङ्चे एङ्यीमात ज्यबे सम्तर् स्येत्ज्यीम् माकेडोनीया पीत्थेन्ज्यीम् य्हर्बे बेलोरी ङत र्हो लबे मन्डली एङ्यीमाकीनो मुबल, हुजु तम् एङ्यीमाचे स्येःबलनो मुब। एङ्यीमा बीम ल्हो-ल्हो खजु मन्डलीचेएनो ङत र्हो लबल अरेबल। 16 होलेनो थेस्लोनीकी सहर्री मुबे बेलोरी ङत एङ्यीमाचे ङ्य्हीख्यप् टङ पीत्खज्यीम् र्हो लज्यी। 17 ङचे एङ्यीमा ग्यम्से भेटी म्हइबल अय्हीन्, तर एङ्यीमाचे ङत होले र्हो लबल तज्यीम् पर्मेस्वर्चे एङ्यीमात मोलम् न्हङ्जेत्खइ पङ्बे सेम् लब। 18 ङचे तोःबल बीमएनो य्हक्को यङ्बल मुब। एङ्यीमाचे इपाफ्रोडीटस्त पीत्खबे टङ ङचे यङ्ज्यी, हुजु पर्मेस्वर्त तङ्नलबतेङ् ग्रहन् लजेत्परी जेःबे ङोर्थङ् खबे ठा र्हङ्ब य्हीन्ब। 19 येसु ख्रीस्ट् ग्यम्से तज्यीम् ङइ पर्मेस्वर्चे थेङ्की य्हक्को सम्पती ग्यम्से एङ्यीमात तोःबे जम्मनो स्हेःमा न्हङ्जेत्स्ये मुब। 20 देरेम् पर्मेस्वर् ङ्य्हङ्माकी अपत खेम पङ्लेनो महीमा तस्यीनो टीखइ। आमेन्। ज्युःकी लस्सो 21 येसु ख्रीस्ट्त बीस्वास् स्य्हेङ्बे पर्मेस्वर्की जम्मनो म्हीमात लस्सो मुब पङ्पीनो। ङतेङ् बक्च्य मुबे बीस्वासी र्होमाचेएनो एङ्यीमात लस्सो पीत्खटीब मुब। 22 पर्मेस्वर्की जम्मनो म्हीमाचे ओसेम् बीसेस् लज्यीम् रोमी ग्यल्बो कैसर्की लक् स्य्हेङ्बे म्हीमाचे एङ्यीमात लस्सो पीत्खटीब मुब। 23 प्रभु येसु ख्रीस्ट्की अनुग्रह एङ्यीमा जम्मतेङ्नो तटीखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.