फीलीप्पी 2 - पश्चिम तामाङख्रीस्ट्की नम्रता 1 होत्तज्यीम्, ख्रीस्ट्री एङ्यीमाचे तेए हौसल यङ्बल मुब? थेङ्की म्होइबचे एङ्यीमात सान्त्वना पीन्बल मुब? एङ्यीमाचे पबीत्र आत्मातेङ् सङ्गती स्य्हेङ्बल मुब? ओसेम् गीःचे गीत दय स्य्हेङ्बल ओसेम् म्होइबल मुब? 2 होले स्य्हेङ्बल मुसम् एङ्यीमाचे सेम् गीः तज्यीम्, गीःचे गीःत म्होइज्यीम् ओसेम् आत्मातेङ् लोरी गीः तज्यीम् ङइ तङ्ब टोप् लउ। 3 र्हङ्लकीनो ज्यब तखइ म्हेन्ज्यीम् घमन्ड लज्यीम् तेएनो थस्य्हेङो, तर नम्र तज्यीम् गीःचे गीःत र्हङ् बीम ङ्हच्छ्यङ् म्हेनो। 4 र्हङ्की लागीरीकीनो अय्हीन् ल्होःल्होमाइ लागीरीएनो ज्यब स्हेङ्ब म्हेनो। 5 एङ्यीमाकी बेहोर् येसु ख्रीस्ट्ल र्हङ्ब तखइ। 6 थेङ् देमेन्नो पर्मेस्वर् मुबल, तर थेङ्चे पर्मेस्वर्तेङ् बराबर् तज्यीम् स्य्हुबे तम्त चुङ्ज्यीम् स्य्हुबे थुः लअजेत्। 7 बरु थेङ्चे र्हङ्की थु अनुसार्नो चु जम्मनो पीत्थेन्जेत्ज्यीम् बान र्हङ्ब तजेत्ज्यी। थेङ् ङ्य्हङ्मा र्हङ्बे म्ही तज्यीम् न्हजेत्ज्यी। 8 थेङ् स्यीबे बेलो सम्मनो नम्र तजेत्ज्यी। क्रुसरी स्यीबे बेलो सम्मनो पर्मेस्वर्चे कुल्बे अर्ती ङ्येन्जेत्ज्यी। 9 होत्तज्यीम् पर्मेस्वर्चे थेङ्त गोदोब्न्हङ्की जोरी कोत्जेत्ज्यी, ओसेम् थेङ्त गोदोब्न्हङ्की ङ्हच्छ्यङ् छेन् न्हङ्जेत्ज्यी। 10 चोले स्वर्गतेङ् जम्बुलीङ् ओसेम् जम्बुलीङ् दुङ्री मुबे जम्मनो बुः मुबलमाचे, येसुइ छेन्त स्य्हेस स्य्हेङ्बरी पुइ जुःथोस्ये मुब। 11 ओसेम् येसु ख्रीस्ट्नो प्रभु य्हीन्ब पङ्ज्यीम् जम्मचेनो, पर्मेस्वर् अपइ महीमकी लागीरी पङ्स्ये मुब। जम्बुलीङ्री फ्याबे य्हल् 12 ङइ म्होइबे र्होमा, ङ एङ्यीमातेङ् मुबे बेलोरी एङ्यीमाचे खेम पङ्लेनो पर्मेस्वर्की तम्मा ङ्येन्ज्यी, देरे ङ एङ्यीमा ग्यम्से थारीङ् तलेएनो एङ्यीमाचे पर्मेस्वर्की तम्मा झेन् ङ्येन्थोब। एङ्यीमाचे पर्मेस्वर्तेङ् लोङ्ज्यीम् ओसेम् स्य्हेस लज्यीम् र्हङ्चे यङ्बे मुक्तीत टोप् लबरी लक् स्य्हेङ्स्यीनो टीउ। 13 तलेपङ्सम् पर्मेस्वर् एङ्यीमा न्हङ्री खेम पङ्लेनो लक् स्य्हेङ्जेत्टीब मुब। थेङ्चेनो एङ्यीमात थेङ्की उदेस्य टोप् लबे सेम्तेङ सक्ती न्हङ्जेत्प। 14 गन्गन्तेङ तम् अज्योप्नले जम्म लक्मा स्य्हेङो। 15 ओसेम् एङ्यीमा भ्रस्टतेङ् पापी म्हीमाकी गुङ्री दोस् अरेबतेङ् सुद्द पर्मेस्वर्की ज जमे तस्ये मुब। एङ्यीमा जम्बुलीङ्री थेङ्यीमाकी गुङ्री मुरी सार्मा सर्ब र्हङ्ले सर्स्ये मुब। 16 ओसेम् एङ्यीमाचे जीवन न्हङ्बे ज्यबे सम्तर् म्हीमात स्येत्स्यीनो टीउ। चोले स्हेङ्ज्यी पङ्सम् ङचे स्यीत्तीरीनो लक् अस्य्हेङ्नेम् ओसेम् स्यीत्तीरीनो दुख अस्य्हेङ्नेम् बी ख्रीस्ट् ब्येन्युबे बेलोरी ङचे एङ्यीमारी गर्व स्य्हेङ्ब खम्स्ये मुब। 17 एङ्यीमाचे पीन्बे बीस्वास्की ठातेङ् ङइ काएनो ठाकी रुप्री य्हर्लेनो ङ एङ्यीमा जम्मतेङ् य्हक्को तङ्ब। 18 होलेनो एङ्यीमाएनो ङतेङ् य्हक्को तङ्थोब। तीमोथीतेङ् इपाफ्रोडीटस 19 प्रभु येसुइ थुः मुसम् तीमोथीत एङ्यीमाज ग्योनेनो पीत्खस्ये मुब पङ्बे आस् ङल मुब। ओसेम् थे दोःज्यीम् खबतेङ् एङ्यीमाकी बारेरी सम्तर् थ्येःज्यीम् ङ तङ्स्ये मुब। 20 देमेन्की सेम् य्हङ्से एङ्यीमात वास्त लबे म्ही तीमोथी बीमम् ल्होःल्हो ङतेङ् खलेनो अरे। 21 ल्होःल्हो जम्मनो म्हीमामी येसु ख्रीस्ट्की वास्त अस्य्हेङ्नले र्हङ्-र्हङ्की ग्यम्कीनो च्याज्यीम् ब्रब। 22 तर तीमोथी खतेबे म्ही य्हीन्ब बी एङ्यीमाचे स्येःबलनो मुब, जचे अपतेङ् लक् स्य्हेङ्ब र्हङ्ले ज्यबे सम्तर् प्रचार् स्य्हेङ्बे लक्री थेचे ङतेङ् बक्च्य लक् स्य्हेङ्ज्यी। 23 ङत तात तमु च्यागे, चु तम्मा स्येःब साच्चेनो ङचे तीमोथीत एङ्यीमाज पीत्खबे आस् लबल मुब। 24 ओसेम् ङएनो एङ्यीमाज ग्योन्नो खबे भर् प्रभुरी थेन्बल मुब। 25 ङचे ङ्य्हङ्की अले इपाफ्रोडीटसत एङ्यीमाज दोःज्यीम् पीत्खथोबल म्रङ्ज्यी। ङ्यीय्हीचे बक्च्य लक् स्य्हेङ्ज्यी ओसेम् ज्यबे सम्तर् स्येत्पे लक्एनो बक्च्य स्य्हेङ्ज्यी। थे एङ्यीमाकी चव य्हीन्ब, थेत एङ्यीमाचे ङत र्हो लबरी पीत्खबल मुबल। 26 थेल एङ्यीमा जम्मत खतु लबे य्हक्को सेम् मुब। एङ्यीमाचे थे नबल थ्येःज्यी रो पङ्ज्यीम् थे य्हक्को छेर्बल मुब। 27 देमेन्नो थे स्यीय्हम्ब सम्म नबल मुबल, तर पर्मेस्वर्चे थेत दय ङोन्जेत्ज्यी। थेतकीनो अय्हीन् ङतएनो दुखइ जोरी दुख अतखइ पङ्ज्यीम् पर्मेस्वर्चे दय ङोन्जेत्ज्यी। 28 होत्तज्यीम् ङ थेत एङ्यीमाज दोःज्यीम् पीत्खबरी य्हक्को तङ्बल मुब, थेत देबेएनो म्रङ्ज्यीम् एङ्यीमाएनो तङ्स्ये मुब। ओसेम् ङइ छेर्बएनो म्हबोर्स्ये मुब। 29 प्रभुरी थेत तङ्तङ्ज्यीम् अलेत र्हङ्ले ग्रहन् स्य्हेङो, चोतेबे म्हीमात स्य्हेस स्य्हेङो। 30 तलेपङ्सम् थे ख्रीस्ट्की लक्की लागीरी र्हङ्की बुः पीन्बरी टोप् तज्यी। एङ्यीमाचे थारीङ् ग्यम्से स्य्हेङ्ब अखम्बे स्य्हप्तो थेचे ङत स्य्हेङ्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.