فیلیپیان 4 - کتاب مقدس به زبان مازندرانی - گویش غربی

¹ پَس، می بِرارِن گه شِمارِ دوس دارمِه و شِمِه بَئینی سِه مِشتاقمِه، اِی شِما گه می خِشالی و تاجِ سَرِنی، اِی عزیزِن، هَینجوری خِداوندی دِلِه قائِم هِرِسین.

نصیحت و تشویق و دِعا

² اِفُودیه ای جا خواهِش کِمِّه و سینتیخی ای جا خواهش کِمِّه گه خِداوندی دِلِه همفکر ووئِن.

³ اَرِه، وَفادارِ همکار، تیجا هَم خوایمِه گه هَین دِتا زَنارِه کِمَک هاکِنی، چون وِشون، اَکْلیمِنتُس و بقیِه همکارانی هَمرا گه وِشونی اِسم حیاتی دَفتری دِلِه بَنوِشت بَوِه، می دوشادوش اِنجیلی کاری سِه زحمت بَکِشینِه.

⁴ هَمِش خِداوندی دِلِه خِشال ووئین؛ اَی هَم گِمِه: خِشال ووئین.

⁵ بِلین هَمه بَوینِن شِما بامِلاحظه آدمِنی، خِداوَند نَزیکِ.

⁶ هیچی ای سِه دِلواپَس نَووئین، بَلگی هر چی ای دِلِه دِعا و خواهش تمنا و شِکر هاکِردنی هَمرا، شی خواسِّه هارِه خِدارِه بُئین.

⁷ خِدای صِلح و سلامتی گه هر فهمی جا بالاترِ، شِمِه دِلیشون و فِکریشونِه مَسیحْ عیسایی دِلِه مِحافظت کِنِّه.

⁸ سَرآخَر، اِی بِرارِن، هر اونچی گه راسِ، هر اونچی گه حِرمت دارنِه، هر اونچی گه دِرسِ، هر اونچی گه پاکِ، هر اونچی گه دوس داشتنی و هر اونچی گه قابلِ پَرَسشِ، اگه عالیِه، اگه پَرَسِش هاکردنی اِرزِشِ دارنِه، هَینِنی خَوَری فِکر هاکِنین.

⁹ اونچی گه میجا یاد بَیتِنی و بِدس بیاردنی، میجا بِشنُسِنی و می دِلِه بَئینی رِه، هَینِنِه بِجا بیارین، گه خِدای صِلح و سلامتی شِمِه هَمرا دَرِه.

خِدایی تَدارک بَئین

¹⁰ خِداوندی دِلِه خِیلی خِشالمِه گه اِسا یَکَش دییَر میسِه دِلواپس بَوِنی، راساسی شِما می فِکر دَوِنی، ولی فِرصَت ناشتِنی.

¹¹ هَینِه، احتیاجی سَر نُمِه، چون یاد بَیتِمِه گه هر وضعی دِلِه قانِع ووئِم.

¹² مِن هَم دِمِّه محتاج بَووئن چِتیِه، و دِمِّه هَم فِراوونِ نعمتی دِلِه زندگی هاکِردن چتیِه. هر وَضع و حالی دِلِه، زندگی ای راز، سِئری و وَشنایی، احتیاج و محتاج ووئَنِ یاد بَیتِمِه.

¹³ اونی طریقی جا گه مِنِه قوِّت دِنِه، هر کاری رِه بَتِمّه هاکِنِم.

¹⁴ با هَین وجود، لِطف هاکِردِنی گه می زَحمتایی دِلِه شریک بَوِنی.

¹⁵ اِی فیلیپی ای آدمِن، شِما هَم، خِب دِنِّنی گه اِنجیلی کاری شِروئی جا، بعد از اونگه مقدونیه ای مَنطقِه ای جا بوردِمِه، اِلّا شِما، هیچ کلیسایی دَخل و خرجی دِلِه می هَمرا شریک نَوِه.

¹⁶ حتّی هون موقِه گه تَسالونیکی ای شهری دِلِه دَوِمِه، شِما می احتیاجاتی سِه کِمک بَرِسانینی، اَی هَم بَرسانینی.

¹⁷ نا هَینگه هَدیه ای دِمال دَووم، بَلگی یَتِه ثمری دِمال دَرمِه گه شِمِه اعتبارِ خِدایی وَر زیاد کِنِّه.

¹⁸ شِمِه کِمکیشون کامِل می دَس بَرِسیِه و شی احتیاجی جا ویشتَر دارمِه. اِسا گه شِمِه کِمکِ اِپافْرودیتوسی طریقی جا گه میسِه بَرِسانینی رِه، بَیتِمِه، هَمه چی ای جا فِراوونی دارمِه. شِمِه هَدیِه خِش بی عطر و قابِلِ قَبولِ قِروونی ایِه گه خِدارِه راضی کِنِّه.

¹⁹ و می خِدا، دِشتِه شِمِه اِحتیاجاتِ، طبقِ شی پِر جلالِ دولت، مَسیحْ عیسایی دِلِه برطرف کِنِّه.

²⁰ خِدا و اَمِه آسِمونی پیرِ تا همیشِه و تا اَبَد جَلال ووئِه. آمین.

آخرین سلام ها

²¹ دِشتِه مِقَدَّسینی سِه مَسیحْ عیسایی دِلِه سَلام بَرِسانین. بِرارِنی گه می هَمرا دَرِنِه، شِمِسِه سَلام رَسانِنِه.

²² هَیجِه ای دِشتِه مِقَدَّسین شمِسِه سَلام رَسانِنِه، بخصوص اونانیگه قیصری اَهلِ خِنِه هَسِنِه.

²³ خِداوند عیسی مَسیحی فیض شِمِه روحی هَمرا دَوو. آمین.