فیلیپیان 3 - کتاب مقدس به زبان مازندرانی - گویش غربی

مسیحی ایمونی راهی دِلِه صالح بِشمارِس بَووئن

¹ سَرآخر، اِی می بِرارِن، خِداوندی دِلِه خِشال ووئین! دِشتِه هون چیایی گه دِ شِمِسِه نِویسِمِه میسِه زحمتی نیِه، بلگی شِمِه اَمنیَّتی سِه هَسِّه.

² هون سَگِنی جا دوری هاکِنین؛ هون گِناهکارِنی جا دوری هاکِنین! اونِنی جا گه خَتنِه هاکِردنی سِه جِسمِ وِرینِنِه، دوری هاکِنین.

³ چون خَتنِه‌ بَوِه اَمامی، گه خِدایی روحی هَمرا پَرَسِش کِمّی، و مَسیحْ عیسایی دِلِه افتخار کِمّی، و اَمِه تَکیه جسمی سَر نیِه-

⁴ هر چَن گه مِن، شِه، تَکیِه هاکِردَنی سِه جسمی سَر دلیل دارمِه. اگه ینفر گِمون کِنِّه گه دلیلی تَکیِه هاکِردَنی سِه جسمی سَر دارنِه، مِن ویشتَر دارمِه:

⁵ هَشتِمین روزی دِلِه خَتنِه بَووئن، اسرائیلی قومی جا، بنیامینی ایل و تَباری جا، عبرانی وَچِه، عبرانی پیر و ماری جا؛ طبقِ شریعت، فریسی؛

⁶ طبقِ غیرت، کلیسایی آزاردهنده؛ طبقِ صالِح ووئن گه شریعتی جا اِنِه، بی عیب.

⁷ ولی هر چی گه میسِه نَفع داشتِه، اونِه مَسیحی خاطری ضرر دِنِسِمِه

⁸ راساسی، مِن هَمه چیرِه هَینسِه گه می خِداوند مَسیحْ عیسایی بِشناسیَن هَمه چی ای جا بالاتر هَسِّه، ضرر دِمِّه، و وی خاطری هَمه چیرِه از دَس هادامِه و اونانِه هِتی آشغالی تَرا دِمِّه تا می نفع مَسیح ووئه

⁹ و وی دِلِه بَنگیت بَووم، نا می صالحی ای هَمرا گه شریعتی جا اِنِه، بَلگی هون صالحی ای هَمرا گه مَسیحی ایمونی راهی جا بِدَس اِنِه، همون صالحی ای گه خِدایی جائه و طبقِ ایمونِ.

¹⁰ تا مَسیح و وی زینِّه بَووئَنی قِوَّتِ بِشناسَم و وی عذابایی دِلِه شَریک بَووم، و وی مرگی دِلِه وی تَرا بَووم،

¹¹ تا هر جور گه بَوو مِردگونی جا، زینِّه بَووئَنِ بِدس بیارِم.

تَقَلّا هاکِردن، هدفی برسینی سِه

¹² نا هَینگه تا اَلَن هَینِنِه بدس بیارد ووم یا کامل بَوِمِه، بَلگی شِه پِشتر حرکت کِمِّه تا اونِه بِدَس بیارِم، چونگه مَسیحْ عیسی مِنِه شیسِه بِدَس بیاردِه.

¹³ بِرارِن، گِمون نَکِمِّه گه حَلا اونِه بِدَس بیارد ووم؛ ولی یَتِه کار کِمِّه، اونچی گه دِمال سَر دَرِه رِه یاد کِمِّه و اونچی ای گه پِش دَرِه ای سِه، تَقلّا کِمِّه،

¹⁴ هدفی بَرِسیَنی سِه تَقلّا کِمِّه، تا جایزه‌ای گه خِدا اونِه مَسیحْ عیسایی دِلِه مِنِه بالایی سِه بَخونِسِه رِه، بِدس بیارِم.

¹⁵ اونانیگه اَمِه میِن بالِغِ آدمِنِ، وِنِه هَینجور فکر هاکِنِن؛ و اگه هر چی ای دِلِه یَجور دییَر فِکر کِنِنی، خِدا شِمِسِه هَینِه هَم معلوم کِنِّه.

¹⁶ اَما وِنِه طبقِ هر اونچی گه بِدس بیاردمی رفتار هاکِنیم.

¹⁷ اِی بِرارِن، میجا سرمَخش بَیرین، و شِمِه چِش اونانی رِه ووئه گه طبقِ اونچی گه اَمِه جا سِراغ دارِنی، رفتار کِنِنِه.

¹⁸ چونگه مِن وشونی خَوَری چَن کَش شِمارِ بُتمِه و حتّی اَلَن هَم شی اَسری ای هَمرا گِمِه، خِیلیا، هِتی مسیحی صلیبی دِشمَنِنی تَرا رفتار کِنِنِه.

¹⁹ وِشونی آخرعاقبت هَلاکَتِ. وِشونی خِدا، وِشونی اِشکمِ و نَنگ آورِ چیارِه افتخار کِنِنِه، وِشون زَمینی چیایی خَوَری فکر کِنِنِه.

²⁰ اِسا اونگه اَما آسِمونی سِه هسمی و خِداوند عیسی مَسیحی اِنتِظار کَشِمی گه یَتِه نِجات‌دهندئه.

²¹ اونیگه اَمِه ذلیلِ تَنِ عوض کِنِّه تا وی جلال بَیتِه تَنی تَرا بَووئیم، هون قوّتی هَمرا، گه وِرِه قِوّت دِنِه تا دِشتِه چیارِه شی مِطیع هاکِنِه.