فیلیپیان 2 - کتاب مقدس به زبان مازندرانی - گویش غربی

مَسیحی فروتنی ای جا سَرمَخش بَیتَن

¹ پَس اگه مَسیحی دِلِه دِلگرمی دارِنی، اگه وی مِحبت شِمِه تَسلّی ای باعث وونِه، اگه خِدایی روحی دِلِه رفاقت دارِنی، و اگه مِهرَوونی و دِلسوجی دارِنی،

² هَم فِکر ووئنی هَمرا ؟و هَین مِحبتی هَمرا، یکدِلی و هَم نظر ووئَنی هَمرا، می خِشالی رِه کامِل هاکِنین.

³ هیچ کاری رِه خِدخواهی و چِش و هَم چِشی ای سَر نَکِنین، بَلگی فروتنی ای هَمرا بَقیِه رِه شیجا بِهتَر دِنّین.

⁴ هیچکِدیم از شِما فقط شی منفعتی فِکر دَنیوو، بَلگی بَقیِه ای فکر هَم دَوو.

⁵ هَمون فِکرا گه مَسیحْ عیسی داشتِه رِه دارین:

⁶ ویگه هر چَن خِدایی هَمرا همشِکل وِه، خِدایی هَمرا بَرابر ووئَنِ، دِ دَسی نَچِسبِسِه،

⁷ بَلگی شِرِه خالی هاکِردِه و شِه نوکری شِکلِ بَیتِه آدَمِنی تَرا بَوِه.

⁸ و چون آدَمِنی شکلی تَرا بَوِه شِرِه فروتَن هاکِردِه و تا بَمِردَنی سِه، حتّی صَلیبی سَر بَمِردنی سِه مِطیع بَوِه.

⁹ پَس خِدا خِیلی وِرِه لُو بَوِردِه و یَتِه اِسم دِشتِه اِسمهایی جا بالاتر وِرِه هادا،

¹⁰ تا عیسایی اِسمی هَمرا هر زِنی ای خَم بَوو، آسِمونی دِلِه، زَمینی سَر و زَمینی بِن،

¹¹ و هر زِوونی اِقرار هاکِنِه گه عیسی مسیحْ ’خِداوَندِ‘، خِدای پیری جَلالی سِه.

نور دِنیایی دِلِه

¹² پَس اِی عَزیزِن، هَمونجور گه هَمِش مِطیع وِنی، اَلَن نا فقط می پِش، بَلگی خِیلی ویشتَر، وختی مِن دَنیمِه، شی نِجاتی سِه وِنِه ترس و لَرزی هَمرا عمل هاکِنین؛

¹³ چون خِدائه گه شِمِه دِلِه شی راضی ووئنی سِه کار کِنِّه، هَم اِراده ای دِلِه، هَم عملی دِلِه

¹⁴ هر کاری رِه بدون غِرغِر و جَر و بَحث اَنجام هادین،

¹⁵ تا بی عیب و سادِه دِل، و خِدایی بی عیبِ وَچیلِه ووئین، خطاکار و گِمراهِ نَسلی دِلِه گه شِمِه نور وِشونی میِن هِتی سِتارِه ایشونی تَرا هَین دِنیایی دِلِه تابِنِه،

¹⁶ زندگی ای کَلامِ قائِم دارین، تا مسیحی دَگِرسنی روزی دِلِه، افتخار هاکنِم گه بیخِدی دُو نَزومِه و بیخِدی زحمت نَکِشیمِه.

¹⁷ حتّی اگه لازم بَوو گه می خون هِتی یَتِه پیشکشی تَرا شِمِه ایمونی قِروونی ای سِه بَشنی بَوو، ذوق دارمِه و شِما هَمه ای هَمرا خشالی کِمِّه.

¹⁸ و شِما هَم وِنِه هَینجور خِشال ووئین و می هَمرا ذوق هاکِنین.

تیموتائوس و اِپافْرودیتوس

¹⁹ خِداوند عیسایی دِلِه اِمید دارمِه گه تیموتائوسِ خِیلی زود شِمِه وَر بَرِسانَم تا شِمِه حال و اَحوالی جا باخَوَر بَووم و می دِل خِشال بَوو.

²⁰ چونگه دِ هیچکَسِ نارمِه گه حَیقتاً شِمِه راحتی ای فکر دَوو.

²¹ دِشتِه وِشون شی نَفعی دِمال دَرِنِه، نا عیسی مسیحی نَفعی دِمال.

²² ولی شِما دِنِنی گه تیموتائوس شی آزمودِ پَس هادا، گه چِتی می هَمرا، هِتی یَتِه ریکائی تَرا شی پیری هَمرا، اِنجیلی کاری دِلِه خِدمَت هاکِردِه.

²³ پَس اِمید دارمِه هَمینگه می تکلیف روشِن بَوِه، وِرِه شِمِه وَر بَرِسانِم؛

²⁴ و خِداوندی دِلِه مِطمَئنمِه گه مِنَم خِیلی زود اِمِه.

²⁵ مِن لازِم دِنِّسِمِه اِپافْرودیتوسِ شِمِه وَر بَرِسانَم، ویگِه یَتوَر می بِرار و هَمکار و هَمرزمِه، و یَتوَر دییَر، کَسیِه گه شِما اونِه می احتیاجاتی برطرف هاکِردنی سِه بَرِسانی وِنی.

²⁶ چونگه وی مِشتاقِ شِما هَمه رِه بَوینِه و هینی خاطری گه بِشنُس وِنی ناخِشِ، پریشونِ.

²⁷ راساسی گه ناخِش وِه و دِ مِردِه. ولی خِدا وِرِه رَحم هاکِردِه، و نا فقط وِرِه، بَلگی مِنِه هَم رحم هاکِردِه، تا یَتِه غِرصِه می غِرصِه ایشونی سَر زیاد نَوو.

²⁸ پَس مِن وی بَرسانینی سِه ویشتَر ذوق دارمِه، تا یَکَش دییَر وی بَئیَنی هَمرا خِشال بَووئین و می غِرصِه ای جا هَم کَم بَوو.

²⁹ پس خِداوندی دِلِه، وِرِه دِشتِه خِشالی ای هَمرا قَبول هاکِنین و هَینجور آدَمِنِ حِرمت بِلین،

³⁰ چونگه وی، مَسیحی کاری سِه دِ مِردِه، و شی جانِ خطر اِنگِتِه تا شِمِه خِدمتی کم و کَسری مِنِه جِبران بَوو.