Sofonías 2 - Biblia Wichi

Wo ahusey iyhäja

¹ Ap'ajtitwek, wo ahusey iyhäja, amel tä ahäpehen wichi tä laj len'äfwlhiya,

² tä kamaj ninäma amehen ifwala tä Lhawuk iti amejen lewäkw tä häpe itäj, wet atehlat iwoye hup tä leyalh yafwutphä, nofw t'at tä ikatsi.

³ Is chik lelhokej amel tä let'ukwe Lhawuk, häp amel tä ka'ahäpeya wichi tä lhaichäjwethä, amel tä lewoye Lhawuk lhämtes tä ne'tek lewoye. Enlhi m'ak tä is alhoho wet a'ayhatchehchä. Chejiphäla wet Lhawuk aifwayhthen chik näm ifwala tä lham iwo lewäkwa.

Lhawuk lhämet tä itiyej Filisteo lhayis

⁴ Häp hupuy tä lhey Gaza nech'e ts'anisla t'at, wet Askalón wasihila t'at. Wichi tä ihi Asdod õyokosiphäla ifwalayej, wet Ekrón tehlat iwoye hal'ä tä õ'tonhi, wichi nemhit ihi.

⁵ ¡Awit'äy i'amejen, amel tä ahäpehen Filisteo lhayis, tä atetsel lew'et p'ante Creta wet ifwalasna lhen haw'eta lewomekitaj lhipey! Häp täja Lhawuk lhämet tä lakalelhthayaj, tsi tatay ahilähen wet yok: “Owasthihila aka honhat tä ihi Canaán lhip, oaitäyhthihena wet niwohit elh amel chik imälhehihila.

⁶ Häp aka honhat tä i'pe lewomekitaj lhip, nech'e häpkhila itshätäy t'ekhawtes lhäy'e lehis, wet tajlhamhiyelat wichi tä t'uye tä ilunpe.”

⁷ Wet Judá lhayis tä kamaj imälhehiche, lhamel tä lhayenla lewuhuya honhatna. Lhamel t'uhiyehena leläy, wet chik honatsipej tä iwo t'elakw'etesa, imähikwelachufwi häp hupuy tä nemhit lewuhuy ihi tä ihi Askalón. Tsi Lhawuk tä laka Dios iwo elha m'ak tä iwoyeje lhamel, wet tach'ote.

Lhawuk lhämet tä itiyej Moab lheley lhäy'e Amón lhayis

^8-9 Häp täja Lhawuk tä laj letumfwaya tä Israel laka Dios lhämet, wet yok: “Oläte häp Moab lheley lhämtes lhäy'e häp Amón lhayis leläkwyhanyaj tä lhamel itiyej oka wichi, wet lhaichäjejwethä tä isohiyeja oka wichi laka honhat lhip. Häp tä tamenej tä oyäm akalelhäj olhämet tä ohäpe Dios tä n'ilataj, oyok, Otech'aynhiyeja Sodoma häp Moab, wet Amón lhayis häp tä tehlat iwoye Gomorra. Wet nech'e häpkhila honhat nosoy, ch'uthanil t'at chik tälhila'pe, wet lajit lepesa tä nemla is. Wet oka wichi tä imälhehiche isohiyeja lhamel lakäywet lhäy'e laka honhat.”

¹⁰ Häp täja laha häp m'ak tä iwoye Moab lheley lhäy'e Amón lhayis, häp tä iläkwethä Lhawuk tä laj letumfwaya laka wichi wet lhaichäjejwethä tä tatayhlä.

¹¹ Matche tä tanhoch'ayhla Lhawuk chik tatayhlahlä lhamel, tsi häp tä yämla nofwej nilhokej n'ocheyälis tä ihiche honhatil. Wet nech'e lham tä nilhokhiyeja wichi tä ihiche lhamel laka honhatil tä n'okwihiyeja.

Lhawuk lhämet tä itiyej Etiopía lheley

¹² Amel tä ahäpehen Etiopía lheley, te amel Lhawuk ilänla amejen lefwajnhat.

Lhawuk lhämet tä itiyej Asiria

¹³ Lhawuk ipiynhila tafwojyhiye takwey, tsi iwasthihila Asiria wet ikänchihla laka hupuy tä lhamya tä lhey Nínive. Wet nech'e Nínive häpkhila honhat tä ts'anis tä tamchäy, inät ihit'a'pe.

¹⁴ Õ'tonhihichela laka ch'utey, wet õyenla itshätäy tä n'oläy lehisa lewukwey, wet itshätäy tä tayhlheley yenla lew'eta. Chilichuk lhäy'e ch'ustas yenla lelakata ch'utey tä atoschephä, wet tsetwos ihihichela laka ventanas lhäy'e lepelis.

¹⁵ Häp täja hupuymhaj wichi tä ihi lhaichäjejwethä, yenhiyejt'ak mälhhiyejatso lewit'äy, letamsekis ihi wet yopej: “Niwohit honhat chik te iwoye olhamel oka honhat.” Mat oyok, wasi hupuy, itshätäy tä fwitses yen at lhokweya. Wichipej tä inu lhipche yafwutchehen lepästey tä iläkwlhi, wet ilanejwethä lhethey häp leläkwyhanyajay tä iwoyeje.