Oseas 2 - Biblia Wichi

¹ Wet amel lewohla lheya apuhfwas tä hin'ol, lhoyayhlak, “Dios alaka wichi.” Wet äp lewohla lheya apuhfwas tä atsinhay, lhoyayhlak, “Dios alep'altsenhay.”

Israel lhayis ileyej Lhawuk

² Lhawuk yok: “Amel tihi letes akoyay, tihi letes tsi nemhit häpe och'efwa wet äp nemhit ohäpe lech'efwa. Is che ileyej tä iwo lakeyayej iyhäj hin'ol. Is che lhaitontehlä lehumnhay tä yen tichunhayaja.

³ Che niwoynayejetso, wet ots'ilkathichela. Otech'aynhiyeja täjte nech'e nichäthajchä. Oyenla ts'anisa, oyäm tamchäy, äp olänhiyeja neheläp.

⁴ Op'altsenhit'ala leles, tsi häp tä lakain'owos.

⁵ Lako t'at tä iwo lakain'oyaja, wet lhain'äfwlhatlhi. Wet yok, Ohohiyela ohumnhay häpkhilek hiw'enla n'oho olhäk wet inät, okaw'ole wet ow'uy, oka aceite lhäy'e oka hat'es.

⁶ “Häp tä tamenej tä op'ohiyejila ch'uthanil len'äyij, wet äp olafwiyejlhila n'olafwek häpkhilek lajit len'äyija.

⁷ Fwetajlat ihänwethä lehumnhay, mat ifwitshit'ala. T'uhikwela mat nilhokhiyet'ala. Nech'e yohlak, Oyäpnhiyela Hin'o tä ichun tä i'noyej, tsi häp tä iste tä oiyej, nitehiyat iwoye athana.

⁸ “Nitichunhit'ahlä tä olhamte tä ow'enho yachuyaj lhay wet hat'es tä uva t'i wet aceite, wet äp olhamte tä oy'isejtet lhip plata lhäy'e oro tä wuj laha, wet yenejlhihte lecheyälis tä w'et t'ekhayehen.

⁹ Häp tä tamenej tä osohiyeja oka yachuyaj lhay wet oka hat'es che nichäte lewhäy tä n'olanyaj iche. Wet onachajila lhame okaw'ole lhäy'e wesaj täjte ow'uyyenhi.

¹⁰ Ow'enyenhiyeja lehumnhay tä ots'ilkatche. Täjtso niwohit täjche ifwayhthiyeja otkwey.

¹¹ Owohla lepesa lakäjyaj tä itihipej ifwala tä yenpej käjyaja tä iwel'a tä nech'e, lhäy'e tä n'ot'elakw'et, lhäy'e nilhokej lakäjyajw'etes.

¹² Wet häp lechumtes tä uvaw'etes lhäy'e higos lhiley tä lham yopej, Häp täja tä ohumnhay yen okahaya, - olham Dios owasthihichela, oyenlat hon'ala, itshätäy tä fwitses t'ekhawethila t'at.

¹³ Oyenla tesa täjmhaj yenpej n'okhayajayej lecheyälis häp incienso tä iwunhomche, wet lhaisilatyenejen lhamsilis lhäy'e lefwushis, wet ihänwethä lehumnhay wet hip'ethet n'ohlä. Olham tä ohäpe Dios tä wichi Lewuk olhämet t'at täjtso.

Lhawuk hi'isyenla lhame laka wichi Israel

¹⁴ “Äp oyachajihola tä oti lhamej ohumnek. Ohänhiyela ts'anis, ofwenhihola olhämtes tä ischehen.

¹⁵ Oyachajiyela lechumtes tä uvaw'etes, wet honhat tä w'awulhchä tä lhey N'owit'äyhyaj nech'e häpkhila n'oniwhayaj lepe. Wet lham nichulhla n'oho, tehlat iwoye täjte kamaj nech'efwaj tä thaläkw, tehlat iwoye täjte nech'e tälho Egipto.

¹⁶ Che nichäte ifwalatso, yenlat n'oye Elh tä iyej t'at, nemla yen n'oye Ba'al. Olham tä ohäpe Dios tä Lewuk olhämet t'at täjtso.

¹⁷ Osohiyeja lak'aj tä iwopej lheya Ba'al, häp n'owuk dios tä kamatache, wet nemla yen lhämeta.

¹⁸ “Häp lewhäytso okänthiyejlhila Israel lhayis itshätäy tä fwitses, lhäy'e afwenchey, lhäy'e amlhätas. Wet osohiyeja laka honhat häp n'oka'tshayaj lhäy'e lechal tä häpe n'olutses lhäy'e n'ofwajnhates, häpkhilek oka wichi iwot letamseka.

¹⁹ “Israel, oayenhiyela elh tä oiyej, pajihit'ak ole amej. Tsi ahäpe elh tä lhamya tä oiyej tä yiwetche n'olhämet p'ante ichunya, wet oalehumnek t'at, osohit'a amej op'altsenyaj.

²⁰ Oayenhiyela elh tä oiyej, olhay'amkatla amej, wet häp tä letäfwenhila n'oyej tä ohäpe Awuk.

²¹ Olham tä Awukn'o oyok, Che nichäte lewhäytso, onchulhihola pule t'alhyaj, wet pule nichulhihola honhat t'alhyaj, wet ichenhiyela pelhay.

²² Wet honhat nichulhihola n'okäs t'alhyajay, wet iwohla lhaya, wet n'okäs nichulhihola Israel lhayis t'alhyaj.

²³ Otihihila oka wichi honhat wet Olewukla t'at lhamel. Op'altsenla häp lhamel tä õyennaj lheya Ka'op'altsenhaya, wet otahuyhiyeja häp iyhäj tä õyennaj lheya Ka'okawichiya. Oyohlak, Amel nech'e ahäpehen oka wichi, wet lhamel yohlak, Am nech'e ahäpe oka Dios.”