Levítico 27 - Biblia Wichi

Hin'o wok atsinha tä õhw'enho'pe Lhawuk m'ak tä matche

¹ Lhawuk tahuyej Moisés wet yok:

² –Fwenho häp Israel lhayis, ok, “Chik iche elh chik häpe chik ifwenho Lhawuk häp lhämet tä yäm matche chik yenlhi m'ak chik häpe, wet yen tetnekayej hin'o wok atsinha wet hiw'enho Lhawuk, is t'at. Wet chik paj chik t'uhläk äp ilanhi elhtso, iwoye t'at chik tiskanejpe chinaj t'äj.

³ Chik elh hiw'en veinte nekchämis pajtha sesenta nekchämis, häp tä laha cincuenta chinaj t'äj mhoy tä plata tä is chik õhw'enho Lhawuk. Õ'chumyenlhi chinaj t'äj tä sacerdotes ichumyenlhi.

⁴ Wet chik häpe atsinha, häp tä laha treinta chinaj t'äj mhoy.

⁵ Wet han'äfwaj tä cinco nekchämis pajtha veinte nekchämis, laha veinte chik häpe hin'o, wet chik atsinha häp tä laha diez.

⁶ Wet n'atfwas tä hiw'en tefwaji iwel'a pajtha cinco nekchämis, häp tä laha cinco chik häpe hin'o, wet chik atsinha häp tä laha tres.

⁷ Wet wichi tä thänhäy tä laka nekchämis inu'pe sesenta, chik hin'o häp tä laha quince, wet chik atsinha häp tä laha diez.

⁸ “Chik wuj tä p'elitsaj hin'o chik ifwenho Lhawuk häp lhämet tä yenlhi m'ak chik häpe, wet nemhit hiw'en laha tä w'awulhej häp elh tä hiw'enhon'ajpe Lhawuk häp lhämet tä yäm matche, chik tetso, wet is chik ihäne sacerdote häp elhtso häpkhilek y'ayhatchä laha tä tiskanla'pe, hiw'awlhathiyeja t'at m'ak tä hin'o hiw'en.

Itshäwet tä õhw'enho'pe Lhawuk m'ak tä matche

⁹ “Chik häpe itshäwet tä õhw'enho'pe Lhawuk häp n'olhämet tä õyäm matche, nech'e häpe t'at itshawet tä Lhawuk t'amajchet.

¹⁰ Isit'a chik õ'thatlä elh häp itshäwet, chik is wok ni'isa. Mat chik iche itshäwet tä õ'fwetaj õ'that lew'etho elh, wet nech'e häpe t'at n'ot'amajchet, wet nech'e täkwfwas lhamelna lewuk t'at Lhawuk.

¹¹ “Wet chik häpe itshäwet tä kok'aye, wet t'uhawethiyejt'ak õyen Lhawuk t'awayhata. Is chik õ'häne sacerdote,

¹² wet sacerdote itetshanhila chik is wok ni'isa, häpkhilek ikalelhät laha tä itihi. Wet laha chik sacerdote itihi, lahahla t'at täjtso.

¹³ Wet chik elh inachaj lhame itshäwet, is chik y'isej lhip laha tä tiskanpe.

N'owukwe wok honhat lhip tä õhw'enho'pe Lhawuk m'ak tä matche

¹⁴ “Chik iche elh tä yen t'amajchetayej lewukwe häp Lhawuk, sacerdote lhamla t'at tä itetshan laha tä itihi, chik häpe hup tä is wok ni'isa. Wet laha chik sacerdote itihi, lahahla t'at täjtso.

¹⁵ Wet chik chejphä hup tä pajche õyen t'amajchetayej Lhawuk, wet lewuk t'uhläk inachaj lhame, y'isiyeja lhip laha tä tiskanpe häpkhilek yachajo tä lewukwe.

¹⁶ “Chik iche elh tä yen t'amajchetayej laka honhat lhip häp Lhawuk, õ'tetshanhila yachuyaj lhay tä tälho honhattso chik õ'lanhi n'okäs lhay. Wet häp tä nech'e õ'hanhiyeja laha, tsi häp tä yachuyaj tä cebada, chik cien kilos, häp tä laha cincuenta chinaj t'äj mhoy tä plata.

¹⁷ Chik elhtso yen t'amajchetayej honhat lhip häp Lhawuk, tälhe nekchäm tä n'ot'amajchet tä wichi yachajehen iyhäj tä lewuhuy häp lakäywet tä iwompej, häp tä laha tä pajche õ'tihi, laha t'at täjtso.

¹⁸ Mat chik yen t'amajchetayej Lhawuk chik tajyäme nekchäm tä n'ot'amajchettso, wet häp tä sacerdote itetshanhila laha. Itetshanhiyejahlä häp nekchämis tä tatäy chik nichäte elh nekchäm tä n'ot'amajchet. Wet häp tä t'ayhlatchä laha honhattso.

¹⁹ “Elh tä yen t'amajchetayej laka honhat lhip häp Lhawuk, chik t'uhläk inachaj lhame, is chik y'isej lhip laha tä tiskanpe. Wet nech'e häp tä yachajihola tä laka honhat.

²⁰ Mat chik ninachaja lhame laka honhattso, wet chik hin'o elh chik ichäj, häp tä nemhit iwohiyela chik inachaj lhame.

²¹ Chik nichäte nekchäm tä n'ot'amajchet tä õyachajehen lewuhuy häp m'ak tä iwompej, honhatna nech'e matche tä õyachajiyela Lhawuk, wet lajit lepesa tä t'amajchet t'at. Wet nech'e sacerdotes t'at tä lhayenla lewuhuya.

²² “Chik iche elh tä yen t'amajchetayej Lhawuk häp honhat tä lechäjek tä nitälhaye lechätilis,

²³ wet sacerdote itetshanhila laha tä itihi honhattso, pajla'tha nichäte nekchäm tä n'ot'amajchet. Wet ifwalatso hin'o tiskanlatpe laha tä õ'tihi honhattso, wet yenla t'awayhata Lhawuk häp chinaj t'äjtso.

²⁴ Wet chik nichäte nekchäm tä n'ot'amajchet, honhattso õyachajiyela t'at häp lewuk tä matche.

²⁵ “Häp laha tä õ'tihipej m'ayhay, is chik õ'chumyenlhi chinaj t'äj tä sacerdotes ichumyenlhi.

Itshätäy leles tä lechunkatshay

²⁶ “Isit'a chik iche elh tä fwetaj yen t'amajchetayej Lhawuk häp itshäwet lhäs tä lechunkatsek, chik tolo, wok tson'ataj, wok kayla, tsi pajche lewuk t'at Lhawuk.

²⁷ Mat itshäwet tä kok'aye lhäs tä lechunkatsek, iwohiyelak yen leläya. Mat is chik tiskanpe mälhyej laha tä sacerdote itihi, wet y'isiyeja lhip. Wet chik nena leläya, wet is chik hiw'enho elh tä ichäj wet hin'ona hiw'enhihola sacerdote häp laha tä sacerdote itihi.

M'ak tä õhw'enho Lhawuk tä häpkhilek õ'täyhat, iwohiyet'ak õ'nachaj lhame

²⁸ “Lhawuk n'äyejo elh chik häpe chik fwetaj iwom wok inachaj lhame häp m'ak tä iyej tä pajche yen t'amajchetayej Lhawuk tä häpkhilek õ'täyhat. Chik m'ak tä n'ot'amajchettso häpe hin'o wok lelä, wok laka honhat tä tälhe lechätilis, wok m'ak at chik häpe, isit'ak iwom wok inachaj lhame. Tsi häpe t'at m'ak tä matche tä Lhawuk t'amajchet.

²⁹ Wet äpte hin'o chik õyen t'amajchetayej Lhawuk tä häpkhilek õ'täyhat, iwohiyet'ak iche elh chik ilanhi häpkhilek tiskanpe. Mat is chik õ'län t'at.

Diezmos

³⁰ “Is chik õhw'enhat diezmo tä tälho yachuyaj lhay lhäy'e häp hal'ä lhay. Wet is chik õyachaje Lhawuk, tsi lham t'at tä Lewuk.

³¹ Wet elh chik tachuma laka diezmo tä lewuk Lhawuk, is chik tiskanpe wet y'isej lhip.

³² “Chik hin'o itetshanlä leläy tä wus lhäy'e tä niwusa, häp diezpej is chik hiw'enhatej tefwaji wet itiyej n'otetnek tä yen t'amajchetayej Lhawuk.

³³ Äpte isit'a chik itetshan chik is itshäwet wok ni'isa. Wet isit'a chik fwetaj ithat lew'etho elh, tsi nech'e häpe t'at n'ot'amajchet wet nech'e täkwfwas lhamelna lewuk t'at Lhawuk.”

³⁴ Häp tähestso Lhawuk lhämtes tä hiw'enho p'ante häp Moisés tä i'pe tachenaj tä Sinaí, ne'tek iwo siläta Israel lhayis.