Levítico 1 - Biblia Wichi

Häp itshäwet wok afwenche tä õ'wunhomche tä õyen Lhawuk t'awayhata

¹ Lhawuk ichufwi carpa tä lewukwe, wet t'äne häp Moisés wet yok:

² –Häp tähesna olhämtes tä is chik lefwenho häp Israel lhayis. Chik iche elh tä ihän n'oye otw'ayhat tä itshäwet, is chik ichäj alhoho itshäwet tä wuj wok tä niwuja.

³ “Chik häpe itshäwet tä wuj tä ichäj n'oye tä häpkhilek õ'wunho, is chik häpe tolo tä hin'o tä isilataj tä newache m'ak chik iyej. Wet is chik ihäne carpa tä owukwe lepe, häpkhilek otchumlä.

⁴ Is chik iti'pe takwey häp itshäwet lhetek, wet otchumlahlä häpkhilek otäyhtej letes tä ihihlä lech'isukyaj.

⁵ Wet ilänla tolo tä ihi tä ottache. Wet sacerdotes tä Aarón leles ihänhiyela lew'oyis häp altar tä ihi carpa tä owukwe lepe, wet itsäyhichehena altar lhipey.

⁶ Wet elh tä ichäj alhoho itshäwet ilanhihila t'äj wet iwohla lhipeya.

⁷ Wet sacerdotes ilhänhihila itäj tä i'pe altar, iskonla'pe lelhetes,

⁸ wet lhamel iskonla'pe itshäwet lhipey tä pajche õyisthen, lhäy'e lhetek, lhäy'e lakäsley t'alhä.

⁹ Wet is chik õ'lejej inät häp itshäwet lheley lhäy'e lhechey. Wet nilhokej itshäwet lhipey tä sacerdote iwunhihola pajla'tha nofw. Wet nech'e häpe otw'ayhat tä õ'wunej tä lenij akäjche tä ikänitlhin'o.

¹⁰ “Chik itshäwet tä hin'o ichäj n'oye häpe elh tä niwuja, chik tson'ataj wok kayla, is chik häpe itshäwet tä hin'o tä isilataj tä newache m'ak chik iyej.

¹¹ Wet chik ilän itshäwet, is chik itihi tä altar tä ihi tä ottache lhip tä tumej tafwojyhiye. Wet sacerdotes tä Aarón leles itsäyhichehena lew'oyis häp altar lhipey.

¹² Wet elh tä ichäj alhoho itshäwet iwohla lhipeya, wet sacerdote iskonla'pe lhipey tä pajche õyisthen häp itäj tä y'oho tä i'pe altar. Wet y'isiyeja lhetek lhäy'e lakäsley t'alhä.

¹³ Wet is chik õ'lejej inät häp itshäwet lheley lhäy'e lhechey. Wet nilhokej itshäwet lhipey tä sacerdote iwunhihola pajla'tha nofw. Wet nech'e häpe otw'ayhat tä õ'wunej tä lenij akäjche tä ikänitlhin'o.

¹⁴ “M'ak tä hin'o ichäj n'oye tä yen otw'ayhata, chik häpe afwenche is chik häpe pop wok hokwinaj lhäs.

¹⁵ Wet sacerdote ihänhiyela altar häp afwenche, wet itonhihila lew'o tä ilanhi lhetek, wet nech'e iwunhihola lhetek. Wet hits'ifwnhilahchä lew'oyis wet itsäyhichela altar lhip.

¹⁶ Wet ilanhihila lakätsi, imälhthihila häp lhäk tä ihi, wet ithathihola mok'otaj tä iwhäye altar lhip tä tumej tä ifwala tälhche.

¹⁷ Wet nech'e hich'esajichela lechowej afwenche, wet itsokhihena lhafwis wet isohit'alawek lhipey, hip'ajthilawek. Chik tajyäme täja, wet nilhokej itshäwet lhipey tä sacerdote iwunhihola pajla'tha nofw. Wet nech'e häpe otw'ayhat tä õ'wunej tä lenij akäjche tä ikänitlhin'o.