Éx 40 - Biblia Wichi

Dios ne'tek Moisés itshänchä carpa tä lew'et wet õyen t'amajcheta

¹ Lhawuk tahuyej Moisés wet yok:

² –Häp iwel'a tä ichun, häp ifwala tä ichun, tshänahchä carpa tä ow'et yämthilek ohoyepej oka wichi.

³ Wet tihila lech'o häp Arca tä Ot'amajchet tä olhämtes ihi, wet p'oyejahlä wesaj tä lep'ot.

⁴ Tila lech'oye häp mesa wet tila'pe m'ayhay. Tilawhäye häp n'ochäkwhis wet tihichela n'ochäkwis.

⁵ Häte tila lech'oye häp altar tä oro tä m'ak tä akäjche lew'et. Tihila tä Arca tä Ot'amajchet tatache, wet p'oyejila wesaj häp carpa lepe.

⁶ “Wet häp altar tä itshätäy tä õ'länhen lew'et, iwthaynhila lepe.

⁷ Wet inät lehi tumtejahlä häp lepe tä altar yiwithi wet tsäyhola inät.

⁸ Wet enlhila lep'ot tä häte iwoye n'olafwek yämthilek lelafwejlhi, wet p'oyejila wesaj häp lepe.

⁹ “Wet chumela aceite tä õ'tsäype m'ak chik õyen t'amajcheta. Wet tsäyla'pe ow'et lhäy'e m'ayhay tä ihi häpkhilek lhen ot'amajchetesa, wet häpkhila ow'et tä ot'amajchet t'at.

¹⁰ Häte tsäyla'pe aceite häp altar tä itshätäy tä õ'länhen lew'et, lhäy'e nilhokej m'ayhay tä iyej, häpkhilek lhen ot'amajcheta, wet häpkhila altar tä ot'amajchet tä lhamya.

¹¹ Häte aceitetso äp tsäyla'pe inät lehi lhäy'e lew'et, wet ena ot'amajcheta.

¹² “Wet hänela Aarón lhäy'e leles häp carpa lepe, wet is chik lhamel inay.

¹³ Wet is chik Aarón taw'uyhi lew'uyis tä n'ot'amajchetes. Wet tsäyla'pe aceite häp lham wet ena ot'amajcheta tä häpe oka sacerdote.

¹⁴ Häte leles häna alhoho wet w'uyyenhichela lakay'uchelis.

¹⁵ Wet tsächela'pe aceite, mälhyej tä lewoyeje Aarón, yämthilek häpehen oka sacerdotes. Wet häp n'otetnektso tä õ'tsäche'pe aceite lhamel, tek tatäyhiyeja tä häpehen t'at oka sacerdotes tä nittäya pajla'tha nichäte lepes lheley.”

Moisés iwoye m'ayhay mälhyej tä Lhawuk ifwenho

¹⁶ Moisés iwoye nilhokej m'ayhay mälhyej tä Lhawuk ne'tek iwoye.

¹⁷ Wet häp nekchäm dos tälhe ifwala p'ante Israel lhayis yikch'oye Egipto, wet iwel'a tä ichun, ifwala tä ichun, õ'tshänchä carpa tä Dios lew'et.

¹⁸ Moisés ineyhatphä, wet itiche'pe lew'etes häp ch'utey. Wet äp ikasthaynhen häp tablas, wet hip'ajtej lemäynhay, wet itshänchehchä lech'utey.

¹⁹ Wet hich'enpe carpa häp Dios lew'et, wet hip'o'pe lhip tä tumphä, mälhyej tä Lhawuk ne'tek iwoye.

²⁰ Wet nech'e Moisés tachuma häp tunte lhipey tä Diez Mandamientos i'pe, wet ithatho Arca tä N'ot'amajchet tä pajche õyenlhi. Wet y'uyitchehen hal'äy häp argollas tä ihi Arca, wet äp iti'pe lep'ot tä häpe Dios Lep'altsenyajw'et.

²¹ Wet nech'e ihän lech'oye Dios lew'et lhip tä T'amajchet, wet hip'oyejlä sak'al tä lep'ot, wet nemhit n'äle häp Arca, mälhyej tä Lhawuk ne'tek Moisés iwoye.

²² Wet Moisés iti lech'oye mesa häp Dios lew'et. Itihi lech'o elh, itumtej lhip tä tafwojhiye, iw'echehi häp sak'al tä õhp'oyejlä Arca tä N'ot'amajchet.

²³ Wet itiche letape häp pan tä i'pe mesa tä ihi tä Lhawuk tatache, mälhyej tä lham ne'tek Moisés iwoye.

²⁴ Häte Moisés itihi n'ochäkwhis häp lech'o tä mesa ihi. Wet itayhatlä häp mesa, itumtej lech'o lhip tä tapinhiye.

²⁵ Wet iwunhen n'ochäkwis tä ihi tä Lhawuk tatache, mälhyej tä lham ne'tek Moisés iwoye.

²⁶ Häte altar tä oro Moisés iti lech'oye häp lech'o tä mesa lhäy'e n'ochäkwhis ihi. Itayhatlä sak'al tä õhp'oyejlä häp Arca tä N'ot'amajchet,

²⁷ wet iwunho incienso tä lenij akäjche, mälhyej tä Lhawuk ne'tek iwoye.

²⁸ Wet hip'oyeji wesaj tä lep'ot häp lepe,

²⁹ wet itihi tä lepe tatache häp altar tä õ'ti'pe itshätäy tä õ'länhen. Wet iwunho itshätäy lhäy'e yachuyaj lhay tä õyen Lhawuk t'awayhtesa, mälhyej tä Lhawuk ne'tek iwoye.

³⁰ Wet inät lehi Moisés itumtejlä häp lepe tä altar yiwithi, wet itsäyho inät.

³¹ Wet häp tä Moisés lhäy'e Aarón, lhäy'e leles, lhamel tachumapej inät tä ihi wet ilejejchehenpej takweyey wet ilejenpej lepach'ol.

³² Tä lhamel ihochufwi Dios lew'et, wok ihowhäye altar, ichun tä lhailejenpej, mälhyej tä Lhawuk ne'tek Moisés iwoye.

³³ Wet tä lepes, Moisés ineyhatphä lelafwek tä ilunejlhi Dios lew'et lhäy'e altar. Wet hip'oyeji wesaj tä lep'ot häp lepe n'olafwektso. Tä wak'alh Moisés lechumet tä ineyhatphä Dios lew'et,

Pule nichätpe Dios lew'et

³⁴ wet pule hip'o'pe häp carpa wet Lhawuk lewujyaj tä isi tapoyejej.

³⁵ Wet Moisés ihanhiyejt'a iwoyneje chik ihochufwi häp carpa, häp tä pule hip'o'pe wet Lhawuk lewujyaj tä isi tapoyejej.

Pule häpe Israel lhayis n'äyijwo p'ante

³⁶ Tä puletso lhaitonitphäpej tä i'pe Dios lew'et, wet Israel lhayis yikpejch'oye lakasthawet wet tujlhache len'äyij.

³⁷ Mat chik pule lhaknitonitaphä tä i'pe Dios lew'et, wet lhamel yikhihent'a, pajtha näm ifwala tä pule lhaitonitphä.

³⁸ Nilhokej ifwalas tä lhamel iwo lew'ekyaja, hiw'en t'at häp puletso tä i'pe Dios lew'et, wet tä honatsi itäj t'at tä ihi pule.