Éx 2 - Biblia Wichi

Moisés nech'e iche p'ante

¹ Iche p'ante hin'o tä iyej wichi tä tälhe letes Leví. Lham iyej atsinha tä äp häpe t'at Leví lhayis elh.

² Wet atsinhatso hich'otshan p'ante wet iwo lhäsa. Tä hiw'en tä wuj tä isilataj häp lhäs, iskat pajtha tres iwel'as.

³ Mat tä paj nemhit ihanej iwoyneje tä fwetaj iskatlhi. Tä mälhyejtso, tachuma hal'äy tä hätet iwoye tuskalis wet yen lehiya. Wet y'ilenejlhi alquitrán tä häpe honhat lhits'i tä ichalaj, wet ikasoyej asnajlhäklä lhits'i häpkhilek inät nitiyäjaho. Tä wak'alh, ithatho han'äfwaj häp lech'o, wet itihi lechowej häp tuskalis tä iche tewok lhip.

⁴ Wet häp han'äfwaj lechita takasit tä atofwehlä, mat iyahne t'at yämthilek hiw'enej m'ak chik mälhyej.

⁵ Tä paj Egipto kaniyat lhäse ihoye tewok tä t'uhläk inay. Tä nichäte, lakawos tsinhay ilunche t'at lhip, wet lham hiw'ene lehi tä ihi lechowej häp tuskalis. Wet ichen elh lakawo wet yok: –¡Mäyeh!

⁶ Tä lakawo'tsinha ihäne, lham ifwoyenpe wet hiw'en tä han'äfwaj tä ihi wet tafwlhi. Wet iyahin wet hip'altsen wet yok: –Hebreo lhayis tä lhäs han'äfwajna.

⁷ Wet han'äfwaj lechita ihoye, wet tahuyej wet yok: –¿Hä lehuminchek ot'äne atsinha tä Hebrea tä t'uyehen nä'tshas wet itifwkatla häp han'äfwajna?

⁸ Niyat lhäse yok: –Is t'at, mäh hoye. Wet atsinha lhutsha yik tä ihoye han'äfwaj lako, wet t'äne.

⁹ Tä nichäte niyat lhäse, tahuyej atsinha wet yok: –Chuma han'äfwajna wet uye n'oho. Owohla lahaya achumet. Wet lako ichäj han'äfwaj wet hiw'enho lakat'os.

¹⁰ Wet tä thaläkw p'ante, lako yachaje niyat lhäse. Wet yen lhäsa, wet yen lheya Moisés, tsi yok: –Tälho inät tä otonphä.

Moisés yikch'oye Egipto tä ilethan, ihoye honhat tä Madián

¹¹ Tä Moisés nech'e häpe hin'o tä thaläkw p'ante, wet iche ifwala tä lham ihoye lepuhfwas Hebreo lhayis wet hiw'en tä äytaj lechumet lhamel. Wet hiw'en Egipto lhele elh tä ipäjlhi Hebreo.

¹² Tä iyahin lhipey, hiw'en tä newache hin'ok hiw'enej, wet ilän Egipto lhele wet ipotejpe holo.

¹³ Tä ifwala elh p'ante yachajo tä ihoye iyhäj, wet hiw'en tä nech'e lhamel Hebreo lhayis tä tataywek. Wet ihoye wet tay'ätshane elh tä ipäjlhi elh wet yok: –¿Chipte tä lepäjlhi Hebreo tä äp ahäpe t'at Hebreo?

¹⁴ Hin'otso nichulho Moisés wet yok: –¿Atsi tä ayen olhamel oka niyata yämthilek letetshan olhamel, wet äp n'okalelhthayajwo tä iyej olhamel? ¿Hä let'uhläk letech'ayen n'oyej Egipto lhelen'aj lelän? Tä Moisés iläte, wuj tä noway wet letichunhayaj yok, “Wichi ihanej t'at m'ak tä owoye naji.”

¹⁵ Tä Egipto kaniyat ihanej tä Moisés ilän Egipto lhele, ne'tek sip'äl t'ukwe yämthilek õ'län. Mat Moisés yik tä ilethan, ihoye honhat tä Madián yämthilek yen lew'eta. Tä nichäte p'ante honhattso, wet tatayphäwhäye n'opek.

¹⁶ Wet iche sacerdote tä ihi honhattso, lhey Reuel, wet iche siete leles tsinhay. Wet ifwalatso lhamel ihoye n'opek yämthilek itonphä inät wet itsäyho tson'atas lhäthis wet iyäynej lajcha läy.

¹⁷ Matkat iyhäj tson'ataswos nämhen wet ichen atsinhay. Mat Moisés nephä wet ihoye lhamel wet yok: –¡Ch'anlhaye atsinhay! Tä iwoyetso, lham itonphä inät wet iyäynej Reuel leläy.

¹⁸ Tä lhamel yäple lajcha, wet lajcha tay'ätshane lhamel wet yok: –¿Chiwoye tä yofwajkwet lenämhen?

¹⁹ Lhamel nichulho lajcha wet yok: –Iche hin'o tä Egipto lhele, lham tach'ot n'oyehen tä hin'ol tä tson'ataswos fwetaj ichen n'ohen. Wet äp lham t'at tä itonphä inät wet hiw'enho lhaläy.

²⁰ Tä Reuel iläte, wet yok: –¿Chip ihitso hin'o? ¿Chipte tä ka'änayaye? ¡Mähen äne yämthilek tufw lhäk kana!

²¹ Tä mälhyejtso, Moisés ihoye wet ihi t'at Reuel lew'et. Tä paj p'ante, Reuel hiw'enho lhäse tä lhey Séfora wet iyej.

²² Tä paj iwo lhäsa wet Moisés yen lheya Gersón. Tsi yok: –Tä oihi honhat tä ka'oka honhata, ohäpe t'at hin'o tä w'enha lhamej.

²³ Tafwaytshi p'ante wujpe ifwalas, wet y'il p'ante Egipto kaniyat. Mat kamaj Israel lhayis hiw'en tä äytaj m'ak tä õ'woyeje tä õyen kwenkaya, wet lhamel t'änch'oye Dios.

²⁴ Wet Dios iläte lhamel lelhakli, wet nitichunche lhämet tä iwoyeje p'ante Abraham, lhäy'e Isaac, lhäy'e Jacob.

²⁵ Tä mälhyejtso, iyahin Israel lhayis wet wuj tä hip'altsen.