Ecles 2 - Biblia Wichi

N'okäjyaj häpe m'ak tä m'ak nitälhaye

¹ Otahuyhte lhamej wet oyok, Lhek owo okäjyaja, elat iche m'ak tä oisej. Mat ow'en tä täjtso häpe t'at m'ak tä m'ak nitälhaye.

² Ow'en tä n'ot'ischeyhyaj häpe t'at n'olhektshanyaj. Wet n'okäjyaj, ¿atsi m'ak tä tälhejlä?

³ Wet otichunhayaj ihi, oyok, “Lhek okäntejlhi hat'es häp ot'isan häpkhilek ohusek ihan m'akej.” Wet olhayachaje omukwehyajtso tsi otichunhayaj yok, “Elat häp tä iwatläk wichi iwoye häp ifwalas tä nintäkwa tä ihonhatena.”

⁴ Wet oyäm wuj ochumtes, oyenlhi owukwey lhäy'e okäsw'etes.

⁵ Oyenlhi olafwey, hal'äy tä õ'tihchä lew'etes, lhäy'e hal'äy tä lhay n'olhäk.

⁶ Oyenlhi inätw'etes häpkhilek inät nitsäychufwi hal'äy tä otihchä.

⁷ Ochäjen okawos tä hin'ol lhäy'e tä atsinhay, wet ow'en okawos tä nichäthihchä ow'et. Wet äpte ow'en itshätäy tä wujpey, w'asetas wet äp tson'atas, tafwaype hin'ol tä ichunej Jerusalén.

⁸ Äpte oskon lhamej oro lhäy'e plata, häp m'ak tä wuj tä laha ihi tä iyejte niyatey iyhäj tä ihiche laka honhatil. Okanchä n'ochoyhyajwos tä hin'ol lhäy'e tä atsinhay, wet äp wujpe atsinhay tä oiyejwethä wet wuj tä okäjyaj ihi.

⁹ Owujyaj tafwaype tähes p'ante ichunej Jerusalén. Äp ot'amajej otäfwnhayaj.

¹⁰ M'ak che oyahin wet okäne olhaifwonhit'ahlä, wet otihi t'at ohusek n'okäjyaj che häpe. Okäjejlhi nilhokej ochumtes, wet häp täjtso m'ak tä okatej tä tälho ochumtes.

¹¹ Tä paj otetshan t'at ochumtes tä otkwey lhenhay lhäy'e nilhokej m'ak tä owoye, wet oyen tichunhayaja tä chuttshan ochumet. Wet ow'en tä häpe m'ak tä m'ak nitälhaye, tet iwoyek ofwetaj otsoklhi yafwthi. Wet niwohit m'ak che õ'teskanej tä ihonhatena.

Che y'inhen ahantses lhäy'e amukwelis, w'enhahit'a lhamej

¹² Tä paj oyen tichunhayaja m'ak tä häpe n'otäfwnhayaj, lhäy'e n'omukwehyaj, lhäy'e n'olhektshanyaj. ¿Tsi atsihila m'ak tä yenlhi hin'o tä icheyäjo oniyatyaj? Ihichet'a, ts'ilak t'at m'ak tä wak'alhen.

¹³ Eh wet ow'en tä n'otäfwnhayaj tafwaype n'omukwehyaj, tet iwoye isi tä tafwaype honataj.

¹⁴ Häp ahantsaj isej tatelhoy tä ichumyenlhi, mat amukwe inukwe honataj. Tha ohanej tä m'ak at che iyej tehlat iwoye, w'awulhilahchä.

¹⁵ Wet oyok, m'ak tä iyej amukwe äpte ihlat n'oyej. Tä mälhyejtso, ¿atsi m'ak tä oisej tä ohantsaj? Wet äp oyok, äpte häpe m'ak tä m'ak nitälhaye.

¹⁶ Tsi tej tä ahantsaj wok amukwe, nehichela che õntichunejpejlä. Häp tä ifwalas tä tatay alhoho õhp'ethethilahlä, wet y'inhila ahantsaj, hap'akhiyeja amukwe.

N'ochumet häpe m'ak tä m'ak nitälhaye

¹⁷ Oy'ulhan n'ow'atshancheyaj, tsi chuttshan n'ochumyaj tä ihonhatena. Häpe t'at m'ak tä m'ak nitälhaye, tet iwoyek õ'fwetaj õ'tsoklhi yafwthi.

¹⁸ Wet häp tä oy'ulhan nilhokej ochumtes tä owoye tä oihonhatena, tha häpkhila t'at m'ak tä on'äyej elh tä icheyäjo ow'et.

¹⁹ ¿Wet atsi tä ihanej che ahantsaj wok amukwehila che lhayen lewuka m'ak tä tälhe ochumtes lhäy'e ohanyhayaj tä oihonhatena? Täjtso äpte häpe m'ak tä m'ak nitälhaye.

²⁰ Wet häp tä oyen tichunhayaja opäytshayaj tä häpe t'at ochumtes tä oihonhatena, wet ochowej ilehat at lhamej wet äytaj otichunhayaj.

²¹ Che hin'o wuj lehusek tä itiyej häp lechumet tä iwoye, lhäy'e lehanyhayaj, lhäy'e letäfwnhayaj, mat tä lepese elh tä isej häpe t'at elh tä nhanayej che tachumlhi'pe. Äpte täjtso häpe m'ak tä m'ak nitälhaye wet äp m'ak tä lhamya tä ni'isa.

²² Hin'o w'et lhaipäytej lechumtes tä ihonhatena wet wuj tä yen tichunhayaja. Mat tä lepese ¿atsi m'ak tä isej?

²³ Nilhokej ifwalas wuj tä leteläythayaj ihi wet lechumtes iwohit'a letamseka. Äpte tä honatsipej tha letichunhayaj lajit t'elakw'eta. Täjtso äpte häpe m'ak tä m'ak nitälhaye.

M'ak tä Dios hiw'enho hin'o

²⁴ ¿Atsi m'ak tä is che hin'o iwoye? Is che t'ek wet iyä wet akäjejlhi m'ak tä tälhe lechumet. Äpte ow'en tä täjtso häpe t'at m'ak tä tälhe Dios.

²⁵ Tsi che kahäpeya lham, laj lakäjyaja hin'o wet ihichet'a m'ak che tufw.

²⁶ Mat häp hin'o tä Dios akäjejlhi, Dios hiw'enho letäfwnhayaj, lehanyhayaj wet lakäjyaj. Wet hin'o tä iwoye lech'isukyaj, Dios hiw'enho yämthilek iskon lhamej m'ayhay wet ihutwek lakäywet, häpkhilek hiw'enho elh tä Dios akäjejlhi. Äpte täjtso häpe m'ak tä m'ak nitälhaye, tet iwoyek õ'fwetaj õ'tsoklhi yafwthi.