TANIELA 3 - Ko te Tohi Tapu i te fakauvea

Kaumea o Taniela i te gutuumu kakaha

¹ Nee fai leva e te hau ko Nepukatenesale he fakatata aulo, ko tona maoluga ko meta e tolugofulu, pea ko tona laulahi ko meta e tolu. Nee ina fakatuu leva ia ia i te potu laulelei o Tula, i te fenua o Papilone.

² Nee fakatotonu leva e te hau ko Nepukatenesale ke fakatahii te u aliki hau, mo te kau minisi, mo te kau kovana, mo te kau fono, mo te kau pule koloa, mo te kau poto o te lao, mo te kau tui fakamaau, pea mo te kau fakafofoga o te u fenua fuli, ki te fakatapui o te fakatata ae nee fakatuu e te hau ko Nepukatenesale.

³ Pea nee fakatahi leva te kau aliki, mo te kau minisi, mo te kau kovana, mo te kau fono, mo te kau pule koloa, mo te kau poto o te lao, mo te kau tui fakamaau, pea mo te kau fakafofoga o te u fenua fuli, ki te fakatapui o te fakatata ae nee fakatuu e te hau ko Nepukatenesale. Nee natou tutuu leva ia mua o te fakatata ae nee fakatuu e Nepukatenesale.

⁴ Nee kalaga leva te pule o te fakatahiga o leo lahi: Hahai, mo puleaga, mo tagata mai te faahiga lea fuli, koeni te mea ae e fakatotonu atu kia koutou!

⁵ Ka koutou logo anai ki te leo o te u mea faimusika, mo te fakatagi pupuhi, mo te salumo, mo te ukalele, mo te sapuke, mo te pesatelione*, mo te konemuse*, pea mo te u mea faimusika kehekehe, e koutou punonou anai pea e koutou atolasio anai ki te fakatata aulo ae nee fakatuu e te hau ko Nepukatenesale.

⁶ Ko ia ae e mole punou anai pea e mole atolasio anai ki te fakatata e si anai ia ia i te temi pe aia ki he gutuumu kakaha.

⁷ Koia ka logo ai anai te hahai fuli ki te leo o te fakatagi pupuhi, mo te salumo, mo te ukalele, mo te sapuke, mo te pesatelione, mo te konemuse, pea mo te u mea faimusika kehekehe, e punonou anai te hahai katoa, mo te u puleaga, mo te tagata mai te u faahiga lea fuli, o atolasio ki te fakatata aulo ae nee fakatuu e te hau ko Nepukatenesale.

⁸ Kae i te temi totonu aia, nee fakaovi ake leva ni tagata Kaletea, o fakalakahalai te kau Sutea.

⁹ Nee natou ui leva ki te hau ko Nepukatenesale: Oi hau, mauli o heegata!

¹⁰ Nee ke tuku he fakatotonu, o fakaha: Ko natou fuli ae e logo anai ki te leo o te fakatagi pupuhi, mo te salumo, mo te ukalele, mo te sapuke, mo te pesatelione, mo te konemuse, mo te u mea faimusika kehekehe, e maua ke punonou mo atolasio ki te fakatata aulo,

¹¹ pea ko ia ae e mole punou anai pea e mole atolasio anai, e si anai ia ia ki he gutuumu kakaha.

¹² Koeni, e i ai ni tagata Sutea ae nee ke tuku kia natou te pule o te fenua o Papilone, ko Satalake, mo Mesake, mo Apeteneko. Ko te kau tagata aia, oi aliki hau, e mole fakaapaapa kia koe; e mole natou tauhi ki ou atua pea e mole natou atolasio ki te fakatata aulo ae nee ke fakatuu.

¹³ Koia nee itaita kovi ai leva ia Nepukatenesale, pea nee ina fakatotonu leva ke aumai ia Satalake, mo Mesake, mo Apeteneko. Pea nee aumai leva te u tagata aia kia mua o te hau.

¹⁴ Pea nee palalau leva ia Nepukatenesale, o ui kia natou: Pe e mooni, Satalake, mo Mesake, mo Apeteneko, e mole koutou tauhi ki oku atua, pea e mole koutou atolasio ki te fakatata aulo ae nee au fakatuu?

¹⁵ I te lakaga nei, ke koutou teuteu! Ka koutou logo anai ki te leo o te fakatagi pupuhi, mo te salumo, mo te ukalele, mo te sapuke, mo te pesatelione, mo te konemuse, pea mo te u mea faimusika kehekehe, ke koutou punonou anai o atolasio ki te fakatata ae nee au fakatuu; kapau e mole koutou atolasio anai ki ai, e si anai koutou i te temi pe aia ki he gutuumu kakaha. Pea ko te atua fea anai ae e ina haofaki anai koutou mai toku nima?

¹⁶ Nee tali leva e Satalake, mo Mesake, mo Apeteneko ki te hau ko Nepukatenesale: E mole aoga ke matou tali atu kia koe o uhiga mo te mea aia.

¹⁷ Koeni, ko tomatou Atua ae e matou tauhi ki ai, e feala anai ke ina haofaki matou mai te gutuumu kakaha, pea e ina haofaki anai matou mai tou nima, oi aliki hau!

¹⁸ Kapau e kailoa, ke ke iloi, oi aliki hau, e mole matou tauhi anai ki ou atua, pea e mole matou atolasio anai ki te fakatata aulo ae nee ke fakatuu.

¹⁹ I te mea aia nee toe kovi age te itaita o Nepukatenesale, pea nee sio faikehe leva ona mata kia Satalake, mo Mesake, mo Apeteneko. Nee toe palalau leva ia ia o fakatotonu ke fakavevela te gutuumu o tua fitu age tona malohi i te fai mahani.

²⁰ Pea nee ina fakatotonu leva ki ni ihi i te kau tagata malohi o tana kau solia ke haihai ia Satalake, mo Mesake, mo Apeteneko, pea ke si natou ki te gutuumu kakaha.

²¹ Pea nee haihai leva te u tagata aena mo onatou vavae, mo onatou kofu loloa, mo onatou pulupulu pea mo te u kofu ake ae, pea nee si leva natou ki loto o te gutuumu kakaha.

²² Nee mamafa osi te fakatotonu a te hau, pea nee vevela osi te gutuumu, o tamatei ai leva e te ulo o te afi te u tagata ae nee natou si ia Satalake, mo Mesake, mo Apeteneko ki loto o te gutuumu.

²³ Pea nee fetooki leva te u tagata aena e toko tolu, ko Satalake, mo Mesake, mo Apeteneko, mo onatou haihai, ki lotomalie o te gutuumu kakaha.

²⁴ Pea nee oho leva te hau ko Nepukatenesale o tuu ki oluga i te lahi o tona mataku. Pea nee ina ui leva ki tana kau fono: Pe nee mole tou si koa la ki te afi ni tagata e toko tolu kua haihai? Nee natou tali leva ki te hau: Io, io aliki hau!

²⁵ Nee ina toe ui leva: Koeni, e au sio ki te u tagata e toko fa, e mole ni onatou hai, pea e haele i lotomalie o te afi, pea e mole pe he tahi ia natou kua vela hona fahai; pea e hage te fa tagata ko he Alo o te Atua.

²⁶ Pea nee fakaovi leva ia Nepukatenesale ki mua o te gutuumu kakaha, pea nee palalau leva ia ia, o ui: Satalake, mo Mesake, mo Apeteneko, tagata faifekau a te Atua maoluga, kotou feulufi mai ki fafo, pea kotou omai! Pea nee mavae ake leva ia Satalake, mo Mesake, mo Apeteneko mai loto o te afi.

²⁷ Pea nee fakatahi ake leva te kau aliki, mo te kau minisi, mo te kau kovana, pea mo te kau fono a te hau; pea nee natou sisio leva nee mole pe mau e te afi hona malohi ki te u sino o te u tagata aena, pea nee mole pe mahunu onatou fului ulu, pea nee mole pe vela onatou vavae, pea nee mole pe tau te mamanu o te afi ia natou.

²⁸ Pea nee palalau leva ia Nepukatenesale, o ui: Ke manuia te Atua o Satalake, mo Mesake, mo Apeteneko, ae nee ina fekaui mai tana aselo pea nee ina haofaki ana tagata faifekau ae nee falala kia ia, kae nee ina maumaui te fakatotonu a te hau. Nee natou lelei ia age te momoli o onatou sino i tanatou tauhi mo atolasio ki he tahi age atua kehe.

²⁹ I te aho nei, koeni te fakatotonu ae e au fai: Ko te tagata fuli, mei te hahai fuli, mei te u puleaga fuli, mei te u lea fuli, e palalau kovi anai ki te Atua o Satalake, mo Mesake, mo Apeteneko, e tuutuusi anai ia ia, pea e fakaliliu anai tona fale ko he tuuga otaota, koteuhi e mole he tahi ake atua ae e feala ke ina haofaki o hage ko ia.

³⁰ I te osi o te mea aia, nee hiki leva e te hau ia Satalake, mo Mesake, mo Apeteneko ki ni tuulaga mauhiga i te fenua o Papilone.