TANIELA 2 - Ko te Tohi Tapu i te fakauvea

Te moemisi a Nepukatenesale

¹ I te tau lua o te hau ko Nepukatenesale, nee fai leva e Nepukatenesale ni moemisi. Pea nee mamahi osi tona loto, pea nee mavae leva te fia moe ia ia.

² Koia nee paui ai leva e te hau te kau gaohi mea fakatalakitupua, mo natou ae e natou sivi te aluaga o te temi, mo natou ae e natou gaohi mea fakatemonio, pea mo te kau Kaletea, ke natou fakaha age kia ia ana moemisi. Nee natou omai leva, pea nee notou tutuu leva ia mua o te hau.

³ Pea nee ui leva e te hau kia natou: Nee au fai he moemisi; pea e mamahi toku loto, pea e au loto ke au iloi te moemisi aia.

⁴ Pea nee tali leva e te kau Kaletea ki te hau i te palalau fakaalamea: Oi hau, ke ke mauli o heegata! Fakamatala mai te moemisi ki au tagata faifekau, pea e matou fakaha atu anai kia koe tona uhiga.

⁵ Pea nee toe palalau leva te hau, o ui ki te kau Kaletea: E mole kei au manatui te moemisi; kapau e mole koutou fakamatala mai kia au te moemisi mo tona uhiga, e tuutuu fakalikiliki anai koutou, pea e fakaliliu anai okotou fale ko ni tuuga otaota.

⁶ Kae kapau e koutou fakaha mai kia au te moemisi mo tona fakamatala, e au foaki anai kia koutou ni meaofa, mo ni totogi, pea mo ni tuulaga mauhiga. Koia koutou fakamatala mai kia au te moemisi mo tona uhiga.

⁷ Pea nee natou toe tali leva ki te hau o tua lua: Ke fakamatala mai pe e te hau te moemisi ki ana tagata faifekau, pea e matou fakaha anai tona uhiga.

⁸ Pea nee toe palalau leva te hau, o ui: E au iloi fakapapau nei e koutou faiga ke mau he temi, koteuhi e koutou sisio kua puli te mea ia au.

⁹ Koia kapau nei e mole kotou fakaha mai kia au te moemisi, ko te tua e tahi e hili anai kia koutou fuli. E koutou faiga ke kotou teuteui ni kaka mo ni loi ae ke fakaha mai kia au, o fakalogologo ke fetogi te u temi. Koia koutou fakamatala mai kia au te moemisi, pea e au iloi anai pe e koutou fealagia te fakamatala o tona uhiga.

¹⁰ Nee tali leva e te kau Kaletea ki te hau: E mole he tagata i te kele e feala ke ina fakaha te mea ae e kole e te hau; pea e heeki he hau e tahi, pe e lahi feafeai tona pule mo tona malohi, kua ina fakamaua he mea fena ki he masi, pee ko he tagata sivi fetuu pee ko he Kaletea.

¹¹ E faigataa te mea ae e kole e te hau, e mole feala ke fakaha e he tahi te mea aia ki te hau, e gata pe ki te u atua, ae e mole tuu tonatou nofoaga i te lotolotoga o te u tagata.

¹² I te mea aia nee itaita lahi leva te hau. Pea nee ina fakatotonu leva ke tamatei te kau poto fuli o Papilone.

¹³ Nee logologo leva te fono aia a te hau i te fenua, ke tamatei te kau poto, pea nee kumi leva ia Taniela mo ona kaumea ke tamatei.

¹⁴ Pea nee palalau fakapoto leva ia Taniela kia Alioke, pule o te kau polisi a te hau, ae nee hau ke ina tamatei te kau poto o Papilone.

¹⁵ Nee palalau leva ia ia, o ui kia Alioke, pule o te kau leo a te hau: Kotea e mamafa ai te fono a te hau? Pea nee fakamatala leva e Alioke te mea kia Taniela.

¹⁶ Pea nee alu leva ia Taniela ki te fale o te hau, o kole kia ia he temi ae ke tuku ai ki te hau te fakamatala.

¹⁷ Pea nee alu leva ia Taniela ki tona fale, o fakaha te mea aia ki ona kaumea ko Anania, mo Misaele, mo Asalia,

¹⁸ o tupu ke natou kole te manavaofa o te Atua o te atu lagi, koteuhi ke aua naa tamatei ia Taniela mo ona kaumea, o fakatahi mo te kau poto o Papilone.

¹⁹ Pea nee fakaha leva te mea fakafufu kia Taniela, i he sio i te pouli. Pea nee fakafetai leva ia Taniela ki te Atua o te atu lagi.

²⁰ Nee palalau leva ia Taniela, o ui: Ke fakafetai ki te huafa o te Atua, o heegata mo heegata! A ana te poto mo te malohi.

²¹ Ko ia ae e ina fetogi te u temi mo te u aluaga o te u mea; ko ia ae e ina fakahifo mo ina fakanofo te u hau, ae e ina tuku te poto ki te kau poto mo te iloilo o te u mea kia natou ae e natou mau he atamai.

²² E ina fakaha te mea ae e loloto mo ugia, e ina iloi te mea ae e tuku i te fakapouli, pea e nofo te malama ia ia.

²³ Atua o aku tamai, e au fakakololia kia koe, pea e au fakavikiviki kia koe i tau foaki mai kia au te poto mo te malohi, pea mo tau fakaha mai kia au te mea ae nee matou kole atu kia koe, pea mo tau fakaha mai kia matou te mea fakapulipuli a te hau.

²⁴ I te osi o te mea aia, nee alu leva ia Taniela kia Alioke, ae nee fakatotonu ki ai e te hau ke tamatei te kau poto o Papilone; nee alu leva ia ia, o palalau fenei kia ia: Aua naa ke tamatei te kau poto o Papilone! Taki au kia mua o te hau, pea e au foaki anai ki te hau te fakamatala o tana moemisi mo tona uhiga.

²⁵ Nee taki fakavilivili leva e Alioke ia Taniela kia mua o te hau, pea nee palalau fenei leva ia ia ki te hau: Kua au mau i te kau popula o Suta he tagata ae e ina foaki anai ki te hau te fakamahino o tana moemisi mo tona uhiga.

²⁶ Pea nee palalau leva te hau, o ui kia Taniela, ae nee higoa ko Pelesatesale: Pe e feala ke ke fakamatala mai kia au te moemisi mo tona uhiga?

²⁷ Ne tali leva e Taniela ia mua o te hau, o ui: Ko te mea ae e kole e te hau ko he mea fakafufu, pea e mole fealagia e te kau poto, mo te kau sivi fetuu, mo te kau masi, mo te kau kikite, ke natou fakamatala ia ia ki te hau.

²⁸ Kae e i ai i te atu lagi he Atua ae e ina fakaha te u mea fakafufu, pea kua ina fakaha ki te hau ko Nepukatenesale te mea ae ka hoko mai anai i te temi ki amuli. Koeni tau moemisi mo te u mea ae nee ke sio ki ai i tou moeaga.

²⁹ Oi hau, i tou moeaga, nee ke fakakaukau o uhiga mo te temi ae ka hoko mai; pea ko ae e ina fakaha te u mea fakafufu nee ina fakaha kia koe te mea ae ka hoko anai.

³⁰ Kapau kua fakaha te mea fakafufu aia kia au, e mole tupu e ia te au he poto ae e lahi age i te poto o te u tagata mauli fuli; kae e tupu ke fakaha te fakamatala o te moemisi mo tona uhiga ki te hau, pea ke iloi e koe te u fakakaukau o tou loto.

³¹ Oi hau, nee ke sio, pea nee ke sio ki he fakatata lahi; io, nee lahi kehe osi te fakatata aia mo gigila; pea nee tuu ia ia i ou mua, pea nee fakamatakutaku osi ona mata.

³² Nee aulo te foi ulu o te fakatata; nee siliva ona nima; nee sila tona fatu mo ona kauaga;

³³ nee ukamea ona vae; pea ko ona tapuga vae, nee ukamea te tahi koga, kae nee kele te tahi koga.

³⁴ Nee ke sio ki te fakatata aia, pea nee fokifa pe kua matata mai he foi maka, ae nee mole tokoni ki ai he nima, pea nee ina taai leva te u vae ukamea mo kele o te fakatata, pea nee ina fasifasii leva naua.

³⁵ Pea nee fasifasi fakatahi leva te ukamea, mo te kele, mo te sila, mo te siliva, mo te aulo, pea nee natou liliu leva o hage ko te otaota ae e viligia mai te hahaaga fulumeto i te temi vevela. Nee ave leva ia ia e te matagi, pea nee mole toe mau leva he mea i te kogamea aia. Kae ko te foi maka ae nee ina taai te fakatata nee liliu leva ia ia ko he mouga lahi, pea nee ina fakafonu leva te kele katoa.

³⁶ Koena te moemisi. E matou fakamatala anai tona uhiga ia mua o te hau.

³⁷ Oi hau, ko te hau ia koe o te atu hau, koteuhi kua foaki kia koe e te Atua o te atu lagi te puleaga, mo te pule, mo te malohi, mo te kololia;

³⁸ kua ina toe foaki foki ki ou nima, i te kogamea fuli ae e natou nonofo ai, te u fanau o te u tagata, mo te u manu o te vao, mo te u manulele o te lagi, pea kua ina tuku kia koe te pule kia natou fuli: Ko koe ae ko te foi ulu aulo.

³⁹ I ou muli, e malaga ake anai ki oluga he tahi puleaga, ae e siisii age i tou puleaga; pea mo he tolu puleaga, ae e sila anai, pea e pule anai ki te kele katoa.

⁴⁰ E i ai anai he fa puleaga, ae e malohi anai o hage ko te ukamea; o hage ko te ukamea ae e ina fasifasii mo motumotuhi te u mea fuli, e ina fasifasii anai mo motumotuhi anai te mea fuli, o hage ko te ukamea ae e ina gugu te u mea fuli.

⁴¹ Pea o hage ko tau sio foki ki te u vae mo te u kaui tuhi e koga ki te kele pea e koga ki te ukamea, e mavetevete anai te puleaga aia; kae e ina mau anai ia ia he mea ae e ina mau te malohi o te ukamea, koteuhi nee ke sio kua fiofio te ukamea mo te kele.

⁴² O hage ko te u kaui tuhi o te u vae ae nee koga ukamea pea koga kele, e malohi anai te tahi fahai o te puleaga aia kae e gaegae anai te tahi faahi.

⁴³ Nee ke sio foki ki te ukamea kua fio mo te kele, koteuhi e na fio anai ki ni hai fakatagata; kae e mole na pipiki tahi anai, o hage ko te ukamea ae e mole feala ke pipiki tahi mo te kele.

⁴⁴ I te temi o te u hau aia, e fakatupu anai e te Atua o te atu lagi he puleaga ae e mole toe maumaui anai i he aho, pea e mole toe tuku anai ki te pule a he tahi age puleaga; e ina fasifasii anai, pea e ina maumaui anai te u puleaga fuli ake ae, kae e tuu anai ia ia totonu, o heegata.

⁴⁵ Koena te uhiga o te foi maka ae nee ke sio nee mataaki mai te mouga pea nee mole tokoni ki ai he nima, ae nee ina laliki te ukamea, mo te sila, mo te kele, mo te siliva, mo te aulo. Kua fakaha e te Atua lahi ki te hau te mea ae ka hoko anai ki amuli. E mooni te moemisi, pea e mooni tona fakamatala.

⁴⁶ Pea nee fakamapee leva te hau ko Nepukatenesale o fakatau ona mata ki te kele, o punou ia mua o Taniela, pea nee ina fakatotonu leva ke momoli kia Taniela ni failaulau mo ni kaloni.

⁴⁷ Pea nee palalau leva te hau kia Taniela, o ui: E mooni, ko tokotou Atua ko te Atua ia o te atu atua pea ko te Aliki ia o te atu hau, pea e ina fakaha te u mea ae e fufu, koteuhi kua ke fealagia te fakaha o te mea fakafufu aeni.

⁴⁸ Pea nee hiki leva e te hau ki oluga ia Taniela, pea nee ina foaki leva kia ia ni meaofa mauhiga mo lahi osi; nee ina foaki kia ia te pule o te fenua katoa o Papilone, pea nee ina fakanofo leva ia ia ko te pule lahi o te kau poto fuli o Papilone.

⁴⁹ Nee kole leva e Taniela ki te hau ke tuku age te pule o te fenua o Papilone kia Satalake, mo Mesake, mo Apeteneko. Kae nee nofo leva ia Taniela i te matapa o te hau.