SOFONI 3 - Ko te Tohi Tapu i te fakauvea

Tupuaga o te tauteai o Selusalemi

¹ Malaia ki te kolo agatuu mo fakalialia, Ki te kolo ae kua fonu i te u tagata agamalohi!

² E mole pe logo ia ia ki he leo, E mole pe ina tali he valoki, E mole falala ia ia ki te Eteleno, E mole fakaovi ia ia ki tona Atua.

³ Ko ona pule i lotomalie o ia e hage ko ni laione kaikai; Ko ona tui fakamaau ko ni lupo o te afiafi ae e mole ina fakatoe he mea ki te uhu.

⁴ E matasoka mo kaka ona polofeta; E maumaui e ana tagata faisakilifisio te u mea tapu mo te lao.

⁵ Kae e faitotonu te Eteleno i lotomalie o ia, E mole ina fai he mea e kovi; I te uhu fuli e ina fakaha ki te malama ana fakamaauaga, Pea e mole toe faihala ia ia i te mea aia; Kae ko ae e agakovi e mole ina iloi te ufiufi.

⁶ Nee au pulihi ni puleaga; kua maumau onatou tule; Nee au maumaui onatou ala, e mole he tahi kei fakalaka i ai! Kua maumau onatou kolo, e mole kei mau he tagata, e mole kei mau he tahi ke nofo i ai!

⁷ Nee au ui: Kapau pe nee ke fia fakaapaapa kia au, O tokaga ki taku fakatotonu, E mole maumaui anai tou nofoaga, Pea e mole hoko anai te u tautea fuli ae nee au fakatuutuu kia koe! Kae nee natou fakavilivili o ulihi anatou gaue.

⁸ Koia e ui ai e te Eteleno: Koutou talitali mai la kia au! I te aho ae e au tuu ake ai anai o tanaki te koloa o te tau, Koteuhi kua au fakapapau ke fakatahi te atu puleaga, Ke fakatahi te atu puleaga hau, O tupu ke au liligi kia natou toku hauhau, Te mamafa katoa o toku ita; Koteuhi e tutu anai te fenua katoa e te afi o toku finenonofo.

Tapuakina o te temi ki amuli

⁹ I te aho aia, e au foaki anai ki te hahai ni laugutu maa, O tupu ke natou fetapa fuli ki te huafa o te Eteleno, Pea ke natou tauhi kia ia i he loto e tahi.

¹⁰ Mai ae atu faahi o te u vaitafe o Etiopia, E aumai anai e taku kau atolasio, taku kau mavetevete, ni molaga kia au.

¹¹ I te aho aia, e mole ke toe ufiufi anai ki au gaue fuli Ae nee ke agahala ai kia au; Koteuhi e au too anai i lotomalie o ou natou ae nee malo i te fiamealahi, Pea e mole ke toe fiamealahi anai i toku mouga maonioni.

¹² E au tuku anai i lotomalie o ou he hahai agamalu mo masiva, Ae e mau anai tona nonoaga i te huafa o te Eteleno.

¹³ E mole toe fai anai e te toega o Iselaele he agakovi, E mole natou toe fai anai he loi, Pea e mole toe mau anai i tonatou gutu he alelo kaka; Kae e natou kai anai, e natou malolo anai, pea e mole toe fakakovi anai he tahi kia natou.

¹⁴ Taahine o Sione, ke ke kalaga fakafiafia! Iselaele, ke ke fakamapa ni kalaga nekenekea! Taahine o Selusalemi, fakafiafia i tou loto katoa!

¹⁵ Kua fakamafuli kehe e te Eteleno ou tautea, Kua ina fakamamao tou fili. E nofo te hau o Iselaele, te Eteleno, i lotomalie o ou; E mole ke toe mau anai he malaia.

¹⁶ I te aho aia, e ui anai i Selusalemi: Aua naa ke mataku ki he mea! Sione, aua naa fakagaegae ou nima!

¹⁷ E nofo te Eteleno, tou Atua i lotomalie o ou, o hage ko he tagata toa ae e ina fakamauli ia koe; E mau anai tona fiafia lahi ia koe; E fakalologo anai ia ia i tona ofa; E hiva fakafiafia anai ia ia kia koe.

¹⁸ E au fakatahii anai natou ae e loto mamahi, o mamao i te u aho lalahi, Natou ae nee mavae mai tou fatu, Natou ae e mafasia i te ufiufi.

¹⁹ Koeni, i te aho aia, e au gaue anai kia natou ae nee natou fakamamahii ia koe; E au haofaki anai te kau ketu, pea e au fakatalitali anai natou ae nee kapu, E au fakaliliu anai natou ko he tupuaga o te fakavikiviki mo te fakakololia I te u fenua fuli ae nee natou ufiufi ai.

²⁰ I te aho aia, e au toe aumai anai koutou; I te aho aia, e au fakatahii anai koutou; Koteuhi e au fakaliliu anai koutou ko he tupuaga o te fakavikiviki mo te kololia I te lotolotoga o te u hahai fuli o te kele, Moka au toe aumai anai takotou kau popula i mua o okotou mata, E ui e te Eteleno.