SOFONI 2 - Ko te Tohi Tapu i te fakauvea

Paui ki te fakahemala

¹ Koutou ulu kia koutou totonu, koutou fakakaukau mua, Puleaga hala ufiufi,

² I mua o te fakahoko o te fakatotonu, Pea mo te fakalaka o te aho aia o hage ko te penui fulumeto, Ia mua o te to o te hauhau kakaha o te Eteleno kia koutou, Ia mua o te to o te aho o te hauhau o te Eteleno kia koutou!

³ Koutou kumi te Eteleno, koutou fuli, kau agamalu o te fenua, Ae e natou fai ana fakatotonu! Koutou kumi te faitotonu, koutou kumi te fakamalalo! Lagi e fakamauli anai koutou i te aho o te hauhau o te Eteleno.

Fakamaau o te atu puleaga

⁴ Koteuhi e siaki anai ia Kasa, E liliu anai Asekaloni o toafa, E kapu anai Asetoti i te hoata, E taaki anai Ekeloni.

⁵ Malaia ki te hahai o te u matatai, ki te puleaga o te kau Keleti! Nee palalau fehagai te Eteleno kia koe, Kanaane, fenua o te kau Filisitini! E au maumaui anai ia koe, e mole ke toe mau anai hau hahai.

⁶ E liliu anai te u matatai ko ni fagaiaga manu, Ko ni nofoaga ki te kau tauhi manu, Pea ko ni lotoa ki te faga manu.

⁷ Koteuhi e tuku anai te u matatai aia ki te u toega o te fale o Suta; Ko te kogamea aia e natou fagai ai anai anatou faga manu; E natou malolo anai i te afiafi i te u fale o Asekaloni; Koteuhi e mole galoi anai natou e te Eteleno, totatou Atua, Pea e ina toe aumai anai tonatou kau popula.

⁸ Nee au logo ki te u laukovi a Moape Pea mo te u nukinuki a te u fanau o Amone, Ae nee laukovi ki taku hahai, Pea nee natou fai ni fakatuutuu fiamealahi ki ona tuakoi.

⁹ Koia e ui ai e te Eteleno o te atu fua tau, te Atua o Iselaele: E au mauli! E hage anai ia Moape ko Sotoma, pea mo te u fanau o Amone ko Komola, Ko he kogamea fonu i te u vao talatala, ko he lameni masima, ko he toafa ki te heegata; E maumaui anai ia ia e te toega o taku hahai, E mau anai natou e te toega o toku puleaga.

¹⁰ E hoko anai te mea aia kia natou o tupu ko tonatou fiamealahi, Koteuhi nee natou palalau kovi mo nukinuki i te matasoka Ki te hahai a te Eteleno o te atu fua tau.

¹¹ E mafasia anai te Eteleno kia natou, Koteuhi e ina tuusi anai te u atua fuli o te kele; Pea e atolasio anai kia ia te tagata taki toko tahi i tona fenua, I te u motu fuli o te atu puleaga.

¹² Ko koutou foki, kau Etiopia, E taai anai koutou e taku heleta.

¹³ E ina faoi anai tona nima ki te potu noleto, E ina maumaui anai ia Asilia, Pea e ina fakaliliu anai ia Ninive ko he kele lavaki, Ko he kele magemage o hage ko te toafa.

¹⁴ E momoe anai ni faga manu i lotomalie o Ninive, Mo ni manu i te u faahiga kehekehe; Ko te pelikano* mo te eliso E nonofo fakatahi anai i te u puloga o ona pou; E tagi anai te u manulele i te u matapa fakamalama o ona fale; E kamata anai te maumau i te mua matapa, Koteuhi e tata anai te u papa sete* o te u aofi.

¹⁵ Koena te ikuaga o te kolo fiafia aena, Ae nee nofo fakafifimalie, Pea nee ui i tona loto: Ko au, pea ko au pe! Kotea kua hoko, kua maumau ia ia, Kua liliu ia ia ko he nofoaga o te u manu! Ko natou fuli ae e fakalaka anai i ona tafatafa E veka anai mo pasipasi anai onatou nima.