SOFONI 1 - Ko te Tohi Tapu i te fakauvea

Fakamaaui o Suta kua vave osi

¹ Nee fakaha leva te folafola a te Eteleno kia Sofoni, foha o Kusi, foha o Ketalia, foha o Amalia, foha o Esekiasi, i te temi o Sosiasi, foha o Amone, hau o Suta.

² E au maumaui anai te u mea fuli i oluga o te kele, E ui e te Eteleno.

³ E au maumaui anai te u tagata mo te u manu, Te u manulele o te lagi mo te u ika o te tai, Te u mea fakatupu higa mo te kau agakovi mo natou; E au tuusi anai te u tagata i te fuga o te kele, E ui e te Eteleno.

⁴ E au faoi anai toku nima kia Suta, Pea mo te hahai fuli o Selusalemi; E au tuusi anai i te kogamea aeni te toega o Paale, Mo te higoa o ana minisi pea mo ana pelepitelo mo natou,

⁵ Mo natou ae e punonou i oluga o te u ato o te u fale i mua o te solia o te atu lagi, Mo natou ae e punonou o fakapapau i te huafa o te Eteleno, Pea mo toe fakapapau foki i te higoa o tonatou hau ko Malekame,

⁶ Mo natou ae nee maliu kehe i te Eteleno, Pea mo natou ae e mole natou kumi te Eteleno, Natou ae e mole natou kumi tona finegalo.

Te aho o te Eteleno

⁷ Fakalologo i mua o te Aliki, te Eteleno! Koteuhi kua ovi te aho o te Eteleno, Koteuhi kua teuteui e te Eteleno te sakilifisio, pea kua ina filifili ana kau fakaafe.

⁸ I te aho o te sakilifisio a te Eteleno, E au tauteai anai te u aliki mo te u foha o te hau, Pea mo natou fuli ae e natou kofu ki ni kofu matapule.

⁹ I te aho aia, e au tauteai anai natou fuli ae e hopo i te mua matapa o hage ko ni pagani, Natou ae e natou fakafonu te fale o tonatou pule aki te agamalohi mo te kaka.

¹⁰ I te aho aia, e ui e te Eteleno, E i ai anai ni tagi i te matapa o te u ika, Mo ni tagi laulau i te kolo foou, Pea mo he maumau lahi i te u mouga liliki.

¹¹ Koutou fetagihi, hahai o Maketesi! Koteuhi kua maumaui natou fuli ae e faikoloa, Pea kua mamate te tagata fuli ae nee tanaki paaga.

¹² I te aho aia, e au ina anai ia Selusalemi aki ni malama, Pea e au tauteai anai te tagata ae e malolo fakafifimalie o hage ko te takele o te vino i te foi poe, Pea e ui i onatou loto: E mole fai e te Eteleno he lelei pee ko he kovi.

¹³ E kaihaa anai onatou koloa, Pea e maumaui anai onatou fale. E natou kinakina anai i te fakatuu o ni fale kae e mole natou nonofo anai i ai. E natou kinakina anai i te to o ni vite kae e mole natou inu anai ki tona vino.

¹⁴ Kua ovi te aho lahi o te Eteleno, Kua ovi mai ia ia, pea e hau fakavilivili ia ia. E fakaha e te aho o te Eteleno tona leo, Pea e fai e te tagata toa ni tagi mamahi.

¹⁵ Ko te aho aia ko he aho o te hauhau, Ko he aho o te mamahi mo te tuania, Ko he aho o te maveuveu mo te maumau, Ko he aho o te fakapouli mo te pouli, Ko he aho o te u ao mo te u kakapu,

¹⁶ Ko he aho e tagi ai anai te fakatagi pupuhi mo ni kalaga tau Ki te u kolo tau mo te u tule maoluga.

¹⁷ E au tuku anai te u tagata ki te mamahi, E au liligi anai tonatou toto o hage ko te efu, Pea mo tonatou kakano o hage ko ni otaota. Koteuhi nee natou agahala ki te Eteleno; E au liligi anai tonatou toto o hage ko te efu, Pea mo tonatou kakano o hage ko ni otaota.

¹⁸ E mole feala anai ke haofaki natou e tanatou paaga mo tanatou aulo, I te aho o te hauhau o te Eteleno; E tutu anai te fenua katoa e te afi o tona finenonofo; Koteuhi e ina maumaui fakapunamauli anai te hahai fuli o te fenua.