Tohi a Paulo ki te kau LOMA 2 - Ko te Tohi Tapu i te fakauvea

Te fakamaau a te Atua

¹ Oi tagata, ko ai ia koe, ia koe ae e faifakamaau, e mole ke hao anai; koteuhi, i tau fakamaaui natou ake ae, e ke fakamaaui ia koe totonu, koteuhi ko koe ae e ke fakamaaui, e ke toe fai foki te u mea aena.

² Koia, e tou iloi ko te fakamaau a te Atua kia natou ae e natou fai te u mea aena e mulimuli ki te mooni.

³ Pe e ke ui anai, tagata, ae e ke fakamaaui natou ae e natou fai te u mea aena, pea e ke toe fai natou, e ke hao anai i te fakamaau a te Atua?

⁴ Pe e ke fakanoai anai te u koloa o tona agalelei, mo tana kataki fualoa pea mo tona manavaofa faifualoa, o mole ke iloi e ekenaki ia koe e te agalelei o te Atua ki te fakahemala?

⁵ Kae, i tau fakafefeka pea mo tou loto hee fakahemala, e ke tanaki ai kia koe he koloa o te hauhau ki te aho o te hauhau pea mo te fakaha o te fakamaau totonu a te Atua,

⁶ ae e ina totogi anai ki te tagata takitahi o mulimuli ki ana gaue:

⁷ Ko te mauli kia natou ae, i tanatou kataki fualoa o fai te mea e lelei, e natou kumi te kololia, mo te fakamauhiga, pea mo te mauli hee mate;

⁸ kae ko te hauhau mo te mamahi lahi kia natou ae e natou agatuu, mo logogataa ki te mooni kae logogafua ki te agahala.

⁹ Ko te mamahi mo te tuania ki te u tagata fuli ae e natou fai te kovi, o uluaki ki te Sutea pea ki te Keleka!

¹⁰ Ko te kololia, mo te fakamauhiga, pea mo te tokalelei, ki ae e ina fai te lelei, o uluaki ki te Sutea pea ki te Keleka!

¹¹ Koteuhi e mole fakakehei e te Atua he tahi i ona mua.

¹² Ko natou fuli ae nee agahala hala lao e mamate anai hala lao, pea ko natou fuli ae nee agahala i te lao e fakamaaui anai e te lao.

¹³ Koteuhi e mole ko natou ae e fakalogo ki te lao e faitotonu ia mua o te Atua, kae ko natou ae e natou fai te lao e faitotonu.

¹⁴ Ka ko te kau pagani, ae e mole natou mau te lao, e natou fai mahani te mea e fakaha e te lao, e natou liliu, natou aena e mole natou mau te lao, ko he lao kia natou totonu;

¹⁵ e natou fakaha i ai ko te u mea e fakatotonu e te lao kua tohi natou i onatou loto, pea e fakamooni ki ai onatou loto, mo anatou manatu ae e natou valoki natou i ihi lakaga pea e natou fakatonuhia natou i ihi lakaga.

¹⁶ Koena te mea e ha anai i te aho ae e fakamaaui ai anai e te Atua ia Sesu-Kilisito te mea fuape e fufu i te mauli o te u tagata, o mulimuli ki taku Evaselio.

Te kau Sutea mo te Lao

¹⁷ Ia koe, e ke higoa ko te Sutea, e ke falala katoa ki te lao, e ke nekenekea i tou Atua,

¹⁸ e ke iloi te finegalo o te Atua, pea nee ako kia koe e te lao ke ke poto i te filifili o te mea e lelei;

¹⁹ e ke tui ko koe ko he tagata takitaki ki te kau kivi, ko he malama kia natou e nofo i te fakapouli,

²⁰ ko he tagata fakahinohino ki te kau vale, ko he faiako ki te kau toe liliki, koteuhi kua ke mau i te lao te lekula o te poto mo te mooni;

²¹ koia, ko koe ae e ke ako te tahi kaiga, e mole ke ako ia koe totonu! Ko koe ae e ke akonaki ke aua te kaihaa, e ke kaihaa!

²² Ko koe ae e ke ui ke aua te tono, e ke tono! Ko koe ae e ke fakalialia ki te u taulaatua, e ke kaihaa te u fale lotu!

²³ Ko koe ae e ke nekenekea i tau mau te lao, e ke fakamatagafuai te Atua i tau maumaui te lao!

²⁴ Koteuhi kua laukovii te huafa o te Atua i te kau pagani o tupu ko koutou, o hage ko tona tohi.

²⁵ E aoga te silikosisio, mo kapau e ke fai te lao, kae kapau e ke maumaui te lao, e mole he uhiga o tou silikosisioi.

²⁶ Koia kapau e fai e te tagata hee silikosisio te u fakatotonu o te lao, pe e mole lau anai tona hee silikosisio ko he silikosisio?

²⁷ Ko te tagata ae e hee silikosisio i tona kakano, kae e ina fai te lao, e ina fakamaaui anai ia koe, ae e ke maumaui te lao, logo ai e ke mau te lao i te tohi pea kua ke silikosisio i te kakano?

²⁸ Koteuhi ko te Sutea mooni e mole ko ia ae e ina mau te agaaga; pea ko te silikosisio, e mole ko ia ae e ha i te kakano.

²⁹ Kae ko te Sutea mooni e ko ia ae e silikosisio i loto, ae e silikosisio i tona loto, i he silikosisio e fakalogo ki te Laumalie o te Atua kae kailoa ki te matai tohi o te lao. Ko te fakavikiviki o te tagata Sutea aia e mole hau mai te tagata kae mai te Atua.