Tohi a Paulo ki te kau FILIPE 4 - Ko te Tohi Tapu i te fakauvea

¹ Koia, oku tehina ofaina, koutou ae ko toku fiafia mo toku kolona, ke koutou tuu mau i te Aliki, oku ofaaga!

Tokoni fakamuli

² E au kole kia Evoti pea e au kole kia Sinitise ke na mau he manatuloto e tahi i te Aliki.

³ Pea ko koe foki, ko toku kaumea agatonu, io, e au kole atu kia koe ke ke tokoni kia naua, ae nee tau fakatahi mo au ki te Evaselio, pea mo Kelemete pea mo oku kaumea ake ae i te gaue, natou ae kua tuu onatou higoa i te tohi o te mauli.

⁴ Koutou fiafia tuumau i te Aliki, e au toe liuga atu ia, koutou fiafia.

⁵ Ke iloi tokotou agalelei e te u tagata fuli, kua ovi mai te Aliki.

⁶ Aua naa koutou tuania o uhiga mo he mea e tahi, kae koutou fakaha ki te Atua te u mea ae e aoga kia koutou aki ni kole, mo ni kolekole, pea mo ni fakafetai,

⁷ pea ko te tokalelei o te Atua, ae e fakalaka age i te u atamai fuli, e ina taupau anai okotou loto mo akotou manatu ia Sesu-Kilisito.

⁸ Fakaosi leva, u tehina, koutou tokaga ki te u mea fuli ae e lelei pea mo gali i te fakavikiviki: Tafito te u mea fuli ae e mooni mo fakaapaapa, mo totonu, mo maa, mo fakaofaofa pea mo matalelei.

⁹ Ko te mea nee kotou ako, mo kotou tali, pea mo kotou logo ki ai maia au, pea mo te mea nee koutou sio ki ai ia au, koutou fai ia, pea e nofo anai te Atua o te tokalelei mo koutou.

Loto fakafetai o Paulo

¹⁰ Nee au logoi he fiafia lahi i te Aliki i taku sio kua koutou toe fakafoou te mooni o tokotou ofa kia au; ko te mooni, nee koutou manatu tuumau kia au, kae nee mole koutou mau he faigamalie ke fakaha ai ia.

¹¹ E mole au fakaha te mea aia, uhi e aoga mai he mea kia au, he kua au ako ke au fiafia i te nofo e au nofo ai.

¹² E au iloi te mauli i te masiva pea e au iloi te mauli i te mahu. I te u mea fuli mo kogamea fuli kua au ako te makona pea mo te fia kai, te nofo i te mahu pea mo te nofo i te hoge.

¹³ E au fealagia te u mea fuli i ae e ina fakamalohii au,

¹⁴ kae logo ai te mea aena, kua koutou fai he mea lelei i takotou kau ki toku faigataaia.

¹⁵ E koutou iloi e koutou totonu, kau Filipe, i te kamataaga o te akonaki o te Evaselio, i te temi nee au mavae ai mai te fenua o Masetonia, nee mole pe he Ekelesia e tahi nee loto fakafetai o foaki mai kia au he mea;

¹⁶ ko koutou pe ae nee koutou fai te mea aena, koteuhi i Tesalonika, nee kotou aumai te mea ae nee aoga kia au o tua lua foki.

¹⁷ E mole au kumi ni meaofa kae e au kumi te fua ae e ina fakalahi tokotou kaupepa.

¹⁸ Kua au mau te u mea fuli, pea kua au nofo i te mahu; kua au fonu maumau i te u koloa, i taku tali maia Epafolotito te mea nee hau maia koutou o hage ko he kaloni magoni lelei, o hage ko he sakilifisio ae e tali e te Atua, pea e matalelei kia ia.

¹⁹ E tokaga anai toku Atua ki te u mea fuli ae e aoga kia koutou o mulimuli ki tona maukoloa, mo te kololia, ia Sesu-Kilisito.

²⁰ Ke tuku ki totatou Atua ko te Tamai te kololia i te u sekulo mo te u sekulo, Ameni!

Fakaalofa

²¹ Koutou fakaalofa age ki te kau sagato fuli ia Sesu-Kilisito. E fakaalofa atu te u tehina e nonofo mo au.

²² E fakaalofa atu kia koutou te kau sagato fuli, kae tafito natou o te fale o Sesale.

²³ Ko te kalasia o te Aliki ko Sesu-Kilisito ke nofo mo okotou laumalie!