NUMELO 6 - Ko te Tohi Tapu i te fakauvea

Lao ki te tagata nasilea*

¹ Nee palalau leva te Eteleno kia Moisese, o ui:

² Palalau ki te u fanau a Iselaele, pea ke ui kia natou: Ka mavae anai he tagata pee ko he fafine koteuhi nee ina fai te fakapapau o te nasilea, ke fakatapui ia ia ki te Eteleno,

³ e fakafisi anai ia ki te vino mo te u kava malohi; e mole ina inu anai he vinika ae nee fai aki te vino, pee ko he vinika ae nee fai aki he tahi age faahiga kava malohi. E mole ina inu anai he kava malohi ae nee fai aki ni fuai vite, pea e mole ina kai anai ni fuai vite foou pee ko ni fuai vite moamoa.

⁴ I te temi katoa o tona nasilea, e mole ina toe kai anai he mea pe e tahi ae nee gauei mai te fua o te vite, mai te tega o te fuai vite, mo te kili o te fuai vite moamoa.

⁵ I te temi fuli o tona fakapapau nasilea, e mole fakalaka anai te tele i tona ulu; koteuhi kua fakatapui ia ia ki te Eteleno, e ina tuku anai tona lauulu mo tona kaukava ke hohomo faitaliha o kaku ki te osi o te temi o tona nasilea.

⁶ I te temi fuli o tona fakatapui ki te Eteleno, e mole fakaovi anai ia ia ki he tahi nee kua mate;

⁷ e mole tonu ke uli ia ia i te mate o tana tamai, mo tana fae, mo tona tehina, pee ko tona tuagaane, koteuhi kua hili ki tona ulu te fakatapu o tona Atua.

⁸ I te temi katoa o tona nasilea, e fakatapui anai ia ia ki te Eteleno.

⁹ Pea kapau e mate fakafokifa anai he tahi i ona tafa, pea kapau e uli anai i ai tona ulu ae nee kua fakatapui, e ina tele anai tona ulu i te aho o tona fakamaa, e ina tele anai tona ulu i te fitu aho.

¹⁰ I te valu aho, e ina ave anai ni kulukulu e lua pee ko ni lupe e lua ki te tagata faisakilifisio, ki mua o te uluaga o te falela tapu.

¹¹ E momoli anai e te tagata faisakilifisio he manulele e tahi ki te sakilifisio o te fakalelei, pea ki ae ki te failaulau. Pea e ina fai anai ki te tagata te fakalelei o tana agahala i te mate. E fakatapui anai e te tagata nasilea tona ulu i te aho aia.

¹² E ina toe fakatapui anai ki te Eteleno te u aho o tona nasilea, pea e ina toe momoli anai he akeno tau tahi ki te sakilifisio fakalelei; e mole toe lau anai te u aho i mua, koteuhi naa ulihi tona nasilea.

¹³ Koeni te lao o te nasilea. I te aho ae e katoa ai anai tona nasilea, e taki anai ia ia ki te uluaga o te falela tapu.

¹⁴ E ina ave anai tana molaga ki te Eteleno: ko he akeno tau tahi ki te failaulau, mo he ovi fafine tau tahi ki te sakilifisio fakalelei, pea mo he ovi tagata hee mele ki te sakilifisio fakafetai;

¹⁵ mo he kato pane hala fakatupu, mo ni foi keke ae nee fai aki e falaoa maa ae nee natu fakatahi mo te lolo, mo ni pane laulapa hala fakatupu kua vali loloi, pea mo te u molaga falaoa mo te u lipasio mahani.

¹⁶ E ave anai e te tagata faisakilifisio te u mea aia kia mua o te Eteleno, pea e ina momoli anai tana vikitima fakalelei mo tana failaulau.

¹⁷ E ina momoli anai te ovi tagata o te sakilifisio fakafetai ki te Eteleno, mo te kato keke hala fakatupu; pea e ina momoli fakaosi anai te molaga falaoa mo te lipasio.

¹⁸ E tele anai e te tagata nasilea tona ulu i te uluaga o te falela tapu, pea e ina hili anai ona fului ulu ki te fuga afi ae e tutu ai te sakilifisio fakafetai.

¹⁹ E too anai e te tagata faisakilifisio te alaga mua o te ovi tagata, ae kua moho mo he foi keke hala fakatupu, mo he foi pane lapa hala fakatupu; pea e ina hili anai te u mea fuli aia kia nima o te tagata nasilea, moka kua osi tona ulu i te tele.

²⁰ E feliaki anai e te tagata faisakilifisio te u mea aia mai te fahai ae ki te fahai ae ia mua o te Eteleno: ko he mea tapu ia, ae ka mau e te tagata faisakilifisio, mo te vakavaka ae nee feliaki mo te alaga muli ae nee hiki. Pea hoki feala leva ke inu e te tagata nasilea te vino.

²¹ Koena te lao ki ae e ina fai te fakapapau o te nasilea, koena tana molaga ki te Eteleno, ki tona nasilea, o fakalogo ki tona mau. E ina fai leva te mea ae kua fakatotonu ki te fakapapau ae nee fai o mulimuli ki te lao o tona nasilea.

Kole o te tapuaki

²² Nee palalau leva te Eteleno kia Moisese, o ui:

²³ Palalau kia Alone mo ona foha, o ui: e kotou tapuaki fenei anai ki te u fanau a Iselaele, o kotou ui kia natou:

²⁴ Ke tapuaki te Eteleno kia koe, pea ke ina taupau koe!

²⁵ Ke fakagigila e te Eteleno ona mata kia koe, pea ke ina tuku atu kia koe ona kalasia.

²⁶ Ke fakaha e te Eteleno tona agalelei kia koe, pea ke ina tuku atu tona tokatokalelei!

²⁷ E natou hili feiai anai toku huafa ki te u fanau a Iselaele, pea e au tapuaki anai kia natou.