NUMELO 5 - Ko te Tohi Tapu i te fakauvea

Lao o uhiga mo te agahala

¹ Nee palalau leva te Eteleno kia Moisese mo Alone o ui:

² Fakatotonu ki te u fanau a Iselaele ke natou fakamavae mai te nofoaga te u kilia fuli, mo te u tagata fuli ae e nonofo mo he mahaki fakatagata, pea mo te u tagata fuli ae kua uli i he mate.

³ Tagata pee fafine, ke kotou fakamavae natou mai te nofoaga, o tupu ke aua naa natou ulihi te nofoaga ae e tuu ai toku nofoaga i lotomalie.

⁴ Nee fai leva e te u fanau a Iselaele ki ai; pea nee natou fakamavae leva natou aia mai te nofoaga ki fafo; nee fai leva e te u fanau a Iselaele te mea ae nee fakatotonu e te Eteleno kia Moisese.

⁵ Nee palalau leva te Eteleno kia Moisese, o ui:

⁶ Palalau ki te u fanau a Iselaele: Kapau e agahala anai he tagata pee ko he fafine ki he tahi, o ina fai he agatuu ki te Eteleno, pea e agahala anai ia.

⁷ E ina kofesioi anai tana agahala, pea e ina toe liufaki anai te mea ae nee ina kaihaa, o ina fakalahi ki te vaega nima, pea e ina tuku anai ia ki te tagata ae nee agahala ia ia ki ai.

⁸ Pea kapau e mole mau he tahi ae ke tuku ki ai te mea ae nee kaihaa, e tuku anai ia ki te Eteleno, pea e mau anai ia e te tagata faisakilifisio, kae kehe pe te ovi tagata o te sakilifisio fakalelei ke fakamolemole ai te agahala a te tagata aia.

⁹ Ko te u vaega fuli ae e too i he molaga tapu ae nee ave e te u fanau a Iselaele, e mau anai e te tagata faisakilifisio.

¹⁰ Ko te mea ae e fakatapui e he tahi ki te Eteleno e tuku anai ki te tagata faisakilifisio; ko te mea ae e foaki e he tagata ki te tagata faisakilifisio, e feala anai ke taupau e te tagata faisakilifisio.

¹¹ Nee palalau leva te Eteleno kia Moisese, o ui:

¹² Palalau ki te u fanau a Iselaele, pea ke ui kia natou: Kapau e maliu kehe he fafine mai tona ohoana, o ina fai he agatuu kia ia;

¹³ pea kapau nee moe leva he tagata mo ia, pea nee fufu te mea aia ki tona ohoana; pea kapau nee agahala fakafufu te fafine, kae nee mole mau leva he tahi ke fakamooni ki te mea aia, koteuhi nee mole sio tonu he tahi ki ai;

¹⁴ pea kapau kua mau e te tagata he loto finenonofo, o mahalohalo ki tona ohoana kua agahala; pea kapau leva kua mau e te tagata he loto finenonofo, o mahalohalo leva ki tona ohoana, kae e heeki agahala ia ia,

¹⁵ e ave anai e te tagata aia tona ohoana ki te tagata faisakilifisio mo he molaga ki tona ohoana, ko ni kilo falaoa olese* e tolu. E mole ina liligi anai he lolo ki oluga o te falaoa aia, pea e mole ina hili anai he iseso ki oluga, koteuhi ko he molaga ia o tupu ko he mahalohalo kovi, ke fakaha ai he hala.

¹⁶ E taki anai e te tagata faisakilifisio te fafine ki te sagatualio, o fakatuu ia ia ia mua o te Eteleno.

¹⁷ E too anai e te tagata faisakilifisio he vai tapu i he ipu kele; pea e ina too anai he moi efu i te kele o te tapenakulo, o tuku ki te vai tapu.

¹⁸ E fakatuu anai e te tagata faisakilifisio te fafine ia mua o te Eteleno: e ina too anai te kie pulou i te ulu o te fafine, pea e ina hili anai ki te u nima o te fafine te molaga o te fakamanatu, te molaga o te finenonofo. E too anai e te tagata faisakilifisio i ona nima te vai kona ae e ina tuku te malaia.

¹⁹ E ui anai e te tagata faisakilifisio ki te fafine ke fakapapau, o ui: Kapau nee mole moe he tagata kehe mo koe, pea nee mole ke he mai tou ohoana, pea nee mole ke kakaai ia ia o ke ulihi ia koe, e mole fakamalaia anai ia koe e te vai kona aeni.

²⁰ Kae kapau nee ke ulihi ia koe, pea nee ke moe mo he tagata kehe, pea nee ke kakaai tou ohoana,

²¹ pea e ui anai e te tagata faisakilifisio ke fakapapau ki te malaia te fafine, pea e ina ui anai ki te fafine: Ke tuku ia koe e te Eteleno ki te malaia mo te takugai i te lotolotoga o tau hahai, o fakamatenoa tou kauaga mo fakamapula tou fatu,

²² pea ke ulu ki ou tootooga te vai aeni e ina tuku anai kia koe te malaia, o ina fakamapula tou fatu mo fakamatenoa tou kauaga! Pea e tali anai e te fafine: Ameni! Ameni!

²³ E tohi anai e te tagata faisakilifisio te u malaia fuli aena i he tohi, pea e ina molehi anai natou aki te vai kona.

²⁴ Pea e ina fakainu anai ki te fafine te vai ae e ina tuku te malaia, pea e ulu anai kia ia te vai kona ae e ina tuku te malaia.

²⁵ E too anai e te tagata faisakilifisio maia nima o te fafine te molaga o te finenonofo, pea e ina feliaki anai te molaga ki potu mo potu ia mua o te Eteleno, pea e ina momoli anai ia i te aletale.

²⁶ E too anai e te tagata faisakilifisio mai te molaga aia he moi falaoa aki tona alofi nima, ae e higoa ko te fakamanatu, pea e ina tutu anai ia i oluga o te aletale. Hoki osi anai te mea aena, pea hoki ina fakainu leva te vai ki te fafine.

²⁷ Ka osi anai te inu o te vai e te fafine, e hoko anai te mea aeni: Kapau nee agahala mooni te fafine, pea nee ina kakaai tona ohoana, e ulu anai kia ia te vai kona ae e ina tuku te malaia, o fakatupu te kona aia, o matakitaki ai tona fatu, pea e matenoa anai tona kauaga, pea e liliu anai te fafine aia ko he mea takuga malaia i tona hahai.

²⁸ Kae kapau nee mole agahala te fafine, kae nee maa lelei pe ia, e hao anai ia mai te malaia, pea e feala anai ke toe mau e te fafine ni ana fanau.

²⁹ Koena te lao ki te finenonofo, o uhiga mo te fafine ae e mauli kovi, pea nee ina kakaai tona ohoana o tupu ai tana agahala,

³⁰ pee ko he fafine ae e mahalohalo kovi ki ai tona ohoana. E ave anai e te tagata tona ohoana kia mua o te Eteleno, pea e fai anai e te tagata faisakilifisio kia ia te lao katoa aena.

³¹ E mole anai valoki he hala ki te tagata, kae e amo anai e te fafine tana agahala mo kapau nee hala mooni ia ia.